អគ្គរដ្ឋបាលគយចិន បានឱ្យដឹងថា ក្រោយចិនដាក់បម្រាមនាំចូលអាហារសមុទ្រពីជប៉ុន កាលពីអំឡុងខែកញ្ញា ឆ្នាំ២០២៣ ការនាំចូលអាហារសមុទ្រសរុបរបស់ចិន ចាប់ពីពេលនោះមកដល់ខែកក្កដា ឆ្នាំ២០២៤ គិតជាទំហំទឹកប្រាក់បានធ្លាក់ចុះប្រហែល១០% បើធៀបនឹងរយៈពេលដូចគ្នាកាលពីមួយឆ្នាំមុន។ ក្នុងនោះការនាំចូលប្រភេទខ្យង និងងាវបានធ្លាក់ចុះ១១% រីឯប្រភេទត្រីស្រស់បានធ្លាក់ចុះ៤%។
មុនជប៉ុនបញ្ចេញទឹកសំណល់ពីរោងចក្រនុយក្លេអ៊ែ ហ្វូគូស៊ីម៉ា ដៃអ៊ិឈិ ចូលទៅក្នុងសមុទ្រ នៅក្នុងរយៈពេល៨ខែ ឆ្នាំ២០២៣ ប្រទេសចិន បាននាំចូលគ្រឿងសមុទ្រប្រភេទងាវ ខ្យង និងអាហារសមុទ្រផ្សេងទៀតពីជប៉ុន មានតម្លៃ២៩០លានដុល្លារ។
បន្ទាប់ពីដាក់បម្រាមលើការនាំចូលអាហារសមុទ្រពីជប៉ុន ចិនបានងាកទៅនាំចូលអាហារសមុទ្រពីប្រទេសផ្សេងៗ ដើម្បីបំពេញតម្រូវការអាហារសមុទ្ររបស់ខ្លួន។ ជាក់ស្ដែងចាប់ពីខែកញ្ញា ឆ្នាំ២០២៣ ដល់ខែកក្កដា ឆ្នាំ២០២៤ នេះ ចិនបានបង្កើនការនាំចូលអាហារសមុទ្រ៤២% ពីប្រទេសឥណ្ឌូនេស៊ី និងប្រហែល១៥០% ពីអង់គ្លេស ព្រមទាំងបង្កើនការនាំចូលស្ទើរ៣ដង ពីប្រទេសអាហ្សង់ទីន នៅតំបន់អាម៉េរិកខាងត្បូង។
លោក តូរូ នីស៊ីម៉ា (Toru Nishima) ប្រធានសេដ្ឋវិទូនៅវិទ្យាស្ថានស្រាវជ្រាវជីវិត ដៃអ៊ិឈិ Dai-ichi នៅជប៉ុន បាននិយាយថា ការណ៍ដែលចិន បានបង្កើនការនាំចូលអាហារសមុទ្រពីតំបន់អាម៉េរិកខាងត្បូង ជាជាងនាំចូលពីសហរដ្ឋអាម៉េរិកនេះ ក៏ដោយសារតែមានភាពល្អក់កករក្នុងទំនាក់ទំនងពាណិជ្ជកម្មរវាងប្រទេសទាំងពីរ៕
អត្ថបទ៖ សុខ មង្គល
