ប្រទេសនៅទ្វីបអឺរ៉ុប ដែលពីមុនមិនសូវចាប់អារម្មណ៍ភ្ញៀវទេសចរចិន ប៉ុន្តែ ឥឡូវនេះ ចាប់ផ្តើមកម្រើករៀបចំទទួលភ្ញៀវទេសចរចិនហើយ ក្នុងនោះកម្ពុជាក៏កំពុងត្រៀមប្រយុទ្ធដណ្តើមយកភ្ញៀវទេសចរចិនដែរ។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានប្រាប់អ្នកសារព័ត៌មានថា កម្ពុជាបានត្រៀមលក្ខណៈសម្បត្តិរួចរាល់ហើយ ដើម្បីទាក់ទាញនិងទទួលភ្ញៀវទេសចរចិន។
ឯកឧត្តមអះអាងយ៉ាងដូច្នេះថា ៖ «យើងធ្វើទីផ្សារ យើងដឹងថា ភ្ញៀវទេសចរចិនគឺជាកម្លាំងទេសចរណ៍មួយដ៏ធំ ដែលនរណាក៏ចង់បាន ដូច្នេះ បើយើងមិនត្រៀមទាក់ទាញនិងទទួលភ្ញៀវទេសចរចិនទេ យើងនឹងចាញ់គេហើយ»។
ឯកឧត្តមបណ្ឌិត ថោង ខុន បានបន្តថា ភ្ញៀវទេសចរចិនបានធ្វើដំណើរកម្សាន្តនៅក្នុងតំបន់អាស៊ីមានចំណែក ៧០ភាគរយ និងអឺរ៉ុប ២០ភាគរយ ក្នុងនោះប្រទេសបារាំងបានទទួលភ្ញៀវទេសចរចិនល្អបំផុត ហើយក៏ទទួលបានប្រាក់ចំណូលជាច្រើនផងដែរ។
កម្ពុជាមានក្រុមហ៊ុនអាកាសចរណ៍ចិនកើនដល់ ១៤ក្រុមហ៊ុនហើយ!
ដោយសារតែចំនួនភ្ញៀវទេសចរចិន បានធ្វើដំណើរមកកាន់ប្រទេសកម្ពុជាកាន់តែច្រើន បានជំរុញឲ្យក្រុមហ៊ុនអាកាសចរណ៍ចិនបើកប្រតិបត្តិការហោះហើរក៏កើនឡើងច្រើនដែរ។
ឯកឧត្តម ថោង ខុន បានគូសបញ្ជាក់ថា ការហោះហើរពីប្រទេសចិនក្នុងមួយសប្តាហ៍មានចំនួន ១២០ជើងឯណោះ ជាមួយនឹងក្រុមហ៊ុនអាកាសចរណ៍ចំនួន ១៤ក្រុមហ៊ុន។
ឯកឧត្តមរដ្ឋមន្ត្រីទេសចរណ៍បន្តថា នៅឆ្នាំនេះ កម្ពុជានឹងទាក់ទាញភ្ញៀវទេសចរចិនបានជាង១លាននាក់ កើនឡើង ៤០ភាគរយ បើប្រៀបធៀបនឹងឆ្នាំ២០១៦ ហើយរំពឹងថា ទទួលបានចំនួន ២លាននាក់ក្នុងឆ្នាំ២០២០។
ឯកឧត្តមថា ការកើនឡើងនេះដោយសារតែ ទី១ ការរៀបចំទទួលបានល្អ និងទី២ ការហោះហើរ។ ឯកឧត្តមបណ្ឌិតថា នៅក្នុងឆ្នាំ២០៣០ ភ្ញៀវទេសចរអន្តរជាតិធ្វើដំណើរកម្សាន្តនៅទូទាំងពិភពលោក នឹងកើនឡើងដល់ទៅ ១៨០០លាននាក់ ខណៈដែលបច្ចុប្បន្ន ភ្ញៀវទេសចរអន្តរជាតិធ្វើដំណើរកម្សាន្ត២០០លាននាក់។
បើនិយាយពីភ្ញៀវទេសចរចិនវិញ កាលពីឆ្នាំមុន ទេសចរចិនធ្វើដំណើរចេញក្រៅប្រទេសមានចំនួនប្រមាណ ១២០លាននាក់ ហើយចំណាយប្រាក់ប្រមាណ ១២០ពាន់លានដុល្លារអាមេរិក។ ក្នុងឆ្នាំ២០២០ ទេសចរចិនចេញកម្សាន្តក្រៅប្រទេសមិនតិចជាង ២០០លាននាក់នោះទេ ហើយការចំណាយរំពឹងថា កើនដល់ ៤២០ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
