បើតាមរដ្ឋមន្ត្រីការបរទេសអាហ្រ្វិកខាងត្បូងលោកស្រី Naledi Pandor បាននិយាយកាលពីថ្ងៃពុធថា មេដឹកនាំ ក្រុមប្រទេស BRICS បានយល់ព្រមលើយន្តការសម្រាប់ពិចារណាសមាជិកថ្មី។ លោកស្រីថា មេដឹកនាំបានអនុម័តលើចំណុចដែលកំណត់គោលការណ៍ណែនាំ និងគោលការណ៍ដំណើរការសម្រាប់ពិចារណាប្រទេសដែលមានបំណងចង់ក្លាយជាសមាជិកនៃ ក្រុមប្រទេស BRICS ។
ទោះជាយ៉ាងណាក៏ដោយ មេដឹកនាំនៃក្រុមប្រទេស BRICS មិនទាន់បានចុះហត្ថលេខាលើក្របខ័ណ្ឌលើការចូលជាសមាជិកនៅឡើយទេ។
អត្ថបទគួរអាន
កិច្ចព្រមព្រៀងលើការបន្ថែមសមាជិកនេះ បានកំណត់ថានឹងអនុម័តបន្ទាប់ពីសម័យប្រជុំពេញអង្គនៅព្រឹកថ្ងៃពុធ ប៉ុន្តែ ត្រូវបានពន្យារពេលបន្ទាប់ពីនាយករដ្ឋមន្ត្រីឥណ្ឌាលោក Narendra Modi ណែនាំលក្ខណៈវិនិច្ឆ័យចូលជាសមាជិកថ្មី។
មន្ត្រីនៃក្រុមប្រទេស BRICS បាននិយាយសារព័ត៌មានអន្តរជាតិធំៗ ថា លក្ខណៈវិនិច្ឆ័យនៃការចូល ជាសមាជិកដែលលោកម៉ូឌី ស្នើឡើងជាថ្មីនោះ រួមមានការតម្រូវឱ្យសមាជិកដែលចង់ចូល គឺជាសមាជិកដែលមិនមែនជាគោលដៅនៃការដាក់ទណ្ឌកម្មអន្តរជាតិ និងមានកម្រិតផលិតផលក្នុងស្រុកសរុបអប្បបរមាខ្ពស់ផងដែរ។ ការកំណត់នេះ គេរំពឹងថានឹងផាត់ចោលប្រទេសអ៊ីរ៉ង់ និងវេណេស៊ុយអេឡាដែលមានបំណងចូលជាសមាជិកនៃប្លុកនេះ ព្រោះពួកគេត្រូវបានអន្តរជាតិដាក់ទណ្ឌកម្ម។
មន្ត្រីអាហ្រ្វិកខាងត្បូងបានឱ្យដឹងថា ប្រទេសជាង៤០បានបង្ហាញពីចំណាប់អារម្មណ៍ក្នុងការចូលរួមជាមួយ BRICS ហើយ២២ប្រទេសបានដាក់ពាក្យស្នើសុំជាផ្លូវការក្នុងការចូលជាសមាជិក។ ស្របពេលជាមួយគ្នា ទីប្រឹក្សាសន្តិសុខជាតិសេតវិមានលោក Jake Sullivan បាននិយាយថា BRICS នឹងមិនអាចក្លាយជាប្លុកគូប្រជែងភូមិសាស្ត្រនយោបាយរបស់សហរដ្ឋអាមេរិកទេ។
តំណាងឱ្យប្រមាណ២៣%នៃGDPពិភពលោក និង៤២%នៃប្រជាជនសកល ន១៦%នៃពាណិជ្ជកម្មរបស់ពិភពលោក BRICS កំពុងក្លាយជាប៉ូលសេដ្ឋកិច្ចមួយដែលនឹងប្រជែងជាមួយសណ្តាប់ធ្នាប់ដឹកនាំដោយលោកលិច។ បើតាមលោក Werner Hoyer ប្រធានធនាគារវិនិយោគអ៊ឺរ៉ុបបានព្រមានរដ្ឋាភិបាលលោកខាងលិចកាលពីថ្ងៃពុធថា បច្ចឹមលោកកំពុងស្ថិតក្នុងគ្រោះថ្នាក់នៃការបាត់បង់ទំនុកចិត្តពី«លោកខាងត្បូង» បើសិនពួកគេមិនបង្កើនកិច្ចខិតខំប្រឹងប្រែងគាំទ្រផ្ទាល់សម្រាប់ប្រទេសក្រីក្រទេនោះ៕
