តម្លៃមាសនៅលើទិផ្សារពិភពលោករួមទាំងកម្ពុជា បានហក់ឡើងខ្ពស់ជាបន្តបន្ទាប់នៅមួយរយៈពេលចុងក្រោយនេះ តួយ៉ាងនៅថ្ងៃទី១៣ ខែកញ្ញានេះ តម្លៃមាសនៅកម្ពុជាបានហក់ឡើងដល់ជាង ៣,០៩០ដុល្លារក្នុង១តម្លឹង ដែលជាតម្លៃខ្ពស់បំផុតមិនធ្លាប់មានពីមុនមកក្នុងប្រវត្តិសាស្ត្រកំណត់ត្រាតម្លៃមាសនៅកម្ពុជា។ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរីធី បានវាយតម្លៃថា ចាប់តាំងពីដើមឆ្នាំ២០២៤ មកតម្លៃមាសបានហក់ឡើងខ្ពស់ជាបន្តបន្ទាប់ ដោយសារឥទ្ធិពលនៃភាពតានតឹងភូមិសាស្រ្តនយោបាយ និងបញ្ហាសង្គ្រាមនានា និងឥទ្ធិពលនៃការធ្លាក់ចុះតម្លៃប្រាក់ដុល្លារអាម៉េរិកជាដើម។ តែអ្វីដែលធ្វើឱ្យតម្លៃមាសកាន់តែហក់ឡើងថ្លៃខ្ពស់យ៉ាងគំហុកនាពេលនេះ គឺបន្ទាប់ពីទទួលបានតម្រុយកាន់តែច្បាស់ពីការកាត់បន្ថយអត្រាការប្រាក់ប្រមាណ ០,២៥% របស់ធនាគារកណ្តាលអាម៉េរិកនៅថ្ងៃទី១៩ ខែកញ្ញា ខាងមុខនេះ។
អ្នកជំនាញដដែលរូបនេះវាយតម្លៃថា ប្រសិនបើការបោះឆ្នោតនៅសហរដ្ឋអាម៉េរិកនៅដើមខែវិច្ឆិកា ខាងមុខនេះ ដំណើរការទៅដោយរលូននោះ លោកជឿជាក់ថា ហាងឆេងមាននៅលើទីផ្សារពិភពលោកនឹងមានការប្រែប្រួលបន្ថែមទៀត ពោលគឺប្រសិនបើលោក ដូណាល់ ត្រាំ ជាប់ឆ្នោត នោះតម្លៃមាសអាចនឹងមានការធ្លាក់ចុះ ដោយសារតែប្រវត្តិសាស្រ្តនៅក្នុងអាណត្តិរបស់លោក ត្រាំ នាពេលកន្លងមក លោកជំរុញឱ្យតម្លៃប្រាក់ដុល្លារមានទំនោរល្អប្រសើរ ហើយតម្លៃមាសធ្លាក់ចុះ។ តែយ៉ាងណា អ្នកជំនាញរូបនេះកត់សម្គាល់ឃើញថា តម្លៃមាសបច្ចុប្បន្ននៅតែមានទំនោរកើនឡើងជាបន្តទៀត នឹងអាចហក់ឡើងដល់ជាង៣ពាន់២រយដុល្លារក្នុងមួយតម្លឹងនាពេលខាងមុខនេះ។
យ៉ាងណាក៏ដោយចុះ ស្ថិតក្នុងស្ថានភាពទីផ្សារមាសមានការប្រែប្រួលយ៉ាងឆាប់រហ័សនេះ លោក ឡុង សំណាង ស្នើឱ្យអ្នកវិនិយោគ និងអាជីវករជួញដូរមាសគួរមានការប្រុងប្រយ័ត្នខ្ពស់ និងតាមដានព័ត៌មានឱ្យបានដិតដល់ ដើម្បីបញ្ជៀសហានិភ័យផ្សេងៗលើការជួញដូរ និងបង្វិលដើមទុនរបស់ខ្លួន។ ម្យ៉ាងទៀត ស្ថិតក្នុងស្ថានភាពដែលតម្លៃមាសកំពុងហក់ឡើងបែបនេះ វាក៏ជាឱកាសមួយសម្រាប់ប្រជាពលរដ្ឋ ឬអ្នកវិនិយោគ អាចបញ្ចេញមាសលក់ដើម្បីយកប្រាក់ចំណេញផងដែរ៕
អត្ថបទ សោម ស្រីពេជ្រ និងរូបភាពឯកសារ
