ចិន ព្រមានពលរដ្ឋខ្លួនឱ្យចាកចេញពីអ៊ីស្រាអែលជាបន្ទាន់ ខណៈដែលអាម៉េរិក ព្រមានមនុស្សទាំងអស់ឱ្យប្រញាប់ចាកចេញពីក្រុងតេហេរ៉ង់

ស្ថានទូតចិន ប្រចាំប្រទេសអ៊ីស្រាអែល នៅថ្ងៃទី១៧ ខែមិថុនា នេះបានអំពាវនាវឱ្យពលរដ្ឋរបស់ខ្លួនប្រញាប់ចាកចេញពីប្រទេសអ៊ីស្រាអែល តាមរយៈព្រំដែនគោកក្នុងទិសដៅឆ្ពោះទៅកាន់ប្រទេសហ្ស៊កដានី ឱ្យបានឆាប់តាមដែលអាចធ្វើទៅបាន ដើម្បីរក្សាសុវត្ថិភាពផ្ទាល់ខ្លួន ខណៈដែលស្ថានភាពសន្តិសុខកាន់តែយ៉ាប់យ៉ឺន ហើយដែនអាកាសរបស់អ៊ីស្រាអែល ត្រូវបានបិទ នៅឡើយដោយសារអ៊ីស្រាអែល និងអ៊ីរ៉ង់ នៅតែបន្តវាយប្រយុទ្ធគ្នាឈានចូលដល់ថ្ងៃទី៥ នៅថ្ងៃអង្គារនេះ។

តាមរយៈសេចក្តីជូនដំណឹងនៅថ្ងៃអង្គារ ​នៅលើបណ្ដាញទំនាក់ទំនងសង្គម WeChat ស្ថានទូតចិន បានព្រមានថា ពេលនេះជម្លោះប្រដាប់អាវុធរវាងអ៊ីស្រាអែល និងអ៊ីរ៉ង់ នៅតែបន្តកើនឡើងកម្ដៅគួរឱ្យបារម្ភ ដោយសំណង់អគារ និងហេដ្ឋារចនាសម្ព័ន្ធស៊ីវិល បានរងការខូចខាត និងចំនួនជនស៊ីវិលស្លាប់ និងរបួសកើនឡើង ដែលធ្វើឱ្យស្ថានភាពសន្តិសុខកាន់តែធ្ងន់ធ្ងរ។

ចំណែកឯលោក ដូណាល់ ត្រាំ ប្រធានាធិបតីទី៤៧ របស់សហរដ្ឋអាម៉េរិក កាលពីថ្ងៃចន្ទ

ទី១៦ ខែមិថុនា ក៏បានអំពាវនាវឱ្យមនុស្សទាំងអស់ដែលរស់នៅក្នុងរដ្ឋធានីតេហេរ៉ង់ នៃប្រទេសអ៊ីរ៉ង់ ប្រញាប់រត់ភៀសខ្លួនចេញជាបន្ទាន់ ដែលបន្ទរតាមការព្រមានរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដែលបាន និងកំពុងបើកការវាយប្រហារទ្រង់ទ្រាយធំទៅលើអ៊ីរ៉ង់។ នេះបើតាមការចេញផ្សាយរបស់ទីភ្នាក់ងារសារព័ត៌មាន AFP។

លោក ដូណាល់ ត្រាំ បានព្រមានលើបណ្ដាញទំនាក់ទំនងសង្គម Truth Social ថា មនុស្សទាំងអស់ដែលរស់នៅក្នុងទីក្រុងតេហេរ៉ង់ នៃប្រទេសអ៊ីរ៉ង់ ត្រូវតែប្រញាប់ចាកចេញពីរដ្ឋធានីតេហេរ៉ង់ ជាបន្ទាន់ ហើយអ៊ីរ៉ង់ មិនអាចមានសព្វាអាវុធនុយក្លេអ៊ែ​ ជាដាច់ខាត៕

ដោយ: តែម សុខុម