នាយករដ្ឋមន្ត្រីថៃបដិសេធ​ផ្តល់ជំនួយទឹកប្រាក់ ១,៦ពាន់លានដុល្លារដល់ក្រុមហ៊ុន Thai Airways

លោកប្រាយុត ចាន់អូចារ ក៏បានច្រានចោលផងដែរ ពីការលើកឡើងថា ក្រុមហ៊ុន Thai Airways នឹងក្លាយជាក្រុមហ៊ុនសហគ្រាសរដ្ឋម្តងទៀត តាមរយៈការទិញចំណែកភាគហ៊ុនពីក្រសួងហិរញ្ញវត្ថុថៃក្នុងក្រុមហ៊ុនអាការចរណ៍ដ៏ធំមួយនេះ។

លោកប្រាយុត ចាន់អូចារ បានប្រាប់កាសែតបាងកកបុស្តិ៍ថា លោកបានសម្រេចចិត្តហើយថា រដ្ឋាភិបាលនឹងមិនលូកដៃចូលក្នុងរឿងរបស់ក្រុមហ៊ុន(ThaiAirways) ទៀតនោះទេ ជាពិសេសអំឡុងស្តារនីតិសម្បទាអាជីវកម្មរបស់ក្រុមហ៊ុននេះតែម្តង។

គួររំឭកថា ក្រុមហ៊ុន Thai Airways កំពុងស្ថិតក្នុងដំណើរការស្តារនីតិសម្បទាអាជីវកម្មតាមរយៈផែនការថ្មីរបស់ខ្លួន ក្រោយជួបប្រទះវិបត្តិហិរញ្ញវត្ថុដ៏រ៉ាំរ៉ៃដោយបានជំពាក់លុយម្ចាស់បំណុលជាង១ម៉ឺន៣ពាន់ក្រុមហ៊ុនផ្សេងៗគ្នា គិតជាទឹកប្រាក់មានចំនួន ៤១០ពាន់លានបាត វាស្មើនឹងជាង ១៣ពាន់លានដុល្លារអាមេរិក។

បើតាមផែនការ  ម្ចាស់បំណុលទាំងអស់ត្រូវងមកជួបប្រជុំគ្នានៅថ្ងៃទី១២ខែឧសភាសប្តាហ៍មុន ដើម្បីបោះឆ្នោតសម្រេចថា នឹងគាំទ្រ ឬមិនគាំទ្រផែនការអាជីវកម្មថ្មីរបស់ក្រុមហ៊ុននេះ ប៉ុន្តែដោយសារតែវិបត្តិកូវីដ-១៩នៅប្រទេសថៃ គេបានសម្រេចលើកពេលការបោះឆ្នោតនេះទៅពេលក្រោយ។

ប្រសិនបើមានម្ចាស់បំណុលលើស៥០% បោះឆ្នោតគាំទ្រផែនការអាជីវកម្មថ្មី នោះក្រុមហ៊ុន Thai Airways អាចនឹងបន្ដដង្ហើមរស់រានបន្តទៀត ប៉ុន្ដែបើបោះឆ្នោតមិនគាំទ្រទេ បានសេចក្តីថាក្រុមហ៊ុននេះ នឹងត្រូវប្រកាសក្ស័យធនតែម្ដង។

សូមបញ្ជាក់ថា មិនមែនមានតែក្រុមហ៊ុន Thai Airways នោះទេដែលកំពុងលិចលង់នៅក្នុងវិបត្តិកូវីដ-១៩ និងវិបត្តិហិរញ្ញវត្ថុដ៏រាំរ៉ៃ ក្រុមហ៊ុនអាកាសចរណ៍ថៃស្ទើរតែទាំងអស់ បាននិងកំពុងដុនដាបកាន់តែខ្លាំងដូចគ្នា។ ជាក់ស្តែង ថ្មីៗនេះ សមាគមអាកាសចរណ៍ថៃ ដែលមានសមាជិកក្រុមហ៊ុនអាកាសចរណ៍ចំនួន៧ កំពុងជំរុញការស្នើសុំជួបជាមួយនឹងនាយករដ្ឋមន្ត្រីថៃលោកប្រយុទ្ធ ចាន់អូចារ ដើម្បីស្នើ រដ្ឋឲ្យជួយទម្លាក់ប្រាក់កម្ចី ដែលមានការប្រាក់ទាប សម្រាប់ពួកគេ ដើម្បីអាចមានលទ្ធភាពបន្ដដង្ហើមរស់តទៅមុខទៀតបាន៕