មហាសន្និបាត BNI ប្រចាំឆ្នាំ ២០២២ នេះ ជាមហាសន្និបាតប្រចំាឆ្នាំ របស់ ក្រុមអ្នកជំនួញ ធំជាងគេបំផុតនៅកម្ពុជាក្នុងឆ្នាំ ២០២២ នេះ ដែលគ្រោងនឹងប្រព្រឹត្តទៅនៅ ឌឹ ព្រីមៀ សែនសុខ ក្នុងរាជធានីភ្នំពេញ ។
មហាសន្និបាតប្រចាំឆ្នាំរបស់ក្រុមអ្នកជំនួញនេះ នឹងមានការចូលរួមពីសំណាក់វាគ្មិនក្នុងស្រុក និងក្រៅស្រុកជាង ១០រូប ក្នុងនោះរួមមាន លោក Jonathon Chua ដែលជានាយក BNI ប្រចាំតំបន់អាស៊ីប៉ាស៊ីហ្វិក លោក Chin Kang Wei ជាអ្នកសម្របសម្រួលច្បាប់ស្រូបទាញ និងលោក Mike Savage ស្ថាបនិក និងជាអគ្គនាយកក្រុមហ៊ុន Savage Secrets ។
លោក ឡុក ស្មីតសាមឌី ជាស្ថាបនិក និងជាប្រធាន BNI ប្រចាំនៅកម្ពុជា មានប្រសាសន៍ថា៖ “សន្និបាត BNI ប្រចាំឆ្នាំ ២០២២ នេះត្រូវបានរៀបចំឡើងវិញក្រោយខកខានរយៈពេល ២ ឆ្នាំ ដោយសារតែវិបត្តិសកល ។ សន្និបាតលើកនេះ នឹងផ្ដល់ជាឱកាសសម្រាប់ម្ចាស់ជំនួញ និងអាជីវកម្មនានា បានមកជួបជុំគ្នាសាឡើងវិញ ក៏ដូចជា រិះរកវិធី ដើម្បីជំរុញកំណើនអាជីវកម្មរបស់ខ្លួន ក្រោយរងព្យុះភ្លៀងដោយសារវិបត្តិសកល” ។
លោក ឡុក ស្មីតសាមឌី បានពន្យល់ថា ការចូលរួមជាសមាជិករបស់ BNI កម្ពុជា មានន័យថា សមាជិកនឹងមានឱកាសក្នុងការកសាងបណ្ដាញបន្ថែមទៀតជាមួយនឹងសមាជិកដែលមានស្រាប់ ក៏ដូចជាអាជីវកម្មនានា ដែលធ្វើឲ្យពួកគាត់អាចទទួលបាននូវគម្រោងថ្មីៗ ឬអតិថិជនថ្មីៗ ពីកម្មវិធីនេះបាន បន្ថែមលើការទទួលបាននូវចំណេះដឹងដែលអាចយកទៅប្រើប្រាស់ក្នុងការពង្រឹង និងពង្រីកអាជីវកម្មរបស់ខ្លួន ។
លោក ឡុក ស្មីតសាមឌី មានប្រសាសន៍ថា៖ “អត្ថប្រយោជន៍ដែលសមាជិករបស់ BNI ទទួលបានបន្ថែមទៀតនោះ រួមមាន ការចែករំលែកចំណេះដឹង ជាច្រើនដូចជា ភាពជាអ្នកដឹកនាំ ការគ្រប់គ្រងអាជីវកម្ម ជំនាញលក់ និងយុទ្ធសាស្ត្រធ្វើទីផ្សារតាមបែបទំនើប ចំនេះដឹងទាំងអស់នេះ គឺជាការចែករំលែក ជួយដល់អាជីវកម្មរបស់យើងឲ្យ រីកចម្រើនទាំងអស់គ្នា” ។
