មេដឹកនាំកំពូលៗរួមទាំងប្រធានាធិបតីចិនលោកស៊ី ជីនពីង (Xi Jinping) និងនាយករដ្ឋមន្ត្រីលោក លី ឈាំង (Li Qiang) បានពិភាក្សាជាលើកដំបូងក្នុងរយៈពេល១០ឆ្នាំមកនេះអំពីគោលនយោបាយអភិវឌ្ឍន៍ទីក្រុងនៅក្នុងសន្និសីទមជ្ឈិម ស្ដីពី ការងារទីក្រុងដោយមានការចូលរួមពីសមាជិកគណៈកម្មាធិការអចិន្ត្រៃយ៍ការិយាល័យនយោបាយ កាលពីអំឡុងពាក់កណ្ដាលខែកក្កដាកន្លងទៅ ។
ក្នុងសន្និសីទនេះ ថ្នាក់ដឹកនាំចិនបានសម្រេចដាក់ការត្រួតពិនិត្យយ៉ាងតឹងរ៉ឹងលើការសាងសង់ អគារខ្ពស់ៗដោយពួកគេបានចង្អុលបង្ហាញថា កំណើនទីក្រុងកំពុងផ្លាស់ប្តូរពីការពង្រីកការបរិមាណអគារទៅជាការផ្តោតលើការកែលម្អគុណភាព និងប្រសិទ្ធភាពនៃសមត្ថភាពដែលមានស្រាប់។
ប្រទេសចិនបាននិងកំពុងដាក់កំហិតជាបណ្តើរៗលើការសាងសង់អគារខ្ពស់ថ្មីថែមទៀត ដោយកាលពីខែមេសា ឆ្នាំ២០២០ ចិនក៏បានប្រកាសអំពីការហាមឃាត់សាងសង់អគារថ្មី ដែលមានកម្ពស់លើស ពី៥០០ម៉ែត្រផងដែរ។
នៅឆ្នាំ ២០២១ ច្បាប់ថ្មីបានកំណត់កម្ពស់អតិបរមានៃអគារថ្មី មកនៅត្រឹមកម្ពស់២៥០ម៉ែត្រ នៅក្នុងទីក្រុងដែលមានប្រជាជន ៣ លាននាក់ ឬច្រើនជាងនេះ។ នៅក្នុងទីក្រុងដែលមានប្រជាជនតិចជាង ៣ លាននាក់ ចិនបានកំណត់ឱ្យសាងសង់អគារមានកម្ពស់ត្រឹម ២៥០ ម៉ែត្រប៉ុណ្ណោះ។ គេជឿថា នៅក្រោយ សន្និសីទមជ្ឈិម កាលពីខែកក្កដា ការកំណត់លើការងារសាងសង់អគារខ្ពស់នេះ នឹងកាន់តែតឹងរ៉ឹងថែមទៀត។
តាមរបាយការណ៍ពីស្ថាប័នជំនាញផ្នែករៀបចំស្ថាបត្យកម្មអន្តរជាតិ Council on Tall Buildings and Urban Habitat បានឱ្យដឹងថា អគារខ្ពស់សរុបទៅទូទាំងពិភពលោកអគារខ្ពស់កប់ពពកចាប់ពីកម្ពស់ ១៥០ម៉ែត្រឡើងនៅសរុបមានចំនួណ ៧៥៩១ អគារ ដោយក្នុងនោះ ប្រទេសចិនមានដល់ទៅជិតពាក់កណ្ដាលនៃចំនួនអគារខ្ពស់សរុប ពោលគឺមានចំនួន ៣៥៦២អគារ។ ការសាងសង់អគារខ្ពស់ៗនៅចិនបានរីកដុះដាលយ៉ាងខ្លាំង ចាប់តាំងពីទសវត្សរ៍ឆ្នាំ ២០០០មក នៅគ្រាដែលសេដ្ឋកិច្ចចិនមានការស្ទុះងើបឡើងខ្លាំង៕
ដោយ៖ សុខ មង្គល
