តើមានកត្តាអ្វីខ្លះដែលអាចទាញទម្លាក់ការនាំចេញផលិតផលកសិកម្មរបស់វៀតណាម ឱ្យធ្លាក់ចុះនៅឆ្នាំនេះ?
ទីផ្សារសំខាន់ៗសម្រាប់ផលិតផលកសិកម្មរបស់វៀតណាម ដូចជាចិន សហរដ្ឋអាម៉េរិក និងកោះតៃវ៉ាន់ជាដើម បានបង្កើនការរឹតបន្តឹងលើបទបញ្ញត្តិនាំចូលកាន់ត…
ការកំណត់ពន្ធថ្មីរបស់សហរដ្ឋអាម៉េរិក លើការនាំចូលទំនិញពីប្រទេសម៉ិកស៊ិក និងកាណាដា ចំនួន២៥% និងចិន១០% ត្រូវបានគេប៉ាន់ប្រមាណថា នឹងបង្កផលប៉ះពាល់ខ្លាំងលើខ្សែច្រវាក់ផ្គត់ផ្គង់ពិភពលោក ដោយក្នុងនោះគ្រាន់តែឧស្សាហកម្មរថយន្តមួយ អាម៉េរិកអាចប្រឈមមុខនឹងការខាតបង់ប្រាក់ចំណូលរាប់រយរាប់ពាន់លានដុល្លារ។ ការហ៊ានប៉ាន់ប្រមាណបែបនេះធ្វើឡើងដោយឈរលើមូលដ្ឋាននៃទំនាក់ទំនងរវាងឧស្សាហកម្មរថយន្តកាណាដា និងម៉ិកស៊ិក ជាមួយនឹងទីផ្សារនៅសហរដ្ឋអាម៉េរិកផ្ទាល់។
ការិយាល័យស្ថិតិពាណិជ្ជកម្មអាម៉េរិក បានបង្ហាញថា នៅក្នុងរយៈពេល១១ខែ ឆ្នាំ២០២៤ ម៉ិកស៊ិចជាប្រភពនាំចូលរថយន្ត និងគ្រឿងបន្លាស់រហូតដល់ទៅ២៧% ខណៈទីផ្សារកាណាដា បានស្រូបទាញប្រមាណ១២%។ ពាក់ព័ន្ធនឹងទីផ្សារថយន្តនេះដែរ ក្រុមហ៊ុន S&P Global Mobility បានឲ្យដឹងថា ២២%នៃរថយន្តដែលលក់នៅក្នុងទីផ្សារអាម៉េរិក គឺផលិតនៅម៉ិកស៊ិក និងកាណាដា។
លោក អានីនយ៉ា ដាស (Anindya Das) អ្នកវិភាគនៅក្រុមហ៊ុន Nomura Securities បានប៉ាន់ប្រមាណថា ពន្ធដែលកំណត់ជាពិសេសលើប្រទេសទាំង៣ដោយសហរដ្ឋអាម៉េរិក អាចនឹងរំជើបរំជួលដល់ទីផ្សាររថយន្ត និងគ្រឿងបន្លាស់នៅសហរដ្ឋអាម៉េរិក ដែលគេដឹងថា មានទំហំប្រមាណ៣៣ពាន់លានដុល្លារ។
បើយោងតាមការចុះផ្សាយរបស់សារព័ត៌មាន The Strait Time ការកំណត់ពន្ធថ្មីនេះអាចនឹងធ្វើឲ្យរថយន្តនៅអាម៉េរិកឡើងថ្លៃមួយគ្រឿងប្រមាណ៣ពាន់ដុល្លារ។ ជាទូទៅនៅក្នុងមួយឆ្នាំសហរដ្ឋអាម៉េរិកត្រូវការរថយន្តថ្មីប្រមាណ១៦លានគ្រឿង ហើយទំហំនៃការនាំចូលរថយន្តដើម្បីបំពេញតម្រូវការទីផ្សារនេះមានទំហំសរុបរហូតដល់២២៥ពាន់លានដុល្លារ៕
ដោយៈ សរ សុជាតិ
