ហាងឆេងមាសនៅលើទីផ្សារអន្តរជាតិ បានហក់ឡើងថ្លៃខ្លាំងមិនធ្លាប់មានជាប្រវត្តិសាស្ត្រនៅឆ្នាំ២០២៥ នេះ ដោយសារតម្រូវការមាននៅទូទាំងពិភពលោកកើនឡើងខ្លាំង ជាពិសេសការសម្រុកទិញចូលមាសពីសំណាក់ធនាគារកណ្ដាលនៃប្រទេសនានា។ អ្វីដែលជាការកត់សម្គាល់ខ្លាំងជាងគេឃើញថា ធនាគារកណ្តាលរបស់ចិន ដែលមានប្រជាជនសរុបជាង ១,៤ពាន់លាននាក់ និងធនាគារកណ្ដាលឥណ្ឌា បានសម្រុកទិញចូលមាសយ៉ាងគំហុកខ្លាំងជាងគេ ដោយសារហេតុផលចម្បងមួយចំនួនរួមមាន ដើម្បីទប់ទល់នឹងអតិផរណា និងហានិភ័យភូមិសាស្ត្រនយោបាយ និងកាត់បន្ថយការពឹងផ្អែកលើប្រាក់ដុល្លារអាម៉េរិក។
ទិន្នន័យបានបង្ហាញថា ធនាគារកណ្តាលរបស់ប្រទេសចិន បានទិញចូលមាសរហូតដល់ទៅប្រមាណ៣៩,២តោន គិតពីដើមឆ្នាំ២០២៥ មកទល់ពេលនេះ ដែលធ្វើឱ្យមាសបម្រុងសរុបរបស់ប្រទេសនេះ ឈានដល់ជិត២,៣០០តោន។ ប្រទេសនេះ មានគោលបំណងធ្វើពិពិធកម្មឆ្ងាយពីប្រាក់ដុល្លាអាម៉េរិក និងការពារទ្រព្យសកម្មរបស់ខ្លួនពីអស្ថិរភាពក្នុងពិភពលោក។
ទន្ទឹមនេះ ប្រទេសឥណ្ឌា ក៏សម្រុកទិញចូលមាសយ៉ាងគំហុកដូចគ្នាដែរ ដោយធនាគារកណ្ដាលនៃប្រទេសឥណ្ឌា ពេលនេះកាន់កាប់មាសដល់ទៅ៨៨០តោននៅក្នុងទុនបម្រុងអន្តរជាតិរបស់ខ្លួន ដោយកើនឡើងជិត៥៨% នៅមួយទសវត្សរ៍កន្លងមកនេះ ដោយមាសមានចំណែកគ្របដណ្ដប់រហូតដល់ទៅ១១,៧% នៃទុនបម្រុងអន្តរជាតិ របស់ប្រទេសនេះ។
ក្រុមអ្នកជំនាញបានលើកឡើងថា ប្រទេសទាំងពីរនេះចាត់ទុកមាសជាទ្រព្យសកម្មដ៏មានសុវត្ថិភាព អព្យាក្រឹត និងស្ថិរភាព ដែលជួយធានាស្ថិរភាពសេដ្ឋកិច្ចរបស់ពួកគេចំពេលពិភពលោកកំពុងក្រឡាប់ចាក់៕
ដោយ: តែម សុខុម
