កិច្ចប្រជុំនេះរៀបចំឡើងក្នុងគោលបំណង ដើម្បីស្តាប់ពីកង្វល់ និងបញ្ហាប្រឈមនានារបស់ក្រុមហ៊ុនអភិវឌ្ឍន៍លំនៅឋាន សំដៅដើម្បីស្វែងរកដំណោះស្រាយ ក៏ដូចជាសុំការអន្តរាគមន៍ពីរាជរដ្ឋាភិបាល និងក្រសួងស្ថាប័នពាក់ព័ន្ធ។
លោកអ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ គ្រុប និងជាប្រធានសមាគមអ្នកអភិវឌ្ឍន៍លំនៅឋានកម្ពុជា បានគូសបញ្ជាក់ថា សមាគមអ្នកអភិវឌ្ឍន៍លំនៅឋានកម្ពុជា នឹងបង្កើតគណៈកម្មការបច្ចេកទេសត្រួតពិនិត្យសំណង់ និងគណៈកម្មការដោះស្រាយបញ្ហាប្រឈមនានា ដើម្បីរួមចំណែកជួយលើកកម្ពស់វិស័យសំណង់ ក៏ដូចជាដើម្បីដោះស្រាយបញ្ហាប្រឈមនានា ក្នុងវិស័យអចលនទ្រព្យផ្នែកអភិវឌ្ឍន៍លំនៅឋាននៅកម្ពុជា។ បើតាមការអះអាងរបស់ថ្នាក់ដឹកនាំរូបនេះ គណៈកម្មការដែលនឹងបង្កើតឡើងនៅខែធ្នូ ខាងមុខនេះ នឹងដើរតួនាទីជួយសម្របសម្រប ក៏ដូចជាផ្តល់ការពិគ្រោះផ្នែកច្បាប់ផ្សេងៗដល់ក្រុមហ៊ុនជាសមាជិកក្រុមហ៊ុនក្នុងការដោះស្រាយបញ្ហាប្រឈមនានា ដែលកើតមានជាមួយអតិថិជន ក៏ដូចក្រសួងស្ថាប័នរដ្ឋ។
ពាក់ព័ន្ធវិស័យសំណង់នេះដែរ កាលពីថ្ងៃទី២៤ ខែវិច្ឆិកា ឆ្នាំ២០២៤ លោកអ្នកឧកញ៉ា លី ហួរ បានកោះប្រជុំបន្ទាន់មួយជាមួយក្រុមហ៊ុនសមាជិករបស់សមាគមអ្នកអភិវឌ្ឍន៍លំនៅឋានកម្ពុជា ដើម្បីស្តាប់ពីកង្វល់ និងបញ្ហាប្រឈមនានា ដែលក្រុមហ៊ុនអភិវឌ្ឍន៍កំពុងជួបប្រទះ សំដៅដើម្បីស្វែងរកដំណោះស្រាយជូនក្រុមហ៊ុនជាសមាជិក ក៏ដូចជាអតិថិជនរបស់ពួកគេ។
អត្ថបទគួរអាន
បន្ទាប់ពីបានស្តាប់បញ្ហាប្រឈមនានារបស់ក្រុមហ៊ុន លោកអ្នកឧកញ៉ា លី ហួរ បានផ្តល់ជាគំនិតដំណោះស្រាយមួយចំនួន ហើយបញ្ហាមួយចំនួនទៀតត្រូវបាន លោកអ្នកឧកញ៉ា សន្យានឹងយកទៅពិគ្រោះដោះស្រាយជាមួយក្រសួង-ស្ថាប័នពាក់ព័ន្ធផ្សេងៗ។
ក្រៅពីបញ្ហាប្រឈមនានា ការកោះប្រជុំបន្ទាន់នេះ ក៏ដើម្បីចង់ដឹងពីទំហំទឹកប្រាក់ ដែលអតិថិជនកំពុងបង់រំលស់ជាមួយក្រុមហ៊ុនទាំងនោះផងដែរ ដ្បិតថា ក្រសួងរៀបចំដែនដី នគរូបនីយកម្មនិងសំណង់រួមជាមួយភាគីពាក់ព័ន្ធ ព្រមទាំងសមាគមអ្នកអភិវឌ្ឍន៍លំនៅឋានកម្ពុជា កំពុងសិក្សាលទ្ធភាពក្នុងការប្រើវិធីសាស្ត្រ ដោយបង្វែឱ្យអតិថិជនបង់រំលស់ជាមួយធនាគារ ហើយធនាគារផ្តល់ប្រាក់សុទ្ធដល់ក្រុមហ៊ុនអភិវឌ្ឍន៍។
បើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ នៅក្នុងឆ្នាំ២០២៤នេះ អនុម័តលើគម្រោងវិនិយោគទូទាំងប្រទេសចំនួន២,៦២២គម្រោង ដែលមានតម្លៃប៉ាន់ស្មានទុនវិនិយោគប្រមាណជាង៤ពាន់៣រយលានដុល្លារ ថយចុះប្រមាណជាង១៥% បើធៀបនឹងឆ្នាំ២០២៣ ដែលមានតម្លៃប៉ាន់ស្មានទុនវិនិយោគប្រមាណជាង៥ពាន់១រយលានដុល្លារ ជាមួយគម្រោងសំណង់ចំនួន២,៩២៤គម្រោង។
គិតចាប់ពីឆ្នាំ២០០០ ដល់ឆ្នាំ២០២៤ ក្រសួងរៀបចំដែនដី នគរូបនីយកម្ម និងសំណង់ បានចេញលិខិតអនុញ្ញាតសាងសង់ទូទាំងប្រទេសជាង៦ម៉ឺន៧ពាន់គម្រោង ដោយមានទុនទុនវិនិយោគប្រមាណជិត៧៩ពាន់លានដុល្លារ៕
