ចិន នឹងប្រើកំពង់ផែខ្នាតយក្សមួយនៅប៉េរូ ធ្វើជាមជ្ឈមណ្ឌលខ្សែក្រវាត់ និងផ្លូវ

កាសែត Global Times របស់បក្សកុម្មុយនិស្តចិន បានរាយការណ៍ថា កំពង់ផែ ឆានខេយ (Chancay) នៅប្រទេសប៉េរូ ដែលភាគច្រើនគ្រប់គ្រងដោយប្រទេសចិននឹងបើកដំណើរការនៅថ្ងៃព្រហស្បតិ៍ សប្ដាហ៍នេះ ហើយគេបានរំពឹងថា កំពង់ផែខ្នាតយក្សមួយនេះនឹងក្លាយជាផ្លូវសមុទ្រល្បឿនលឿនថ្មីមួយសម្រាប់ការធ្វើសមាហរណកម្មសេដ្ឋកិច្ចអាស៊ីប៉ាស៊ីហ្វិក។

ក្រុមហ៊ុន COSCO Group ដែលជាក្រុមហ៊ុនមេរបស់ក្រុមហ៊ុនដឹកជញ្ជូនរដ្ឋដ៏ធំបំផុត COSCO Shipping របស់ប្រទេសចិន មានភាគហ៊ុនប្រហែល៦០% នៅក្នុងប្រតិបត្តិករកំពង់ផែ ដែលមានទីតាំងប្រហែល៦០គីឡូម៉ែត្រ ភាគខាងជើង នៃរដ្ឋធានី Lima របស់ប្រទេសប៉េរូ។ កំពង់ផែនេះ អាចអនុញ្ញាតឱ្យកប៉ាល់ដឹកទូកុងតឺន័រធំៗបំផុតរបស់ពិភពលោកចូលចតបាន។

បរិមាណផ្ទុកកុងតឺន័រប្រចាំឆ្នាំរបស់កំពង់ផែខ្នាតយក្សនេះ នឹងចាប់ផ្ដើមក្នុងចំនួន១,៥លានកុងតឺន័រ ហើយប្រសិនបើបូកបញ្ចូលជាមួយកំពង់ផែ Callao ដែលជាកំពង់ផែធំបំផុតរបស់ប្រទេសប៉េរូសមត្ថភាពផ្ទុកទូកុងតឺន័រនឹងលើសសមត្ថភាពកំពង់ផែ Santos របស់ប្រទេសប្រេស៊ីល ដែលជាកំពង់ផែធំបំផុតនៅអាម៉េរិកខាងត្បូងទៅទៀត។

រដ្ឋាភិបាលប៉េរូ បានប៉ាន់ប្រមាណថា កំពង់ផែនេះនឹងចាក់បញ្ចូលទឹកប្រាក់រហូតដល់៤,៥ពាន់លានដុល្លារទៅក្នុងសេដ្ឋកិច្ចក្នុងរយៈពេល១ឆ្នាំ ដែលស្មើនឹងប្រមាណ២% នៃផលិតផលក្នុងស្រុកសរុបរបស់ប្រទេសនេះ ខណៈដែលកំពង់ផែនេះនឹងមានសក្តានុពលក្នុងការប្រែក្លាយពាណិជ្ជកម្មទាំងស្រុងរវាងអាម៉េរិកខាងត្បូង និងអាស៊ីបូព៌ា។

បច្ចុប្បន្ន ទំនិញភាគច្រើនដែលដឹកពីតំបន់អាម៉េរិកខាងត្បូង ទៅកាន់តំបន់អាស៊ី ត្រូវបានដឹកជញ្ជូនឆ្លងកាត់តំបន់អាម៉េរិកកណ្តាល ឬអាម៉េរិកខាងជើង ហើយកំពង់ផែ Chancay ត្រូវបានគេរំពឹងថា នឹងកាត់បន្ថយពេលវេលាដឹកជញ្ជូនទៅប្រទេសចិន ពី៣៥ថ្ងៃ មកនៅត្រឹម២៥ថ្ងៃ៕

អត្ថបទ៖ សុខ មង្គល