តើសមត្ថភាពផលិតកម្មឧស្សាហកម្មរបស់ចិន កំពុងតែលើសតម្រូវការមែនឬ?

អ្នកជំនាញនៅទីក្រុងវ៉ាស៊ីនតោន និងទីក្រុងប្រ៊ុចសែល បានបង្ហាញនូវទស្សនៈស្របគ្នាថា ប្រទេសចិនកំពុងជួបប្រទះបញ្ហាសមត្ថភាពផលិតកម្មក្នុងវិស័យឧស្សាហកម្ម កើនលើសតម្រូវការ ដែលអាចបំផ្លាញឧស្សាហកម្មនៅក្រៅប្រទេស ដែលទាមទារឱ្យមានការចាត់វិធានការការពារ ដើម្បីទប់ស្កាត់ការខូចខាតសេដ្ឋកិច្ច។

លោកស្រី ជេណេត យេឡេន ( Janet Yellen) រដ្ឋមន្ត្រីក្រសួងហិរញ្ញវត្ថុអាម៉េរិក បាននិយាយនៅក្នុងសប្តាហ៍នេះថា ចិនកំពុងតែផលិតបន្ទះស្រូបពន្លឺព្រះអាទិត្យ រថយន្តអគ្គិសនី និងអាគុយយ៉ាងច្រើនលើសលប់ បើធៀបនឹងតម្រូវការទីផ្សារ។ ដោយឡែកលោកស្រី យូស៊ូឡា វុនឌ័រ ឡេយេន (Ursula von der Leyen) ប្រធានគណៈកម្មការសហភាពអឺរ៉ុប បានលើកឡើងថា ចំនួនរថយន្តអគ្គិសនីចិន នៅលើទីផ្សារអឺរ៉ុប បានកើនឡើងលើសចំណុះ ដែលជាហេតុផលនាំឱ្យអឺរ៉ុបបើកការស៊ើបអង្កេតប្រឆាំងនឹងការឧបត្ថម្ភធនដល់រថយន្តអគ្គីសនីរបស់ចិន។

ពាក់ព័ន្ធនឹងបញ្ហានេះ លោក ប៉ូល ហ្គុង (Paul Gong) ប្រធានក្រុមស្រាវជ្រាវទីផ្សាររថយន្តចិន នៅក្រុមហ៊ុន UBS Group AG បាននិយាយថា សមត្ថភាពផលិតកម្មរថយន្តចិន ដែលលោកបានស្ទាបស្ទង់ គឺនៅក្នុងរង្វង់៥០លានគ្រឿង នៅក្នុងមួយឆ្នាំ ខណៈដែលចិន អាចលក់បាននៅក្នុងស្រុកត្រឹមតែ២២លានគ្រឿងតែប៉ុណ្ណោះ ហើយក្រៅពីនោះ គឺនាំចេញដែលបានធ្វើឱ្យមានភាពប្រទាំងប្រទើសលើទីផ្សាររថយន្តនេះ។

នៅក្នុងឆ្នាំ២០២៣ កំណើននៃការលក់រថយន្តរបស់ចិន បានស្ទុះឡើងដល់៣៦% តែឆ្នាំនេះគេព្យាករណ៍ថា នឹងថយចុះមកត្រឹម២៥%។ មកដល់ពេលនេះ សមាមាត្រនៃការនាំចេញរថយន្តចិន ធៀបទៅនឹងផលិតកម្ម គឺទាបជាងប្រទេសផលិតរថយន្តផ្សេងទៀត ដូចជាអាល្លឺម៉ង់ ជប៉ុន និងកូរ៉េខាងត្បូង។

ក្រុមអ្នកវិភាគបានបន្តថា កន្លងមកតាមទិន្នន័យតម្រូវការផលិតកម្ម ដែលងាយស្រួលហូរចូលទៅកាន់ទីផ្សារអន្តរជាតិ គឺជាផលិតផលឧស្សាហកម្មដែលមានបច្ចេកវិទ្យាទាបៗ និងទំនិញប្រើប្រាស់ធម្មតាប៉ុណ្ណោះ ប៉ុន្តែការដាក់សម្ពាធពីសហរដ្ឋអាម៉េ​រិក និងការតម្លើងកម្រិតកម្ដៅនៃបញ្ហាជាមួយនឹងសហភាពអឺរ៉ុប កំពុងជះឥទ្ធិពលដល់តម្លៃ នៃការនាំចេញរបស់ចិន មានការធ្លាក់ចុះក្នុងល្បឿនដ៏លឿនបំផុតក្នុងរយៈពេលជិតមួយទសវត្សរ៍ចុងក្រោយ៕

ដោយៈ សរ សុជាតិ