គ្រឿងបរិក្ខាយោធាស្ទើរតែពាក់កណ្តាលនៅទ្វីបអាហ្រ្វិក គឺត្រូវបានផ្គត់ផ្គង់ដោយប្រទេសរុស្ស៊ីដោយសារតែពួកគេ មានទំនាក់ទំនងជាប្រវត្តិសាស្ត្រជាមួយគ្នាតាំងពីសម័យការតស៊ូរំដោះជាតិពីនឹមអាណានិគមន៍ក្នុងទសវត្សរ៍ឆ្នាំ១៩៥០ និង៦០មកម្ល៉េះ។ មូលដ្ឋានគ្រឹះនៃជំនួយផ្នែកសន្តិសុខដែលរុស្ស៊ីផ្ដល់ឲ្យអាហ្វ្រិកនោះ គឺការបណ្តុះបណ្តាលកងទ័ព ការលក់អាវុធ និងការបញ្ជូនទាហានស៊ីឈ្នួល។
ឥឡូវនេះបណ្ដាប្រទេសមួយចំនួននៅអាហ្វ្រិកជាពិសេស គឺអាហ្រ្វិកខាងលិចតែម្ដងបាននិងកំពុងងាកទៅរកមហាយក្សចិនវិញ ទាក់ទងនឹងជំនួយយោធានេះ។ តំបន់អាហ្វ្រិកខាងលិចនេះ មានចំនួន ២៥% នៃចរាចរតាមសមុទ្រអាហ្រ្វិក និង ២ ភាគ ៣ នៃផលិតកម្មប្រេងរបស់ទ្វីបអាហ្រ្វិក ដូច្នេះតំបន់នេះកំពុងប្រឈមនឹងការគំរាមកំហែងផ្នែកសន្តិសុខជាច្រើន។
ការកើនឡើងនៃចោរកម្មតាមឈូងសមុទ្រហ្គីណេ (Gulf of Guinea) ដែលជាតំបន់ដឹកជញ្ជូនដ៏សំខាន់មួយនោះបានបង្កគ្រោះថ្នាក់ដល់អាជីវកម្ម និងអាចជំរុញឱ្យមានចលនាជ្រុលនិយមនៅតាមតំបន់ដីគោកជាប់ឆ្នេរសមុទ្រនេះ។ នៅប្រទេសនីហ្សេរីយ៉ាឯណោះវិញ ប្រេងឆៅប្រមាណ ១២ ម៉ឺនបារ៉ែលត្រូវគេលួចជារៀងរាល់ថ្ងៃស្មើនឹងប្រហែល ៦% នៃទិន្នផលប្រេងរបស់ប្រទេសនេះ។
អត្ថបទគួរអាន
កាលពីថ្ងៃទី២៨ ខែតុលា កងទ័ពជើងទឹកនីហ្សេរីយ៉ាបានទទួលទូកល្បាតប្រវែង ៤៦ ម៉ែត្រមួយគ្រឿង និងការផ្គត់ផ្គង់យោធាផ្សេងទៀតពីប្រទេសចិន ដើម្បីជួយប្រយុទ្ធប្រឆាំងឧក្រិដ្ឋកម្មដែនសមុទ្រ និងធានាសុវត្ថិភាពនៅក្នុងឈូងសមុទ្រនេះ ដែលគ្របដណ្តប់លើផ្ទៃដី ២លាន៣សែនគីឡូម៉ែត្រការ៉េ និងមានឆ្នេរសមុទ្រប្រវែងប្រហែល ៦ ពាន់គីឡូម៉ែត្រ។
នៅក្នុងទីក្រុងឡាហ្គូស (Lagos) រដ្ឋធានីពាណិជ្ជកម្មរបស់ប្រទេសនីហ្សេរីយ៉ា គេឃើញក្រុមហ៊ុនចិន China Harbor Engineering បានសាងសង់កំពង់ផែសមុទ្រទឹកជ្រៅ ឡេកគី (Lekki) ដែលជាកំពង់ផែដ៏ធំបំផុតមួយនៅអាហ្រ្វិកខាងលិច និងបង្កើតឡើងដើម្បីគ្រប់គ្រងកុងតឺន័រចំនួន ១លាន២សែនទូ នៅក្នុងមួយឆ្នាំៗ និងមានបំណងធ្វើជាមជ្ឈមណ្ឌលភស្តុភារសមុទ្រថ្មីសម្រាប់តំបន់នេះទាំងមូលដោយបើកឱកាសវិនិយោគមួយទៀតរវាងប្រទេសចិន និងអាហ្វ្រិក។
លោក ងបាវវ៉ាជី ដាញ៉េល អិនតេ (Ngboawaji Daniel Nte) អ្នកជំនាញផ្នែកសន្តិសុខ និងស៊ើបការណ៍នៅសាកលវិទ្យាល័យ Novena នៅប្រទេសនីហ្សេរីយ៉ាបានប្រាប់ Nikkei Asia ថា តាមរយៈការប្រឆាំងនឹងអំពើភេរវកម្មនេះ ប្រទេសចិនធានាបាននូវស្ថិរភាពកម្រិតខ្លះដើម្បីទាញយកធនធានពីតំបន់នេះ ខណៈដែលប្រេង ឧស្ម័ន ផ្លូវដែក និងហេដ្ឋារចនាសម្ព័ន្ធសំខាន់ៗទាំងអស់នេះកំពុងស្ថិតនៅក្នុងដៃរបស់សហគ្រាសចិនរួចទៅហើយ។
លោក អិនតេ បាននិយាយថា ប្រទេសនីហ្សេរីយ៉ាបានជាប់ជំពាក់ជាមួយប្រទេសចិនដោយសារតែប្រាក់កម្ចី ហើយជាមួយចំនួនប្រជាជនវ័យក្មេងដ៏ច្រើននោះ ដូច្នេះហើយទ្វីបនេះគឺជាព្រំដែនថ្មីសម្រាប់ទីក្រុងប៉េកាំង។ ជាលទ្ធផល ការផ្តល់ជំនួយផ្នែកយោធា គឺជាផលប្រយោជន៍ដ៏ល្អបំផុតរបស់ទីក្រុងប៉េកាំងដើម្បីជៀសវាងការខូចខាតវត្ថុបញ្ចាំពីការវាយប្រហារភេរវកម្មលើហេដ្ឋារចនាសម្ព័ន្ធ និងដើម្បីការពារជនជាតិចិននៅក្នុងប្រទេសនេះផងដែរ៕
អត្ថបទ ៖ សុខ ជា
