រដ្ឋាភិបាលចិនចាត់ទុកថា ការរក្សាបាននូវសេដ្ឋកិច្ចល្អលើសការរំពឹងទុកនេះ គឺវាសបញ្ជាក់ពី មូលដ្ឋានគ្រឹះសេដ្ឋកិច្ចដ៏រឹងមាំ និងការអនុវត្តវិធានការទប់ស្កាត់មេរោគកូវីដ១៩ បានទាន់ពេល និងមានប្រសិទ្ធភាព។
ការិយាល័យស្ថិតិជាតិចិន បានលើកឡើងថា វិបត្តិកូវីដ-១៩ បានជះឥទ្ធិពលអវិជ្ជមានជាច្រើនដល់សេដ្ឋកិច្ចចិន តែយ៉ាងណា ចិននៅតែធ្វើបានល្អ ដោយទំហំពាណិជ្ជកម្មក្រៅប្រទេស កាលពីខែមិថុនា កន្លងទៅ បង្ហាញពីសញ្ញាវិជ្ជមាន កើនឡើងវិញទាំងការនាំចេញទំនិញ និងការនាំចូលទំនិញ។
អ្នកនាំពាក្យរដ្ឋបាលគយទូទៅចិន បានគូសបញ្ជាក់ដែរថា ក្រោយពីជួបព្យុះភ្លៀងនៅក្នុងត្រីមាសទី ១ ការនាំចេញទំនិញរបស់ចិន កើនឡើងវិញ ៣ខែជាប់ៗគ្នា ដែលសបញ្ជាក់ពី សញ្ញាវិជ្ជមាននៃការងើបឡើងវិញ ប្រកបដោយស្ថិរភាព។
អត្ថបទទាក់ទង!
គិតចាប់ពីខែមករា ដល់ខែមិថុនា កន្លងទៅនេះ ទំហំពាណិជ្ជកម្មក្រៅប្រទេសរបស់ ក្រុមហ៊ុនសហគ្រាសឯកជនចិន សម្រាប់បានជាង ៩២០ពាន់លានដុល្លារអាមេរិក ដែលមានការកើនឡើង ៥% ធៀបនឹងពេលដូចគ្នាកាលពីឆ្នាំមុន ហើយតួលេខនេះ គឺស្មើនឹង ៤៥% នៃទំហំពាណិជ្ជកម្មសរុបរបស់ប្រទេសចិន ដែលសម្រេចបានជាង ២ទ្រីលានដុល្លារអាមេរិក។
ដោយឡែក ចិន ទទួលបានការវិនិយោគពីក្រៅប្រទេសជាង ៦៧ពាន់លានដុល្លារអាមេរិក ក្នុងពាក់កណ្តាលឆ្នាំនេះ ដែលមានការថយចុះតែ ១% ប៉ុណ្ណោះ ហើយអ្នកនាំពាក្យក្រសួងពាណិជ្ជកម្មចិន អះអាងថា វាជាតួលេខមួយដែលល្អជាងការព្យាកទុកទៅទៀត។
ក្នុងនោះ ការវិនិយោគមកពី ហុងកុង សិង្ហបុរី និងសហរដ្ឋអាមេរិក មានការកើនឡើងដូចៗគ្នា ខណៈវិស័យដែលទាក់ទាញជាងគេគឺវិស័យសេវាកម្មបច្ចេកវិទ្យាទំនើប ដែលមានកំណើនដល់ទៅ ១៩%។
ទោះយ៉ាងណាក៏ដោយចុះ GDP របស់ចិន ធ្លាក់ចុះ ១,៦% នៅក្នុងពាក់កណ្តាលឆ្នាំ ២០២០ ដោយសារតែ ការចាត់វិធានការក្តៅៗ ចំពោះមេរោគកូវីដ-១៩នេះ កាលពីត្រីមាសទី ១ តែរដ្ឋាភិបាលចិន បានកែប្រែស្ថានការណ៍យ៉ាងឆាប់រហ័ស ឈានទៅដល់ការបើកដំណើរការអាជីវកម្ម និងសាលារៀនឡើងវិញ ដែលបានធ្វើឲ្យសកម្មភាពសេដ្ឋកិច្ចស្ទុះងើបប្រសើរឡើងវិញនៅក្នុងត្រីមាសទី ២៕
None
