ជាមួយគ្នានេះ ប្រធានាធិបតីរុស្ស៊ី លោក ពូទីន ក៏បានសាទរចំពោះទំនាក់ទំនងប្រកបដោយ «ភាពវិជ្ជមាន» ជាមួយប្រទេសមីយ៉ាន់ម៉ាផងដែរ។ នេះបើតាមការចុះផ្សាយដោយសារព័ត៌មានអន្តរជាតិធំៗ។
លោក ពូទីន បាននិយាយក្នុងអំឡុងកិច្ចប្រជុំនៅខាងក្រៅវេទិកាសេដ្ឋកិច្ចបូព៌ាជាមួយលោក មីង អោងឡាំង កាលពីថ្ងៃទី ៧ ខែកញ្ញាថា «មីយ៉ាន់ម៉ាគឺជាដៃគូដ៏យូរអង្វែង និងគួរឱ្យទុកចិត្តរបស់រុស្សីនៅក្នុងតំបន់អាស៊ីអាគ្នេយ៍ ហើយទំនាក់ទំនងរបស់ប្រទេសទាំងពីរ គឺកំពុងវិវត្តទៅរកភាពវិជ្ជមាន»។
ជាមួយគ្នានេះ លោក មីង អោងឡាំង បានប្រាប់លោក ពូទីន វិញថា «លោកពិតកោតសរសើរលោក ពូទីនណាស់ ដែលបានធ្វើឲ្យប្រទេសរុស្សីជាប្រទេសលេខមួយលើលោក ដែលគ្រប់គ្រង និងរៀបចំស្ថិរភាពអន្តរជាតិឡើងវិញ»។
មែនទែនទៅ ប្រទេសរុស្សី និងមីយ៉ាន់ម៉ាដែលដឹកនាំដោយរបបយោធា បាននិងកំពុងចូលជិតគ្នាកាន់តែខ្លាំងឡើងៗ ទាំងលើទំនាក់ទំនងការទូត និងយោធា ខណៈដែលទីក្រុងម៉ស្គូ និងទីក្រុងនៃពីដោកំពុងរងទណ្ឌកម្មពីប្រទេសលោកខាងលិចយ៉ាងខ្លាំងស្ទើរដកខ្លួនពុំរួចនោះ។
អត្ថបទគួរអាន
ស្របពេលជាមួយគ្នានេះ មេដឹកនាំយោធាមីយ៉ាន់ម៉ាបាននិយាយវេទិកាសេដ្ឋកិច្ចបូព៌ានោះដែរថា «វិបត្តិនៅក្នុងប្រទេសមីយ៉ាន់ម៉ាកំពុងស្ថិតក្រោមការគ្រប់គ្រងបាន ហើយរបបយោធានឹងធ្វើអ្វីៗគ្រប់បែបយ៉ាងក្នុងអំណាចរបស់ខ្លួន ដើម្បីរៀបចំការបោះឆ្នោតនៅឆ្នាំក្រោយ ដូចដែលបានគ្រោងទុកដែលគ្មានការជ្រៀតជ្រែកពីបរទេសឡើយ»។
គេនៅចាំថា ក្នុងអំឡុងពេលធ្វើដំណើរទៅកាន់ទីក្រុង ណៃពីដោ នៅដើមខែសីហាកន្លងទៅ រដ្ឋមន្ត្រីការបរទេសរុស្ស៊ីលោក Sergei Lavrov បានគាំទ្រកិច្ចខិតខំប្រឹងប្រែងរបស់របបយោធាក្នុងការរក្សា «ស្ថិរភាព» ប្រទេស និងរៀបចំការបោះឆ្នោតជាតិនៅឆ្នាំក្រោយនេះផងដែរ។
ទោះជាបែបនេះក្តី រដ្ឋមន្ត្រីការបរទេសសហរដ្ឋអាមេរិក លោក Antony Blinken បានព្រមានមិនឲ្យសហគមន៍អន្តរជាតិគាំទ្រ «ការបោះឆ្នោតក្លែងក្លាយ» របស់របបយោធាមីយ៉ាន់ម៉ានោះទេ។
ជាមួយគ្នានេះ ការវិភាគដែលបានចេញផ្សាយកាលពីថ្ងៃច័ន្ទ ដោយក្រុមប្រឹក្សាពិសេសសម្រាប់មីយ៉ាន់ម៉ា ដែលជាក្រុមអ្នកជំនាញអន្តរជាតិឯករាជ្យបានសន្និដ្ឋានថា របបយោធាមានការគ្រប់គ្រងឲ្យមានស្ថិរភាពក្នុងប្រទេសត្រឹមតែ១៧%ប៉ុណ្ណោះ នៃទឹកដីក្នុងប្រទេសទាំងមូល ដោយក្រៅពីនោះ គឺជាតំនប់គ្មានស្ថិរភាព និងត្រូវបានវាយទន្ទ្រានពីសំណាក់ក្រុមបះបោរ ដែលគាំទ្ររដ្ឋាភិបាលស្រមោលមីយ៉ាន់ម៉ាតែម្តង៕
