ដំឡូងមីមានតម្លៃល្អប្រសើរនៅដើមឆ្នាំនេះ ខណៈអ្នកជំនាញបារម្ភបញ្ហាខ្វះទឹកធ្វើឱ្យប៉ះពាល់ដល់ការដាំដុះ

លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ បានគូសបញ្ជាក់ថា បច្ចុប្បន្នប្រជាកសិករកំពុងមមារញឹកជាមួយការប្រមូលផលដំឡូមីរបស់ពួកគេ ដើម្បីលក់ឱ្យឈ្មួញសម្រាប់នាំចេញ។ បើតាមប្រធានមន្ទីររូបនេះ តម្លៃដំឡូមីនៅដើមឆ្នាំនេះនៅតែមានតម្លៃល្អប្រសើរគួរឱ្យកត់សម្គាល់ ដោយមានការកើនឡើងតិចតួចបើធៀបនឹងឆ្នាំមុន តួយ៉ាងដំឡូងមីស្រស់របស់ប្រជាកសិករក្នុងខេត្តព្រះវិហារ អាចលក់បានក្នុងតម្លៃប្រមាណ៣៨០រៀលក្នុងមួយគីឡូក្រាម និងដំឡូងមីក្រៀមអាចលក់បានតម្លៃប្រមាណជិត៩០០រៀល ក្នុងមួយគីឡូក្រាម។ ស្របពេលតម្លៃដំឡូមីនៅឆ្នាំនេះមានតម្លៃល្អហើយនោះ ទិន្និផលដំឡូងមីរបស់កសិករក្នុងខេត្តព្រះវិហារវិញ ក៏ទទួលបានទិន្នផលល្អប្រសើរផងដែរ។

ស្រដៀងគ្នានេះលោក ហេង សិទ្ធ ប្រធានការិយាល័យសេដ្ឋសាស្ត្រ នៃមន្ទីរកសិកម្មរុក្ខាប្រមាញ់ និងនេសាទខេត្តបាត់ដំបង បានញ្ជាក់ឱ្យដឹងដែរថា តម្លៃទីផ្សារដំឡូងមីនៅក្នុងខេត្តបាត់ដំបងនៅដើមឆ្នាំនេះក៏មានតម្លៃល្អជាងឆ្នាំមុនបន្តិចដែរ ដោយតម្លៃដំឡូងមីដែលប្រជាកសិករលក់បាននាពេលបច្ចុប្បន្ននេះ មានការកើនឡើងប្រមាណ៣០រៀល ក្នុងមួយគីឡូក្រាម ទាំងសម្រាប់ដំឡូងមីក្រៀម និងដំឡូងមីស្រស់​។ បើតាមមន្ត្រីជំនាញរូបនេះ គោលដៅនាំចេញដំឡូងមីនៅក្នុងខេត្តបាត់ដំបង ប្រមាណ៧០% ត្រូវនាំចេញទៅប្រទេសថៃ និងប្រមាណ៣០% ទៀត គឺសម្រាប់ប្រើប្រាស់ក្នុងស្រុក។

ជាមួយគ្នានេះ លោក អិល ឈិញ ប្រធានសមាគមដំឡូងមីខ្មែរ បានវាយតម្លៃថា តម្លៃទីផ្សារដំឡូងមីជារួមនៅដើមឆ្នាំ២០២៤នេះ នៅតែរក្សាបាននូវតម្លៃល្អប្រសើរដដែល ទោះបីមានការប្រែប្រួលតិចតួចនៅក្នុងរយៈពេលខ្លីក៏ដោយ។ យ៉ាងណាមិញការដាំដុះដំណាំរបស់ប្រជាកសិករនាពេលបច្ចុប្បន្នវិញ ប្រធានសមាគមរូបនេះ កត់សម្កាល់ឃើញថា ក៏មានជួបនូវបញ្ហាប្រឈមមួយចំនួនផងដែរ ជាពិសេសគឺបញ្ហាខ្វះទឹកសម្រាប់ស្រោចស្រពតែម្តង ដ្បិតថា ប្រសិនបើកម្ពុជារងនូវបាតុភូតអែលនីណូ ដែលអាចបង្កឱ្យមានរដូវប្រាំងវែងនៅឆ្នាំនេះនោះ ប្រធានសមាគមដំឡូងមីរូបនេះ ព្រួយបារម្ភថា វានឹងធ្វើឱ្យប៉ះពាល់ដល់ការដាំដុះ ការប្រមូលផល ក៏ដូចជាការនាំចេញដំណាំដំឡូងមីនៅឆ្នាំនេះផងដែរ។ ប៉ុន្តែបើគ្មានការប្រែប្រួលដោយសារបញ្ហាអាកាសធាតុទេនោះ លោកជឿជាក់ថាផ្ទៃដីដាំដុះដំណាំដំឡូងមីរបស់ប្រជាកសិករនៅឆ្នាំនេះ នឹងមានការកើនឡើងប្រមាណ២០% ទៅ៣០% បន្ថែមទៀត ខណៈបច្ចុប្បន្នកម្ពុជាមានផ្ទៃដីសម្រាប់ដាំដុះដំណាំដំឡូងមីប្រមាណជិត១លានហិតតានៅទូទាំងប្រទេស។

សូមជម្រាបថា នៅក្នុងឆ្នាំ២០២៣ ការនាំចេញដំឡូងមីស្រស់កម្ពុជា សម្រេចបានជិត២លានតោន កើនឡើងជាង២៦% ខណៈការនាំចេញចំណិតដំឡូងមីក្រៀម សម្រេចបានជាង១លាន២សែនតោន ថយចុះជាង៣៧% បើធៀបនឹងឆ្នាំ២០២២។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ៕