នាយករដ្ឋមន្ត្រីចិន លី ឈាង បានបញ្ជាក់ក្នុងអំឡុងពេលជួបជាមួយសមភាគីរុស្ស៊ី លោក មីខាអ៊ីល មីស៊ូស្ទីន នាយករដ្ឋមន្ត្រីរុស្ស៊ី នៅទីក្រុងមូស្គូ កាលពីថ្ងៃចន្ទ ដើមសប្តាហ៍នេះថា មហាយក្សចិន បានត្រៀមខ្លួនរួចជាស្រេចដើម្បីពង្រឹងកិច្ចសហប្រតិបត្តិការជាមួយរុស្ស៊ីក្នុងវិស័យថាមពល កសិកម្ម និងវិស័យផ្សេងៗទៀត។ ជាមួយគ្នានេះ លោក លី ប្រកាសបើកទីផ្សារសម្រាប់ផលិតផលកសិកម្ម និងអាហាររបស់រុស្ស៊ីបន្ថែមទៀត ខណៈលោក មីខាអ៊ីល បានអះអាងពីភាពធន់នៃកិច្ចសហប្រតិបត្តិការរវាងប្រទេសទាំងពីរចំពោះបញ្ហាប្រឈមខាងក្រៅនានា។
បើតាមការអះអាងរបស់លោក មីខាអ៊ីល កិច្ចសហប្រតិបត្តិការរវាងខ្លួនជាមួយចិន ក្នុងវិស័យថាមពលមានលក្ខណៈយុទ្ធសាស្ត្រពិសេស និងគ្របដណ្តប់លើវិស័យប្រេង ឧស្ម័ន ធ្យូងថ្ម និងនុយក្លេអ៊ែ។ មកទល់ពេលនេះគេដឹងថា ទីក្រុងប៉េកាំង និងទីក្រុងមូស្គូ ជាដៃគូយុទ្ធសាស្ត្រគ្មានដែនកំណត់ ដែលភាពជាដៃគ្នានេះត្រូវបានប្រកាសឡើងនៅប៉ុន្មានថ្ងៃមុនពេលលោក ពូទីន បញ្ជាឱ្យកងទ័ពរុស្ស៊ីរាប់ម៉ឺននាក់វាយចូលលុកលុយប្រទេសអ៊ុយក្រែន កាលពីខែកុម្ភៈ ឆ្នាំ២០២២។
ការប្តេជ្ញាបង្កើនកិច្ចសហប្រតិបត្តិការលើវិស័យកសិកម្ម និងថាមពលរបស់ថ្នាក់ដឹកនាំរុស្ស៊ី និងចិន ធ្វើឡើងចំពេលមានសេចក្តីរាយការណ៍ថា អ្នកតាក់តែងច្បាប់របស់អាម៉េរិក កំពុងរៀបចំសេចក្តីព្រាងច្បាប់មួយ ដែលនឹងដាក់ទណ្ឌកម្មលើប្រទេស ដែលទិញប្រេង និងឧស្ម័នពីរុស្ស៊ី ដើម្បីទប់ស្កាត់លំហូរចំណូលចម្បងរបស់ទីក្រុងមូស្គូ ខណៈការចរចាសន្តិភាពជាមួយអ៊ុយក្រែន កំពុងជាប់គាំង។ បើតាមសេចក្តីព្រាងច្បាប់ដែលបានស្នើឡើង សហរដ្ឋអាម៉េរិក អាចដាក់ពន្ធរហូតដល់៥០០% លើប្រទេសណា ដែលធ្វើពាណិជ្ជកម្មជាមួយទីក្រុងមូស្គូ រួមទាំងអ្នកទិញសំខាន់ៗដូចជាឥណ្ឌា និងចិន ផងដែរ៕
ដោយៈ សរ សុជាតិ
