អ្នកជំនាញរំពឹងគ្រាប់ស្វាយចន្ទីកម្ពុជាមានទីផ្សារកាន់តែខ្ពស់ ក្រោយគ្រាប់ស្វាយចន្ទីចំនួន២តោនត្រូវបាននាំចេញទៅចិនជាលើកដំបូង

ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា បន្ទាប់ពីឆ្លងកាត់កិច្ចប្រជុំប្រកបដោយផ្លែផ្កាចំនួន២លើកក្នុងខែកក្កដា និងខែសីហា ជុំវិញកិច្ចសហប្រតិបត្តិការលើវិស័យឧស្សាហកម្មដំណាំកម្ពុជា-ចិន កម្ពុជាបានសម្រេចជោគជ័យក្នុងការនាំចេញគ្រាប់ស្វាយចន្ទីជាលើកដំបូងចំនួន២តោន នៃផលិតផលគ្រាប់ស្វាយចន្ទីដែលបានបញ្ជាទិញចំនួន២រយតោនក្នុងមួយឆ្នាំទៅកាន់ខេត្តហឺណាននៃប្រទេសចិន ដោយកម្ពុជានឹងបញ្ជូនគ្រាប់ស្វាយចន្ទីតាមជើងហោះហើរជារៀងរាល់សប្ដាហ៍បន្ថែមទៀត។

បើតាម ឯកឧត្តម ងិន ឆាយ កម្ពុជានឹងបន្តផ្សព្វផ្សាយអំពីសក្តានុពលរបស់គ្រាប់ស្វាយចន្ទីកម្ពុជា និងជំរុញការនាំចេញទៅកាន់ប្រទេសជាច្រើនទៀតដូចជាទីផ្សារអារ៉ាប់ ទីផ្សារសហភាពអឺរ៉ុប និងទីផ្សារជប៉ុនជាដើម ដើម្បីពង្រីកទីផ្សារស្វាយចន្ទីរបស់កម្ពុជាបន្ថែមទៀត។

ជាមួយគ្នានេះ លោក អួន ស៊ីឡុត ប្រធានសមាគមស្វាយចន្ទីកម្ពុជាបានគូសបញ្ជាក់ថា កន្លងមកក្រុមហ៊ុនដែលជាសមាជិករបស់សមាគមក៏បាននាំចេញគ្រាប់ស្វាយចន្ទីកែច្នៃរួចទៅកាន់ខេត្តមួយចំនួននៃប្រទេសចិនផងដែរ ប៉ុន្តែមានចំនួនតិចតូចប៉ុណ្ណោះ។

តាមរយៈការសម្រេចបាននូវការនាំចេញទៅកាន់ខេត្តហឺណាននៃប្រទេសចិននាពេលនេះ លោក អួន ស៊ីឡុត រំពឹងថា គ្រាប់ស្វាយចន្ទីកម្ពុជានឹងអាចនាំចេញទៅកាន់ទីផ្សារចិនបានកាន់តែច្រើនថែមទៀត។ ការរំពឹងបែបនេះ ក៏ដោយសារប្រធានសមាគមរូបនេះសិក្សាឃើញថា ទីផ្សារនាំចេញគ្រាប់ស្វាយចន្ទីដ៏មានសក្តានុពលរបស់កម្ពុជានាពេលអនាគត គឺជាទីផ្សារប្រទេសចិន បន្ទាប់មកទីផ្សារអឺរ៉ុប និងអាមេរិក។

ម្យ៉ាងទៀត តាមរយៈកិច្ចសហប្រតិបត្តិការល្អរវាងរដ្ឋាភិបាលនៃប្រទេសទាំងពីរ ក៏ដូចតាមរយៈការទាក់ទាញវិនិយោគិនចិនលើការបើករោងចក្រកែច្នៃគ្រាប់ស្វាយចន្ទីនៅកម្ពុជា ក៏អាចជំរុញឱ្យការនាំចេញទៅទីផ្សារចិនមានការកើនឡើងផងដែរ។

សូមជម្រាបថា នៅក្នុងរយៈពេល៧ខែឆ្នាំនេះ កម្ពុជាផលិតគ្រាប់គ្រាប់ស្វាយចន្ទីឆៅបានជាង៨៣ម៉ឺនតោន មានការកើនជាង៣៦% បើធៀបនឹងរយៈពេលដូចគ្នាកាលពីឆ្នាំមុន ដែលធ្វើឱ្យកម្ពុជាជាប់ចំណាត់ថ្នាក់លេខ២ជាប្រទេសនាំចេញស្វាយចន្ទីច្រើនជាងគេនៅលើពិភពលោក៕