ការរកឃើញរបស់ Pfizer និង BioNTech បានបង្ហាញថា អ្នកដែលបានចាក់វ៉ាក់សាំងចំនួន ២ ដូសអាចការពារប្រឆាំងនឹងជំងឺធ្ងន់ធ្ងរពីមេរោគដើមបាន ប៉ុន្តែសម្រាប់មេរោគ អូមីក្រុង ការចាក់ ២ ដូស អាចការពារបានតែមួយផ្នែកប៉ុណ្ណោះ។ ប៉ុន្ដែ តាមការធ្វើតេស្តចុងក្រោយនេះ បានឱ្យដឹងថា មេរោគ អូមីក្រុង ត្រូវបានបន្សាបយ៉ាងមានប្រសិទ្ធភាព តាមរយៈការចាក់ដូសទី៣ ដោយវានឹងជួយបង្កើនការការពារការឆ្លងមេរោគ បំប្លែងថ្មីនេះ។
ទោះយ៉ាងណា ប្រសិនបើចាំបាច់ ក្រុមហ៊ុននេះ អាចនឹងអភិវឌ្ឍការផលិតវ៉ាក់សាំងដែលត្រូវបាន កំណត់គោលដៅជាពិសេសទៅលើមេរោគ អូមីក្រុង ក្នុងខែមីនា ឆ្នាំ ២០២២។ គួរឱ្យដឹងដែរថា ក្រុមហ៊ុន Pfizer និង BioNTech ជាអ្នកផលិតវ៉ាក់សាំងកូវីដ១៩ ដំបូងគេ ដែលបង្ហាញជាផ្លូវការអំពីប្រសិទ្ធភាពនៃការចាក់វ៉ាក់សាំងរបស់ពួកគេប្រឆាំងនឹង មេរោគ អូមីក្រុង។
ទន្ទឹមនេះ ក្រុមហ៊ុនបាននិយាយថា ពួកគេនឹងបន្តកិច្ចខិតខំប្រឹងប្រែង ដើម្បីនាំយកវ៉ាក់សាំងបង្ការមេរោគអូមីក្រុងដើម្បីផ្គត់ផ្គង់នាពេលឆាប់ៗនេះ។ ជាក់ស្ដែង ក្រុមហ៊ុននឹងរួចរាល់ក្នុងការផលិតវ៉ាក់សាំងថ្មីប្រមាណពី ២៥ ទៅ ៧៥ លានដូសជាលើកដំបូងក្នុងខែមីនាខាងមុខនេះ។
រហូតមកទល់ពេលនេះ មិនទាន់មានទិន្នន័យសំខាន់ណាមួយ ដែលបញ្ជាក់ថា ក្រុមហ៊ុន Moderna, Johnson & Johnson និង អ្នកផលិតវ៉ាក់សាំងដទៃទៀត បានបង្ហាញអំពីលទ្ធផលតេស្តវ៉ាក់សាំងរបស់ពួកគេថា អាចការពារទប់ទល់នឹងមេរោគថ្មីនេះនៅឡើយទេ ប៉ុន្តែពួកគេរំពឹងថា នឹងបញ្ចេញទិន្នន័យ ក្នុងរយៈពេលប៉ុន្មានសប្តាហ៍ខាងមុខទៀត។
អត្ថបទគួរអាន
សូមបញ្ជាក់ថា គិតត្រឹមថ្ងៃទី ០៨ ខែធ្នូ មេរោគបំប្លែងថ្មី ត្រូវបានអង្គការសុខភាពពិភពលោកអះអាងថា បានឆ្លងរាលដាលទៅដល់ប្រទេសចំនួន៥៧ប្រទេសហើយ អ្នកជំងឺដែលសម្រាកព្យាបាលនៅមន្ទីរពេទ្យក៏ត្រូវបានគេរំពឹងថា នឹងកើនឡើងកាន់តែច្រើនថែមទៀត ខណៈដែលមេរោគប្រភេទថ្មីនេះ កំពុងចរាចរចម្លងយ៉ាងលឿនរហ័ស។ តួយ៉ាងនៅអាហ្វ្រិកខាងត្បូងរកឃើញអ្នកឆ្លងមេរោគបំប្លែងថ្មីអូមីក្រុងជាង ៦ម៉ឺននាក់ហើយ៕
អត្ថបទ៖ ស៊ើង និមល់
None
