យ៉ាងណាមិញ ប្រទេសកូរ៉េខាងត្បូងបាននិយាយកាលពីថ្ងៃទី ០៦ ខែ មីនា ឆ្នាំ២០២៣ថា ក្រុមហ៊ុនរបស់ខ្លួននឹងផ្តល់សំណងដល់មនុស្សដែលត្រូវបានបង្ខំឱ្យធ្វើការនៅក្រោមការកាន់កាប់របស់ប្រទេសជប៉ុនពីឆ្នាំ ១៩១០ ដល់ឆ្នាំ១៩៤៥ ក្នុងគោលបំណងធ្វើឱ្យប្រសើរឡើងនូវទំនាក់ទំនងមិនល្អ ដែលបានរារាំងពាណិជ្ជកម្ម និងកិច្ចសហប្រតិបត្តិការរវាងប្រទេសទាំងពីរ។
សំណើនេះត្រូវបានស្វាគមន៍ដោយទីក្រុងតូក្យូ ប៉ុន្តែបានប្រឈមមុខនឹងប្រតិកម្មភ្លាមៗពីជនរងគ្រោះមួយចំនួន និងគណបក្សប្រឆាំងដ៏សំខាន់របស់កូរ៉េខាងត្បូង ដែលបានចោទប្រកាន់រដ្ឋាភិបាលថា បានធ្វើឲ្យប្រទេសចាញ់ច្រាប ឬឱនក្បាលដាក់ប្រទេសជប៉ុន។
មែនទែនទៅ ការខ្វែងគំនិតគ្នារវាងកូរ៉េខាងត្បូង និងជប៉ុន លើបញ្ហាការងារ និងស្ត្រីដែលត្រូវបានបង្ខំឲ្យធ្វើការនៅផ្ទះបនបម្រើកងទ័ពជប៉ុនកាលពីសម័យមុននោះ បានធ្វើឱ្យទំនាក់ទំនងរវាងប្រទេសទាំងពីរ មានវិបត្តិអស់រយៈពេលជាច្រើនឆ្នាំមកហើយ ប៉ុន្តែប្រធានាធិបតីកូរ៉េខាងត្បូង លោក Yoon Suk Yeol បានកំពុងតែខិតខំនិង ជំរុញឱ្យកែលម្អទំនាក់ទំនងនេះឡើងវិញ។
លោក Park Jin ដែលជារដ្ឋមន្ត្រីការបរទេសកូរ៉េខាងត្បូង បានប្រាប់សន្និសីទកាសែតដ៏ខ្លីមួយថា នៅក្រោមផែនការនេះ រដ្ឋាភិបាលកូរ៉េខាងត្បូងនឹងផ្តល់សំណងដល់អតីតកម្មករ ដែលត្រូវបានបង្ខំឲ្យធ្វើការ តាមរយៈមូលនិធិសាធារណៈដែលមានស្រាប់ ដែលផ្ដល់ដោយក្រុមហ៊ុនឯកជន ។
លោក Park បាននិយាយថា “ ទំនាក់ទំនងកូរ៉េខាងត្បូងនិងជប៉ុនដ៏ជូរចត់ មិនគួរត្រូវបានធ្វេសប្រហែសទៀតទេ ហើយយើងត្រូវបញ្ចប់វដ្តដ៏កាចសាហាវ ដើម្បីផលប្រយោជន៍ជាតិ សម្រាប់ប្រជាជន"។
អត្ថបទគួរអាន
លោកក៏បានបញ្ជាក់ដោយសង្ឃឹមថា ប្រទេសជប៉ុននឹងឆ្លើយតបដោយស្មោះ រួមទាំង អនុវត្តសេចក្តីថ្លែងការណ៍ជាសាធារណៈពីមុនរបស់ខ្លួន ដែលបង្ហាញពីវិប្បដិសារី និងការសុំទោស ចំពោះអ្វីដែលកើតឡើងកាលពីអតីត។
បន្ទាប់ពីការសម្រេចនេះ នាយករដ្ឋមន្ត្រីជប៉ុន លោក Fumio Kishida បាននិយាយថា លោកស្វាគមន៍ចំពោះសំណើនេះ ហើយបានបន្ត ថា លោកនឹងធ្វើការយ៉ាងជិតស្និទ្ធជាមួយ Yoon Suk Yeol ។
រដ្ឋមន្ត្រីការបរទេសជប៉ុនលោក Yoshimasa Hayashi បាននិយាយថា ក្រុមហ៊ុនជប៉ុននឹងមិនត្រូវបានគេរំពឹងថា នឹងធ្វើការបង់ប្រាក់ណាមួយនៅក្រោមផែនការនេះទេ ប៉ុន្តែក៏នឹងមិន រារាំងការបរិច្ចាគណាមួយប្រសិនបើកូរ៉េខាងត្បូងចង់បាន។
លោក Yoshimasa បានថ្លែងថា ជប៉ុនស្វាគមន៍ផែនការរបស់កូរ៉េខាងត្បូង ហើយថា នេះជាជំហានមួយដែលធ្វើឲ្យទំនាក់ទំនងជប៉ុននិងកូរ៉េខាងត្បូងមានស្ថានភាពល្អប្រសើរឡើងវិញ ។
សូមបញ្ជាក់ថា ទំនាក់ទំនងមិនល្អរវាងប្រទេសជប៉ុន និងកូរ៉េខាងត្បូង គឺជាចំណុចនៃក្តីបារម្ភសម្រាប់សហរដ្ឋអាមេរិក ដែលជាបងធំនៃប្រទេសទាំងពីរ ដ្បិថា ទីក្រុងវ៉ាស៊ិនតោន កំពុងស្វែងរកការបង្ហាញពីស្មារតីរួបរួមបន្ថែមទៀតជាមួយសម្ព័ន្ធមិត្តរបស់ខ្លួនប្រឆាំងនឹងការកើនឡើងនូវឥទ្ធិពលទាំងសេដ្ឋកិច្ចនិងយោធារបស់ប្រទេសចិន និងការគំរាមកំហែងដោយអាវុធនុយក្លេអ៊ែរ របស់កូរ៉េខាងជើង៕
