កម្ពុជាទទួលបានថវិកាជិត១២ពាន់លានដុល្លារពីការនាំចេញទំនិញនៅ៦ខែកន្លងមកនេះ

ទោះបីសេដ្ឋកិច្ចសកល រួមទាំងកម្ពុជា ស្ថិតក្នុងភាពមិនច្បាស់លាស់បង្កឡើងដោយបញ្ហាសង្គ្រាម និងភាពតានតឹងផ្នែកភូមិសាស្ត្រនយោបាយសកល និងជម្លោះពាណិជ្ជកម្មរវាងប្រទេសមហាអំណាច ក៏ដោយ តែវាមិនបានជះឥទ្ធិពលធ្ងន់ធ្ងរមកលើការធ្វើការពាណិជ្ជកម្មរបស់កម្ពុជា។ ជាក់ស្តែងបើតាមការគូសបញ្ជាក់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅក្នុងរយៈពេល៦ខែចាប់ពីខែកញ្ញា ឆ្នាំ២០២៣ ដល់ថ្ងៃខែកុម្ភៈ ឆ្នាំ២០២៤ កម្ពុជាសម្រេចបានទំហំនាំចេញទំនិញទៅកាន់ទីផ្សារអន្តរជាតិ ជិត១២ពាន់លានដុល្លារអាម៉េរិក មានការកើនឡើងជាង១ពាន់៦រយលានដុល្លារ ឬជាង១៦% បើធៀបនឹងរយៈពេលដូចគ្នាកាលពីឆ្នាំមុន។

​បើតាមសម្ដេចធិបតី ហ៊ុន ម៉ាណែត ស្ថានភាពសេដ្ឋកិច្ចរបស់កម្ពុជា នៅក្នុងរយៈពេល៦ខែមកនេះ គឺផ្អែកលើទិន្នន័យជាក់ស្ដែងពិតប្រាកដ ហើយក៏មិនមែនជាការបង្កើតឡើង ដើម្បីភូតភរណាមួយនោះដែរ​។ ទន្ទឹមនេះ សម្តេចនាយករដ្ឋមន្ត្រីកម្ពុជា បានជំរុញដល់ថ្នាក់ដឹកនាំពាក់ព័ន្ធបន្តនូវសន្ទុះទាក់ទាញដើម្បីបង្កើនសេដ្ឋកិច្ចកម្ពុជា បន្ថែមទៀត ដោយក្នុងនោះក្រសួង ស្ថាប័នមានសមត្ថកិច្ចបន្តធានានូវការព្យាករអាចទុកចិត្តបាន តម្លាភាព ភាពទុកចិត្តបាននៃការអនុវត្តគោលនយោបាយ និងវិធានការដែលបានដាក់ចេញ និងធ្វើការងារក្នុងស្មារតីបុរេសកម្មជាមួយបណ្ដាក្រុមហ៊ុន ដែលមានចំណាប់អារម្មណ៍ផងដែរ។ បន្ថែមពីនេះ ក្រសួងមានសមត្ថកិច្ចត្រូវរាយការណ៍ឱ្យបានជាប់ជាប្រចាំ និងធ្វើការជាមួយវិស័យឯកជនឱ្យបានទៀងទាត់ព្រមទាំងលើកជាដំណោះស្រាយជាក់ស្ដែងឱ្យបានទាន់ពេលវេលា និងឱ្យចេញជាលទ្ធផលតាមយន្តការដែលមានស្រាប់៕

អត្ថបទ៖ បូ ដូឡា​