ចិន គ្រោងបង្កើតមូលនិធិជួយសង្គ្រោះគ្រឹះស្ថានហិរញ្ញវត្ថុដែលជួបការលំបាក ដើម្បីបញ្ចៀសវិបត្តិហិរញ្ញវត្ថុ

ខុសពីមូលនិធិស្រដៀងគ្នាដែលត្រូវបានបង្កើតឡើងដើម្បីការពារអតិថិជន គោលបំណងនៃមូលនិធិសង្គ្រោះ (Rescue Fund) ថ្មីនេះ គឺដើម្បីការពារបណ្ដាគ្រឹះស្ថានហិរញ្ញវត្ថុកុំឱ្យដួលរលំភ្លាមៗពេក ព្រោះការក្ស័យធនភ្លាមៗបែបនេះ អាចបង្កភាពចលាចលនៅក្នុងទីផ្សារហិរញ្ញវត្ថុរបស់ចិនទាំងមូល។

គណៈកម្មាធិការអចិន្ត្រៃយ៍នៃរដ្ឋសភាចិន នឹងកោះប្រជុំនៅថ្ងៃអង្គារ ទី២៥ ខែមិថុនា ដើម្បីពិភាក្សាអំពីសេចក្ដីព្រាងច្បាប់មួយ ដែលកំណត់ពីរបៀបប្រមូលថវិកាសម្រាប់មូលនិធិថ្មីនេះ និងរបៀបបែងចែកវិភាគទាន។ តាមការរំពឹងទុក សេចក្ដីព្រាងច្បាប់នេះ នឹងត្រូវអនុម័តនៅចុងឆ្នាំនេះ។

មូលនិធិនេះនឹងប្រមូលថវិកាជាចម្បងពីបណ្ដាក្រុមហ៊ុនក្នុងវិស័យហិរញ្ញវត្ថុ រួមទាំងធនាគារ និងសេវាកម្មទូទាត់ផងដែរ។ ប្រភពព័ត៌មានមួយពីរដ្ឋាភិបាលចិន បានបញ្ជាក់ថា មូលនិធិនេះនឹងមានទុនរហូតដល់ទៅ១៣,៨ពាន់លានដុល្លារអាម៉េរិក។ ហើយក្នុងករណីបន្ទាន់ ធនាគារកណ្តាលចិន នឹងអាចពង្រីកមូលនិធិនេះតាមរយៈការផ្តល់ឥណទានដែលគិតការប្រាក់ទាប។

សូមបញ្ជាក់ថា ប្រទេសចិន មានមូលនិធិធានាលើប្រាក់បញ្ញើ (Deposit Insurance Fund) សម្រាប់ការពារអ្នកដាក់ប្រាក់បញ្ញើរួចទៅហើយ បន្ថែមពីមូលនិធិសម្រាប់វិស័យធានារ៉ាប់រង និងវិស័យបរធនបាលកិច្ច (Trust Sector)។ ទិន្នន័យផ្លូវការបង្ហាញថា មូលនិធិធានាលើប្រាក់បញ្ញើរបស់ប្រទេសចិន មានសមតុល្យ ឬទំហំជាង៥០០លានដុល្លារអាម៉េរិក គិតត្រឹមចុងឆ្នាំ២០២៣៕

ដោយ: តែម សុខុម