![វិស័យធនាគារ](https://cdn.cambonomist.com/media/images/2222111.2e16d0ba.fill-960x540.jpg)
ស្ថាប័នក្រុមប្រឹក្សាមាសពិភពលោក WGC ដែលជាអង្គការឃ្លាំមើលការវិវឌ្ឍនៃទីផ្សារសម្រាប់ឧស្សាហកម្មមាស ដែលមានការិយាល័យកណ្ដាលនៅប្រទេសអង់គ្លេស បានរាយការណ៍ថា ប្លុកប្រទេសមានសេដ្ឋកិច្ចកំពុងអភិវឌ្ឍន៍ខ្លាំង ហៅកាត់ថា BRICS ដែលមានសមាជិកសំខាន់ៗចំនួន៥ រួមមាន ប្រេស៊ីល រុស្ស៊ី ឥណ្ឌា មហាយក្សចិន និងអាហ្វ្រិកខាងត្បួង គឺជាអ្នកទិញមាសច្រើនជាងគេបំផុតនៅក្នុងឆ្នាំ២០២២ និងឆ្នាំ២០២៣ ហើយកំពុងបន្តទិញមាសបន្ថែមទៀតនៅឆ្នាំ២០២៤ នេះ។ ទន្ទឹមនេះ ប្រទេសរុស្ស៊ី និងមហាយក្សចិន ក៏កំពុងសម្រុកលក់ចេញបណ្ណរតនាគារ ឬមូលបត្របំណុលអាម៉េរិក និងទ្រព្យសកម្មផ្សេងៗទៀតផងដែរ។
គ្រាន់តែក្នុងឆ្នាំ២០២៤ ប្រទេសចិន បានលក់ចេញបណ្ណរតនាគារអាម៉េរិក ក្នុងតម្លៃរហូតដល់ទៅជាង៥៣ពាន់លានដុល្លារអាម៉េរិក និងបានសម្រុកទិញមាសក្នុងទំហំច្រើនពាន់លានដុល្លារអាម៉េរិក។ ប្រទេស BRICS ផ្សេងៗទៀតកំពុងធ្វើតាមរុស្ស៊ី និងមហាយក្សចិន ដែរ ប៉ុន្តែចំនួននោះ គឺតិចជាងបើធៀបទៅនឹងការលក់ចេញបណ្ណរតនាគារអាម៉េរិក ដែលមហាយក្សចិន បានលក់ចេញ។
ពេលនេះមាស គឺជាទ្រព្យសកម្មដ៏ពេញនិយមបំផុតនៅក្នុងបណ្ដាធនាគារកណ្តាល នៃប្លុកប្រទេស BRICS ខណៈដែលប្រាក់ដុល្លារអាម៉េរិក កំពុងត្រូវបានជៀសវាង។
លោក អ៊ីហ្គុន វ៉ុន ហ្គ្រេយឺស (Egon von Greyerz) ស្ថាបនិកក្រុមហ៊ុនគ្រប់គ្រងទ្រព្យសកម្មម៊ែតធើហន (Matterhorn Asset Management) បាននិយាយថា នេះគឺជាយុគសម័យមាសនៃប្លុកប្រទេស BRICS។
អ្នកជំនាញរូបនេះបានពន្យល់ថា បណ្តាប្រទេស BRICS កំពុងទិញមាសកាន់តែច្រើនឡើង ខណៈដែលធនាគារកណ្តាល នៃប្រទេសទាំងនោះកំពុងសម្រុកលក់ចេញបណ្ណរតនាគារអាម៉េរិក នៅក្នុងទីផ្សារ។
លោកបានព្យាករថា ពេលវេលាមួយនឹងមកដល់ គឺជាពេលដែលធនាគារកណ្តាលនានានឹងកាន់កាប់ប្រាក់ដុល្លារអាម៉េរិកកាន់តែតិច ហើយសម្រុកទិញមាសកាន់តែច្រើនដើម្បីការពារសេដ្ឋកិច្ចរបស់ពួកគេ៕
ដោយ: តែម សុខុម