ប្រទេសចិនដែលជាអ្នកទិញឧស្ម័នធម្មជាតិរាវដ៏ធំបំផុតនៅក្នុងពិភពលោកនោះ នឹងលក់បន្តនូវឧស្ម័នធម្មជាតិរាវ ដែលលើសតម្រូវរបស់ខ្លួន ដោយសារតម្រូវការថាមពលក្នុងស្រុកធ្លាក់ចុះ ទៅឱ្យប្លុកអឺរ៉ុបដែលនឹងផ្តល់ឱ្យទីផ្សារឧស្ម័នជាមួយការផ្គត់ផ្គង់ដ៏ច្រើន ដែលអឺរ៉ុបបានស្រូបយកបាន បើទោះជាតម្លៃឡើងខ្ពស់ក៏ដោយ។
ជាលទ្ធផល ការនាំចូលឧស្ម័ន LNG របស់អឺរ៉ុបបានកើនឡើង ៦០% បើធៀបនឹងឆ្នាំមុន ក្នុងរយៈពេលឆមាសដំបូងនៃឆ្នាំនេះ។ ក្នុងនោះ មានឧស្ម័ន៥៣លានតោន ដែលប្លុកនេះបានទិញនោះ គឺវាលើសនឹងការនាំចូលរបស់ប្រទេសចិន និងជប៉ុនទៅទៀត និងបាននាំឱ្យអត្រាកាន់កាប់ស្ដុកទុកឧស្ម័នរបស់អឺរ៉ុបបានឡើងដល់ ៧៧%។ នេះបើយោងតាមក្រុមហ៊ុនស្រាវជ្រាវ របស់ក្រុមហ៊ុន Kpler។
ហេតុអ្វីក៏ចិនបញ្ជាទិញឧស្ម័ន LNG ហើយលក់បន្ដទៅឲ្យអឺរ៉ុបវិញ? កត្តាទី១ គឺដោយសារតែការថយល្បឿននៃសេដ្ឋកិច្ចចិន ធ្វើឲ្យតម្រូវការថាមពលធ្លាក់ចុះ។ កំណើនផលិតផលក្នុងស្រុកសរុបពិតប្រាកដរបស់ចិន សម្រាប់ឆមាសទី១ឆ្នាំ២០២២ គឺមាន២,៥%ប៉ុណ្ណោះ។ បញ្ហាបិទខ្ទប់ទីក្រុង បង្កឲ្យមានការធ្លាក់ចុះតម្រូវការឧស្សាហកម្មប្រេងឥន្ធននៈ និងគីមី ដែលធ្វើឲ្យតម្រូវការឧស្ម័នមានការធ្លាក់ចុះទាប។ ហើយការធ្លាក់ចុះនេះ ក៏ត្រូវបានគេរំពឹងថា នឹងមិនអាចកើនឡើងវិញឆាប់ៗនោះដែរនៅឆមាសទី២ខាងមុខនេះ។ នេះបើតាមអ្នកវិភាគជាន់ខ្ពស់នៃវិទ្យាស្ថានស្រាវជ្រាវ Marubeni លោកស្រី សឺលៀន លី (Xuelian Li)។
អត្ថបទគួរអាន
ប្រសិនបើការផ្គត់ផ្គង់ឧស្ម័ននៅដើរតាមគន្លងដូចបច្ចុប្បន្ននេះ អឺរ៉ុបទំនងជានឹងឈានដល់គោលដៅដែលខ្លួនបានកំណត់ក្នុងការបំពេញកន្លែងផ្ទុកឧស្ម័នរបស់ខ្លួនឱ្យបានចំនួន ៨០% នៅត្រឹមខែវិច្ឆិកានៅចុងឆ្នាំនេះ។
សូមបញ្ជាក់ថា ទីផ្សារថាមពលដែលកំពុងមានតម្រូវការខ្លាំងបំផុត គឺនៅតំបន់អឺរ៉ុប ខណៈបច្ចុប្បន្ន រុស្ស៊ីផ្គត់ផ្គង់ហ្គាសទៅប្លុកនេះ គឺមានកម្រិតទាបបំផុតគិតក្នុងរយៈពេល៤០ឆ្នាំចុងក្រោយនេះ តួយ៉ាង ហ្គាសរុស្ស៊ី ដែលមានបង្ហូរទៅតាមបំពង់បង្ហូរទៅកាន់តំបន់អឺរ៉ុបគឺមានប្រហែលតែ២០% ប៉ុណ្ណោះ នៃចំនួនហ្គាសដែលបានបង្ហូរទៅកាលពីឆ្នាំមុន។
អឺរ៉ុបក៏បានឆ្លើយតបដោយការទិញឧស្ម័នធម្មជាតិរ៉ាវ ពីទីផ្សារផ្សេងៗទៀត បើទោះបីជា មានតម្លៃកើនខ្ពស់ក្ដី ហើយអឺរ៉ុបក៏បានយល់ព្រមកាត់បន្ថយការប្រើប្រាស់ឧស្ម័នធម្មជាតិឲ្យបាន ១៥% នៅខែមីនាឆ្នាំក្រោយនេះ៕
អត្ថបទ៖ សុខ ជា
