ប្រភពព័ត៌មានដដែលនេះ បានធ្វើការដកស្រង់ខ្លឹមសារ ដែលចុះផ្សាយដោយកាសែតរដ្ឋចិន Xinhua ថា លោកប្រធានាធិបតីចិន Xi Jinping បានចុះហត្ថលេខាលើបទបញ្ជាថ្មីមួយដោយបង្គាប់ឲ្យប្រើប្រាស់ច្បាប់ស្តីពីការបោះឆ្នោតថ្មី សម្រាប់តំបន់រដ្ឋបាលស្វយ័តពិសេស ហុងកុងរបស់ចិន ចាប់ពីថ្ងៃនេះតទៅ។
ច្បាប់ស្តីពីការបោះឆ្នោតថ្មីនេះ ត្រូវបានស្នើឡើង និងអនុម័តដោយសំឡេងច្រើនលើសលុបក្នុងអង្គប្រជុំសភាប្រជាជនចិន កាលពីថ្ងៃទី ៥ ខែមីនាកន្លងទៅថ្មីៗនេះ។ ច្បាប់នេះ ត្រូវបានកែប្រែ ដោយបានបញ្ចូលនូវឧបសម្ព័ន្ធថ្មីជាច្រើន ដែលអាចអនុញ្ញាតឲ្យរដ្ឋាភិបាលក្រុងប៉េកាំងមានឥទ្ធិពលចូលទៅគ្រប់គ្រងលើការបោះឆ្នោតរបស់តំបន់រដ្ឋបាលស្វយ័តពិសេសមួយនេះ។
ឧបសម្ព័ន្ធថ្មីៗទាំងនោះរួមមាន ការបន្ថែមអាសនៈអ្នកតំណាងរាស្ត្រក្នុងសភាហុងកុង ដែលធ្លាប់មានសមាជិកចំនួន៧០រូប នឹងត្រូវបង្កើនដល់៩០រូប ដោយក្នុងនោះ មានតែ ២០រូបប៉ុណ្ណោះ ត្រូវបានជ្រើសរើសចេញពីការបោះឆ្នោតជាសាធារណៈ ដោយប្រជាជនហុងកុង ហើយ៤០រូបផ្សេងទៀត នឹងត្រូវចាត់តាំងដោយគណៈកម្មការបោះឆ្នោត ដែលរៀបចំឡើងដោយរដ្ឋាភិបាលក្រុងប៉េកាំងតែម្តង ស្របពេលដែល ៣០រូបផ្សេងទៀតជាអ្នកតំណាងរាស្ត្រដែលតំណាងឲ្យវិស័យនានាភាគច្រើនជាអ្នកមានឥទ្ធិពលលើចរន្តសេដ្ឋកិច្ចចិន។
អត្ថបទទាក់ទង
គួររំឭកផងដែរថា គ្រាដែលមិនទាន់មានការកែប្រែច្បាប់បោះឆ្នោតនេះ សភាហុងកុងមានអាសនៈតែ៧០ប៉ុណ្ណោះ ក្នុងនោះ អ្នកតំណាងរាស្ត្រដែលកើតចេញពីការបោះឆ្នោតដោយពលរដ្ឋមានដល់ ៤០នាក់ ប៉ុន្ដែច្បាប់ថ្មីៗនេះ តម្រូវឲ្យមានតែ ២០នាក់ប៉ុណ្ណោះ។
ជុំវិញទៅនឹងច្បាប់ថ្មីនេះ ក៏មានការលើកឡើងដែរថា ចាប់ពីពេលនេះតទៅ សំឡេងរបស់បក្សប្រឆាំងហុងកុង និងសំឡេងរបស់អ្នកដែលគាំទ្រលទ្ធិប្រជាធិបតេយ្យ ដែលត្រូវគេបិទខ្ទប់ លែងឲ្យមានតទៅទៀតហើយនៅហុងកុង ពោលច្បាប់ថ្មីនេះនឹងចូលមករុញច្រានក្រុមអ្នកគាំទ្រប្រជាធិបតេយ្យ ឲ្យនៅក្រៅសង្វៀន នយោបាយនៅហុងកុង ព្រោះថា ចង់ ឬមិនចង់ អ្នកដែលគាំទ្រលទ្ធិប្រជាធិបតេយ្យហុងកុង ដែលរិះគន់ រដ្ឋអំណាចចិន នឹងគ្មានថ្ងៃបានទទួលការអនុញ្ញាតឲ្យឈរឈ្មោះ ក្នុងការបោះឆ្នោតសភាហុងកុងនោះទេ។
តាមរយៈច្បាប់ថ្មី ធ្វើកំណែទម្រង់ការបោះឆ្នោតនៅហុងកុងនេះដែរ ត្រូវបានគេមើលឃើញថា រដ្ឋាភិបាលទីក្រុងប៉េកាំង ចង់លើកបន្តុប ឲ្យមានតែអ្នកដែលគាំទ្ររដ្ឋអំណាចចិនប៉ុណ្ណោះ នៅក្នុងស្ថាប័នច្បាប់ និងរដ្ឋបាលដឹកនាំហុងកុង ពោលគឺដើម្បីជៀសវាង កុំឲ្យមានបាតុកម្មតវ៉ា រិះគន់ចិន ដូចកាលពីឆ្នាំ ២០១៩ទៀត៕None
