ក្រុមហ៊ុន VHT នឹងផ្គត់ផ្គង់ឧបករណ៍ IP Router នៅលើបណ្តាញទូរគមនាគមន៍ របស់ Gwave ដែលជាផ្នែកមួយរបស់ក្រុមហ៊ុន UTL Group នៅក្នុងទីផ្សារប្រទេសឥណ្ឌា។ ឧបករណ៍នេះ នឹងជួយគាំទ្រល្បឿន ១០០ Gbps ដើម្បីឆ្លើយតបតាមតម្រូវការរបស់បណ្តាញ 5G ដែលគ្រប់គ្រងដោយក្រុមហ៊ុន Viettel ពីការស្រាវជ្រាវ ទៅដល់ការផលិត។
សូមជម្រាបថា ក្រុមហ៊ុនវៀតណាមមួយនេះ គឺជាអង្គភាពទីមួយក្នុងការស្រាវជ្រាវ IP Router ក្នុងប្រទេសវៀតណាម ដើម្បីបំពេញតាមស្តង់ដារ CE (អឺរ៉ុប) និង FCC (អាមេរិក)។ ឧបករណ៍នេះ ក៏ទទួលបានការបញ្ជាក់ទទួលស្គាល់ដោយក្រសួងព័ត៌មាន និងទំនាក់ទំនងរបស់ប្រទេសវៀតណាមផងដែរ។
អត្ថបទគួរអាន
ក្រុមហ៊ុន UTL Group គឺជាក្រុមហ៊ុនផ្តល់សេវាកម្មទូរគមនាគមន៍ឈានមុខគេរបស់ឥណ្ឌា ដែលមានសមត្ថភាពស្រាវជ្រាវ និងអភិវឌ្ឍនូវបច្ចេកវិទ្យាបញ្ជូន ដែលប្រើក្នុងវិស័យយោធា និងទូរគមនាគមន៍។ ក្រុមហ៊ុននេះ ក៏ជាដៃគូសាកលរបស់អង្គការសហប្រជាជាតិផងដែរក្នុងដំណោះស្រាយបច្ចេកវិទ្យាព័ត៌មានជាមួយវត្តមាននៅក្នុងប្រទេស និងដែនដីចំនួន២៤។
លោក Raja Mohan Rao Potluri ប្រធានក្រុមហ៊ុន UTL Group បាននិយាយថា ពួកគេបានសម្រេចចិត្តជ្រើសរើសឧបករណ៍ IP Router ដើម្បីប្រើប្រាស់ក្នុងបណ្តាញ Gwave។ កិច្ចព្រមព្រៀងនេះ គឺបង្ហាញអំពីជំនឿចិត្តរបស់ក្រុមហ៊ុនឥណ្ឌានេះ មកលើគុណភាពនៃផលិតផលរបស់ក្រុមហ៊ុនវៀតណាម VHT។ បន្ថែមលើសនេះ បន្ទាប់ពីការវាយតម្លៃយ៉ាងហ្មត់ចត់ ក្រុមហ៊ុន UTL បានជ្រើសរើស VHT ធ្វើជាដៃគូទីមួយ ដើម្បីបញ្ជូនបណ្តាញ 5G នៅក្នុងប្រទេសឥណ្ឌា សម្រាប់ក្រុមហ៊ុនសេវាទូរសព្ទ BSNL របស់ប្រទេសឥណ្ឌាទៀតផង។
ចំណែកលោក Nguyen Vu Ha អគ្គនាយកក្រុមហ៊ុន Viettel High Tech បាននិយាយថា ជាមួយនឹងប្រជាជនប្រមាណ ១,៤ពាន់លាននាក់ ឥណ្ឌា គឺជាទីផ្សារមួយដែលមានការទាក់ទាញខ្លាំងសម្រាប់កិច្ចសហប្រតិបត្តិការបច្ចេកវិទ្យាឈានមុខ។ គោលដៅរបស់ក្រុមហ៊ុនលោក គឺដើម្បីជំរុញកិច្ចសហប្រតិបត្តិការនៅក្នុងការស្រាវជ្រាវ អភិវឌ្ឍ និងការផលិតឧបករណ៍ ឬប្រព័ន្ធនៃបណ្តាញ 4G និង 5G ដើម្បីបំពេញតាមស្តង់ដារឥណ្ឌា។