ទន្ទឹមនឹងនេះ កាលពីខែមករា ឆ្នាំ ២០២២ BNI កម្ពុជា ក៏បានចាត់តាំងក្រុមហ៊ុន Comzone Asia ធ្វើជាដៃគូយុទ្ធសាស្ត្រ ដើម្បីជួយគាំទ្រ និងជំរុញការរីកចម្រើនរបស់ BNI កម្ពុជា ឲ្យក្លាយជាបណ្ដាញអាជីវកម្មឈានមុខគេនៅកម្ពុជា ។
BNI កម្ពុជា ដែលចាប់ផ្ដើមធ្វើប្រតិបត្តិការនៅកម្ពុជាតាំងពីឆ្នាំ ២០១៣ មកនោះ ក៏បានថ្លែងអំណរគុណដល់អ្នកឧបត្ថម្ភកម្មវិធី ដែលបានសម្រេចចិត្តចូលរួមនៅក្នុងកម្មវិធីកសាងបណ្ដាញអាជីវកម្មដ៏ធំបំផុតនេះដែរ ។
ក្នុងឆ្នាំ ២០២២ សមាជិករបស់ BNI កម្ពុជា មានចំនួន ១៧៩៩ សមាជិកដែលបែងចេញចេញជា ៤២ ក្រុម ។ ក្នុងឆ្នាំ ២០២២ នេះ សមាជិក បានផ្ដល់នូវឱកាសអាជីវកម្មឲ្យគ្នាទៅវិញទៅមក ចំនួនជាង ប្រមាណជាង ៩៧០០០ ឱកាសអាជីវកម្ម ដែលគិតជាទឹកប្រាក់មានចំនួន ជាង ៧៧ លានដុល្លារ ។
ចំនួននេះ មានការកើនឡើងបើធៀបនឹង ឆ្នាំ ២០២១ ដែលពេលនោះ សមាជិករបស់ BNI កម្ពុជា បានផ្ដល់នូវឱកាសអាជីវកម្មឲ្យគ្នាទៅវិញទៅមក ចំនួនជាង ៧ ម៉ឺនឱកាសអាជីវកម្ម ដែលគិតជាប្រាក់មានចំនួន ៥៦ លានដុល្លារ ។
សម្រាប់បណ្ដាញ BNI សកលលោកវិញ ក្នុងឆ្នាំ ២០២២ BNI មានវត្តមាននៅក្នុងប្រទេសចំនួន ៧៦ មានសមាជិកចំនួន ជិត ៣០ ម៉ឺននាក់ និងបានផ្ដល់នូវឱកាសអាជីវកម្មឲ្យគ្នាទៅវិញទៅមកគិតជាទឹកប្រាក់ប្រមាណ ១៩២០ លានដុល្លារសហរដ្ឋអាមេរិក ។
យោងតាមរបាយការណ៍ចេញផ្សាយដោយធនាគារអភិវឌ្ឍន៍អាស៊ី កាលពីខែមេសាកន្លងទៅនេះ ក្នុងឆ្នាំ ២០២២ នេះសេដ្ឋកិច្ចរបស់កម្ពុជាត្រូវបានព្យាករណ៍ថា នឹងមានកំណើនជាង ៥% ហើយក្នុងឆ្នាំ ២០២៣ នឹងកើនឡើងដល់ 6.5% បន្ទាប់ពីបានធ្លាក់អវិជ្ជមាន ក្នុងកម្រិត -៣,១% កាលពីឆ្នាំ ២០២០។ ការងើបឡើងវិញនូវកំណើនសេដ្ឋកិច្ចនេះ ក៏ដោយសារតែរដ្ឋាភិបាលបានដាក់ចេញនូវគោលនយោបាយនានាដើម្បីកាត់បន្ថយផលប៉ះពាល់ដោយសារជំងឺកូវីដ-១៩ ហើយបានឈានដល់ការបើកដំណើរការប្រទេស និងសកម្មភាពសេដ្ឋកិច្ចឡើងវិញកាលពីចុងឆ្នាំ ២០២១ ៕
