ការស្នើសុំដូចនេះ ក៏ដោយសារតែ ប្រាក់ចំណូលរបស់កាស៊ីណូទាំងអស់ បានធ្លាក់ចុះខ្លាំងដោយសារតែកង្វះភ្ញៀវទេសចរបរទេស ចូលលេងល្បែងក្នុងកាស៊ីណូ ចំពេលមានការរឹតត្បិតការហោះហើរ ដោយសារវិបត្តិកូវីដ១៩។
រដ្ឋាភិបាលវៀតណាម បានចាត់ទុកការលេងល្បែងស៊ីសងថាជា អំពើបំផ្លាញសង្គម និងបានហាមឃាត់ជនជាតិវៀតណាមមិនឲ្យចូលកាស៊ីណូនោះទេ។ តែយ៉ាងណាមិញ នៅខែមករាឆ្នាំ ២០១៩កន្លងទៅ វៀតណាមបានចាប់ផ្តើមការសាកល្បងរយៈពេល ៣ ឆ្នាំដើម្បីបើកអនុញ្ញាតកាស៊ីណូមួយចំនួន ឲ្យពលរដ្ឋវៀតណាមបានចូលលេងល្បែងបាន។
ប៉ុន្តែវិធានការនេះ មិនបានគ្រប់ដណ្តប់លើគ្រប់កាស៊ីណូទាំងអស់នៅវៀតណាមនោះទេ។ មានតែកាស៊ីណូមួយចំនួនតូចប៉ុណ្ណោះ ដែលអនុញ្ញាតឲ្យជនជាតិវៀតណាមបានចូលកម្សាន្ដ។ ដូច្នេះហើយ ទើបធ្វើឲ្យម្ចាស់កាស៊ីណូផ្សេងទៀតកើតទុកមិនសុខចិត្តស្នើដល់រដ្ឋាភិបាលបើកអនុញ្ញាតឲ្យពលរដ្ឋក្នុងស្រុកចូលលេងល្បែងក្នុងកាស៊ីណូររបស់ខ្លួនដែរ។
អត្ថបទទាក់ទង
សូមជម្រាបថា ច្បាប់ដែលអនុញ្ញាតឲ្យពលរដ្ឋវៀតណាមចូលលេងល្បែងក្នុងកាស៊ីណូមួយចំនួនបាន គឺតឹងរឹងជាទីបំផុត។ អ្នកចូលលេង តម្រូវឲ្យមានអាយុលើស២១ឆ្នាំ និងមានប្រាក់ចំណូលលើសពី ៤៣០ដុល្លារក្នុងមួយខែ ថែមទាំងតម្រូវឲ្យមានភាពស្អាតស្អំ ពោលគឺមិនអនុញ្ញាតឲ្យអ្នកធ្លាប់ប្រព្រឹត្តបទល្មើសឬធ្លាប់ជាប់ពន្ធនាគារចូលលេងនោះទេ។ លើសពីនេះ ដើម្បីអាចចូលលេងល្បែងក្នុងកាស៊ីណូបាន ត្រូវបង់ថ្លៃ ៤៣ដុល្លារសម្រាប់ការចូលលេងមួយថ្ងៃ និង១ពាន់ដុល្លារសម្រាប់ការលេង១ខែ។
សូមបញ្ជាក់ថា បើតាមទិន្នន័យនៃក្រសួងហិរញ្ញវត្ថុវៀតណាម នៅទូទាំងប្រទេសនេះ មានកាស៊ីណូតែ៨កន្លែងប៉ុណ្ណោះ ហើយបានរកប្រាក់ចំណូលចូលរដ្ឋ សរុបប្រមាណជាង១០០លានដុល្លារអាមេរិកប៉ុណ្ណោះកាលពីឆ្នាំ២០១៩។ ក្នុងនោះដែរ កាស៊ីណូឈ្មោះកូរ៉ូណានៅកោះភូកុក ឬកោះត្រល់ គឺជាកាស៊ីណូដំបូងគេនៅវៀតណាមដែលបើកឲ្យពលរដ្ឋក្នុងស្រុកចូលលេង ដែលមានអ្នកចូលលេងប្រហែល៤៥% នៃអ្នកចូលលេងល្បែងកាស៊ីណូទាំងអស់នៅឆ្នាំ២០១៩៕
None
