ក្រសួងហិរញ្ញវត្ថុរបស់ចិន បានឱ្យដឹងថា ចាប់ពីថ្ងៃទី១ ខែវិច្ឆិកា ឆ្នាំ២០២៥ តទៅ អ្នកលក់រាយមាសលែងទទួលបានការអនុគ្រោះអាករលើតម្លៃបន្ថែម (VAT) ដូចមុនទៀតហើយ នៅពេលលក់ចេញមាសដែលបានទិញពីផ្សារហ៊ុនសៀងហៃ។ ចំណាត់ការនេះមានគោលបំណងជំរុញប្រាក់ចំណូលរបស់រដ្ឋាភិបាលចិន ខណៈដែលប្រទេសចិន ប្រឈមមុខនឹងកំណើនសេដ្ឋកិច្ចចុះខ្សោយ ហើយទីផ្សារអចលនទ្រព្យចិន ក៏កំពុងជាប់ផុងក្នុងវិបត្តិយ៉ាងជ្រៅរើខ្លួនមិនទាន់រួច។
ទោះជាយ៉ាងណា ចំណាត់ការនេះទំនងជានឹងធ្វើឲ្យតម្លៃមាសហក់ឡើងសម្រាប់អតិថិជនជាអ្នកប្រើប្រាស់ និងអាចធ្វើឲ្យតម្រូវការមាសនៅក្នុងប្រទេស ដែលមានប្រជាជនសរុបជាង១,៤ ពាន់លាននាក់នេះធ្លាក់ចុះ។ កាលពីពេលថ្មីៗនេះ ការសម្រុកទិញមាសទូទាំងពិភពលោកបានជំរុញឲ្យតម្លៃមាសហក់ឡើងដល់កម្រិតកំណត់ត្រាខ្ពស់បំផុត ដែលធ្វើឱ្យទីផ្សាចិន ទិញចូលមាសលើសកម្រិត។
ដោយសារតែមាសឡើងថ្លៃខ្លាំងហួសហេតុពេក បណ្ដាវិនិយោគិនក៏បានកាត់បន្ថយទិញចូលមាស ហើយរដូវកាលសម្រុកទិញចូលមាសរបស់ឥណ្ឌា ក៏បានថមថយ។ ទន្ទឹមនេះ ការផ្អាកសង្គ្រាមពាណិជ្ជកម្មរវាងសហរដ្ឋអាម៉េរិក និងចិន ក៏បានធ្វើឱ្យតម្រូវការមាសធ្លាក់ចុះផងដែរ។
ទោះជាយ៉ាងណា ហាងឆេងមាសនៅតែខ្ពស់ខ្លាំងនៅឡើយ ហើយក្រុមអ្នកវិភាគនិយាយថា កត្តាសំខាន់ៗដូចជាការសម្រុកទិញចូលមាសពីបណ្ដាធនាគារកណ្តាល ការបញ្ចុះអត្រាការប្រាក់របស់ធនាគារកណ្ដាលអាម៉េរិក និងស្ថានភាពមិនប្រាកដប្រជាទូទាំងពិភពលោក នៅតែបន្តជួយឱ្យហាងឆេងមាសនៅតែខ្ពស់។
អ្នកជំនាញខ្លះបានព្យាករថា ហាងឆេងមាសលើទីផ្សារអន្តរជាតិ អាចនឹងឡើងរហូតដល់ទៅប្រមាណ៥,០០០ដុល្លារអាម៉េរិក ក្នុងមួយអោន ឬ៦,១០០ដុល្លារអាម៉េរិក ក្នុងមួយតម្លឹងក្នុងរយៈពេលត្រឹមតែមួយឆ្នាំ៕
ដោយ: តែម សុខុម
