សហគ្រិនខ្មែរ និងផ្សារទំនើប អ៊ីអន បន្ដសហការគ្នារៀបចំពិព័រណ៍ផលិតផលក្នុងស្រុក

ការរៀបចំពិព័រណ៍ផលិតផលក្នុងស្រុកនេះ មានគោលបំណងជួយលើកកម្ពស់ផលិតផលក្នុងស្រុក លើកម្ពស់ជីវភាពប្រជាកសិករក្នុងស្រុក និងបើកឱកាសទីផ្សរថ្មីៗ សម្រាប់ផលិតផល​ក្នុងស្រុក​ទាំងក្នុងតំបន់ និងក្រៅតំបន់។

នេះគឺជាលើកទី៨ហើយ ដែលសហគ្រិនខ្មែរ និងផ្សារទំនើប អ៊ីអន​ បានសហការគ្នា ដើម្បីរៀបចំ​ពិព័រណ៍ផលិតផលក្នុងស្រុក ដើម្បីផ្សព្វផ្សាយផលិតផល និងសហគ្រាសធុនតូច និងមធ្យមក្នុងស្រុក ដែលស្របតាមគោលនយោបាយ​របស់រាជរដ្ឋាភិបាល​កម្ពុជា ក្នុងការលើកកម្ពស់​ផលិតផល​ក្នុងស្រុក​នៅលើទីផ្សារឲ្យកាន់តែទូលំទូលាយ។ ពាក្យស្លោកនៃពិព័រណ៍នេះ គឺ «គាំទ្រផលិតផលខ្មែរ ថែសេដ្ឋកិច្ចជាតិ»។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល និងជានាយកប្រតិបត្តិនៃសហគ្រិនខ្មែរ បានមានប្រសាសន៍ថា សហគ្រិនខ្មែរ ពិតជាមានមោទនភាព នៅពេលបានឃើញពីកំណើនអតិថិជន​គាំទ្រ​ផលិតផលក្នុងស្រុក។ ភាពជាដៃគូរវាងសហគ្រិនខ្មែរ និងផ្សារទំនើបអ៊ីអន គឺជាការពង្រឹង​ការកសាង​ប្រព័ន្ធអេកូឡូស៊ី ក្នុងការជំរុញការលក់ក៏ដូចជាំគាំទ្រដល់សហគ្រាសធុនតូច និងមធ្យម​ផងដែរ។ ឯកឧត្តម បានបន្ថែមថា ពិព័រណ៍ផលិតផក្នុងស្រុកនេះ គឺស្របទៅតាមបេសកកម្ម​របស់​សហគ្រិនខ្មែរ ក្នុងការផ្សព្វផ្សាយផលិតផល និងអាជីវកម្មក្នុងស្រុក នៅក្នុងផ្សារទំនើប និងកន្លែង​ផ្សេងៗទៀត ហើយវាក៏ស្របទៅនឹងការប្តេជ្ញាចិត្តរបស់រាជរដ្ឋាភិបាល ក្នុងការផ្សាភ្ជាប់​សហគ្រាសធុនតូច និងមធ្យមក្នុងស្រុកទៅកាន់ឱកាសទីផ្សារធំបន្ថែមទៀត។

លោក ស៊ិន ពិសី អគ្គនាយកក្រុមហ៊ុន អ៊ីអន ខេមបូឌា បានគូសបញ្ជាក់ដែរថា គិតចាប់តាំងពី​ឆ្នាំ២០២១មក នេះជាលើកទី៨ហើយ ដែលផ្សារទំនើបអ៊ីអន បានសហការជាមួយសហគ្រិនខ្មែរ ក្នុងការរៀបចំពិព័រណ៍ផលិតផលក្នុងស្រុកនេះ នៅក្នុងផ្សារទំនើបអ៊ីអនទាំង៣សាខា។ ពិព័រណ៍នេះ ទទួលបានការគាំទ្រយ៉ាងខ្លាំងពីអតិថិជនក្នុងស្រុក និងជនបរទេសផងដែរ។ លោកបន្ថែមថា ផ្សារទំនើបអ៊ីអន ប្តេជ្ញាគាំទ្រកសិករក្នុងស្រុក ផ្សព្វផ្សាយផលិតផលក្នុងស្រុក និងធានា សុវត្ថិភាពចំណី​អាហារគុណភាព និងតម្លៃសមរម្យ ដល់អតិថិជន។

តាមរយៈពិព័រណ៍ផលិតផលក្នុងស្រុកនេះ អតិថិជន​អាចដើរទិញទំនិញដែលជាផលិតផលក្នុងស្រុក ដែលមានគុណភាពល្អជាច្រើនមុខ និងសម្ភារៈប្រើប្រាស់ប្រចាំថ្ងៃផ្សេងៗទៀត រួមមាន បន្លែផ្លែឈើស្រស់ៗ ទឹកដោះគោ អង្ករ វត្ថុអនុស្សាវរីយ៍ និងផលិតផលផ្សេងៗទៀត លើសពីនេះ អតិថិជន​នឹងទទួលបាន​ការបញ្ចុះតម្លៃលទំនិញជាច្រើនមុខ និងឱកាសឈ្នះរង្វាន់ជាច្រើនទៀត រាល់ការបញ្ជាទិញចាប់ពី១៥ដុល្លារឡើងទៅផងដែរ៕