កសិករដាំស្វាយចន្ទីមួយចំនួន ត្អូញត្អែរពីការធ្លាក់ចុះទិន្នផល និងតម្លៃស្វាយចន្ទីនៅឆ្នាំនេះ

លោក តុប វ៉ាន់ឌី កសិករដាំស្វាយចន្ទីមួយរូបនៅស្រុកចំការលើ ខេត្តកំពង់ចាម បានប្រាប់ខេមបូណូមីសថា ដំណាំស្វាយចន្ទីរបស់លោកនៅឆ្នាំនេះទទួលបានទិន្នផលតិចជាងបណ្ដាឆ្នាំមុនៗដោយសារបញ្ហាអាកាសធាតុក្ដៅបានធ្វើឱ្យផ្កាស្វាយចន្ទីក្រៀម និងពុំសូវកាន់ផ្លែ។ ទន្ទឹមនឹងទិន្នផលធ្លាក់ចុះ តម្លៃគ្រាប់ស្វាយចន្ទីនៅឆ្នាំក៏មានការធ្លាក់ចុះដូចគ្នាដែរ ពោលគឺបច្ចុប្បន្នឈ្មួញហ៊ានឱ្យតម្លៃតែ៤ពាន់៦០០រៀលតែប៉ុណ្ណោះក្នុងមួយគីឡូក្រាម។ បើតាមការអះអាងរបស់កសិកររូបនេះ តម្លៃក្នុងកម្រិតប៉ុណ្ណេះមិនត្រឹមតែមិនបានផ្តល់ប្រាក់ចំណេញនោះទេ ថែមទាំងអាចធ្វើឱ្យលោកប្រឈមនឹងការខាតបង់ទៀតផង ដ្បិតការចំណាយលើការដាំដុះ និងថែទាំមានការកើនឡើង តែទិន្នផលទទួលបានតិចតួច។ កសិករូបនេះជឿជាក់ថា ប្រសិនបើបញ្ហានេះមិនត្រូវបានដោះស្រាយទេនោះ អាចនឹងធ្វើឱ្យកសិករមួយចំនួនធំនឹងងាកពីការដាំស្វាយចន្ទីទៅដាំដំឡូងមីជំនួសវិញជាក់ជាមិនខាន។

​ស្រដៀងគ្នានេះលោក ណុក ប៊ុនថន ម្ចាស់ចម្ការស្វាយចន្ទីម្នាក់នៅខេត្តកំពង់ធំ បានអះអាងថា អាកាសធាតុក្ដៅខ្លាំងបានធ្វើឱ្យចម្ការស្វាយចន្ទីរបស់លោកនៅឆ្នាំនេះពុំសូវផ្លែនោះទេ ហើយតម្លៃ ក៏ពុំសូវបានខ្ពស់នោះដែរ។ កសិកររូបនេះព្យាករថា ចម្ការស្វាយចន្ទីរបស់លោកនៅឆ្នាំនេះអាចបាត់ទិន្នផលប្រហែល៣០% ហើយក៏មិនអាចទទួលផលចំណេញដូចឆ្នាំមុនដែរ ដោយសារហាងឆេងគ្រាប់ស្វាយចន្ទីបានធ្លាក់ចុះ ស្របពេលម្ចាស់ចម្ការមួយចំនួនបានចំណាយថវិកាអស់ច្រើនលើការថែទាំ។

​មិនខុសគ្នាពីកសិករទាំងពីររូបខាងលើនោះទេ លោក ទៀង ប៉េងអាន ម្ចាស់ចម្ការស្វាយចន្ទីប្រមាណ២០ហិកតា នៅស្រុកសន្ទុក ខេត្តកំពង់ធំ បានឱ្យដឹងដែរថា នៅឆ្នាំនេះកសិករភាគច្រើនពិតជាប្រឈមនឹងបញ្ហាអាកាសធាតុ និងការធ្លាក់ថ្លៃគ្រាប់ស្វាយចន្ទីពិតប្រាកដមែន។ ប៉ុន្តែសម្រាប់រូបលោកវិញមិនសូវជាប្រឈមខ្លាំងនោះឡើយ ដោយសារតែឆ្នាំនេះ ចម្ការរបស់លោកទទួលបានទិន្នផល និងលក់បានតម្លៃសមរម្យក្នុងពេលប្រមូលផលនៅដើមដៃ។ កត្តាដែលធ្វើឱ្យចម្ការស្វាយចន្ទីរបស់លោកមិនសូវជួបបញ្ហាប្រឈមដូចគ្នា គឺដោយសារលោកតែងចូលរួមសិក្សាស្វែងយល់ពីដំណាំស្វាយចន្ទីជាមួយអ្នកជំនាញ និងចូលរួមទទួលការបណ្ដុះបណ្ដាលជាមួយសហគមន៍ជាបន្តបន្ទាប់។

​សមាគមស្វាយចន្ទីកម្ពុជាបានព្យាករថា ទិន្នផលស្វាយចន្ទីនាឆ្នាំ២០២៤នេះ នឹងថយចុះចន្លោះពី១០% ទៅ៣០% បើធៀបនឹងឆ្នាំ២០២៣។ ការថយចុះនេះ គឺដោយសារតែបាតុភូតអែលនីណូបានបង្កផលប៉ះពាល់លើផលិតកម្មស្វាយចន្ទីក្នុងប្រទេសកម្ពុជា។ ទន្ទឹមនឹងផលប៉ះពាល់ ដែលនឹងធ្វើឱ្យទិន្នផលស្វាយចន្ទីមានការថយចុះ សមាគមស្វាយចន្ទីកម្ពុជា ក៏បានណែនាំដល់កសិករ ដែលមានធនធានសមរម្យគួរហាលគ្រាប់ស្វាយចន្ទីទុកលក់នាពេលខាងមុខផងដែរ៕