ចិន ប្រកាសបញ្ចេញកញ្ចប់ថវិកា១,៤ទ្រីលានដុល្លារ ដើម្បីដោះស្រាយវិបត្តិបំណុលលាក់កំបាំងរបស់រដ្ឋបាលមូលដ្ឋាន

រដ្ឋមន្ត្រីក្រសួងហិរញ្ញវត្ថុចិន លោក ឡាន ហ្វូអាន (Lan Fo'an) បានប្រកាសប្រាប់អ្នកយកព័ត៌មានកាលពីថ្ងៃសុក្រ សប្ដាហ៍មុនថា រដ្ឋាភិបាលចិន មានគម្រោងបង្កើនការចំណាយបន្ថែមទៀតនៅឆ្នាំ២០២៥ ដើម្បីជួយគាំទ្រដល់សេដ្ឋកិច្ច និងដើម្បីគ្រប់គ្រងបំណុលរបស់បណ្ដារដ្ឋបាលមូលដ្ឋានឱ្យកាន់តែមានប្រសិទ្ធភាព។

ការលើកឡើងបែបនេះរបស់លោក ឡាន ហ្វូអាន ធ្វើឡើងបន្ទាប់ពីគណៈកម្មាធិការអចិន្ត្រៃយ៍នៃរដ្ឋសភាចិន កាលពីថ្ងៃសុក្រ សប្ដាហ៍មុន បានបិទបញ្ចប់កិច្ចប្រជុំរយៈពេល៥ថ្ងៃរបស់ខ្លួន ដែលបានឈានដល់ការអនុម័តសំណើថវិកាបន្ថែមចំនួន៨៣៦ពាន់លានដុល្លារអាម៉េរិក ដើម្បីបង្កើនកម្រិតកំណត់នៃបំណុលសម្រាប់រដ្ឋបាលមូលដ្ឋាន។

លោក ឡាន ហ្វូអាន បានប្រកាសប្រាប់អ្នកយកព័ត៌មានថា សម្រាប់ផែនការដោះស្រាយវិបត្តិបំណុលរបស់រដ្ឋបាលមូលដ្ឋានដែលនឹងចូលជាធរមានចាប់ពីឆ្នាំ២០២៤ រហូតដល់ដំណាច់ឆ្នាំ២០២៦ គ្រោងចំណាយថវិកាប្រមាណ២៧៨ពាន់លានដុល្លារអាម៉េរិក ក្នុងមួយឆ្នាំៗ។

លោក ឡាន ហ្វូអាន ក៏បានលើកឡើងដែរថា ចាប់ពីឆ្នាំ២០២៤ នេះតទៅ រដ្ឋាភិបាលថ្នាក់ជាតិ នឹងបោះផ្សាយសញ្ញាបណ្ណ ឬមូលបត្របំណុលពិសេសក្នុងទំហំទឹកប្រាក់ជាង១១០ពាន់លានដុល្លារអាម៉េរិក សម្រាប់រដ្ឋបាលមូលដ្ឋានក្នុងមួយឆ្នាំៗ ដែលនឹងមានទំហំសរុប៥៥៧ពាន់លានដុល្លារអាម៉េរិកក្នុងរយៈពេល៥ឆ្នាំ។

សូមបញ្ជាក់ថា គោលនយោបាយទាំងនេះនឹងជួយបណ្ដារដ្ឋបាលមូលដ្ឋានកាត់បន្ថយ “បំណុលលាក់កំបាំង” ដែលលោក ឡា ហ្វូអាន រំពឹងថា នឹងធ្លាក់ចុះពីចំនួន២ទ្រីលានដុល្លារអាម៉េរិក គិតត្រឹមឆ្នាំ២០២៣ មកនៅត្រឹម៣២០ពាន់លានដុល្លារអាម៉េរិក នៅត្រឹមឆ្នាំ២០២៨៕

ដោយ: តែម សុខុម