ការិយាល័យស្ថិតិជាតិចិន បានបង្ហាញថា ការលក់អចលនទ្រព្យពាណិជ្ជកម្មថ្មី ដែលភាគច្រើនជាលំនៅឋាន និងអគារការិយាល័យ បានធ្លាក់ចុះជាង១៩% នៅ១១ខែឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ដោយបានធ្លាក់មកនៅត្រឹមជាង១ទ្រីលានដុល្លារ។ តែយ៉ាងណា ការលក់អចលនទ្រព្យរបស់ចិន នៅពេញមួយខែវិច្ឆិកា សម្រេចបានជាង១១៣ពាន់លានដុល្លារ កើនឡើង១% បើធៀបនឹងរយៈពេលដូចគ្នាកាលពីឆ្នាំមុន និងកើនឡើង៣.៧% បើធៀបនឹងខែតុលា ក្រោយរដ្ឋាភិបាលចិន បានដាក់ចេញគោលនយោបាយជាច្រើនដើម្បីសម្រួលដល់ការទិញផ្ទះដូចជាការកាត់បន្ថយអត្រាការប្រាក់បញ្ចាំជាដើម។
អ្នកនាំពាក្យការិយាល័យស្ថិតិជាតិចិន លោក ហ្វូ លីងហួយ (Fu Linghui) បាននិយាយនៅក្នុងសន្និសីទសារព័ត៌មានកាលពីដើមសប្តាហ៍នេះថា មានការផ្លាស់ប្តូរជាវិជ្ជមានបន្ថែមទៀតនៅក្នុងទីផ្សារអចលនទ្រព្យនៅក្នុងខែវិច្ឆិកា កន្លងទៅ។
ទោះជាយ៉ាងណាក៏ដោយ ប្រសិនបើការលក់នៅក្នុងខែធ្នូ ឆ្នាំនេះបានត្រឹមស្មើនឹងបរិមាណលក់នៅក្នុងខែធ្នូ ឆ្នាំមុន នោះការលក់អចលនទ្រព្យសរុបរបស់ចិន នៅឆ្នាំនេះ នឹងមានប្រហែលជាង១.៣ទ្រីលានដុល្លារ ពោលគឺបានតែជិតពាក់កណ្តាលនៃកម្រិតលក់បានច្រើនបំផុតកាលពីឆ្នាំ២០២១ ប៉ុណ្ណោះ ដែលមានរហូតដល់ជាង២,៤ទ្រីលានដុល្លារ ហើយជាតួលេខទាបបំផុតបើគិតចាប់តាំងពីឆ្នាំ២០១៦ មក។
ទិន្នន័យរបស់ការិយាល័យស្ថិតិជាតិចិន បានបង្ហាញដែរថា តម្លៃផ្ទះនៅចិន នៅតែបន្តធ្លាក់ចុះដោយតម្លៃផ្ទះថ្មីនៅតាមទីក្រុងធំៗទាំង៧០នៅទូទាំងប្រទេសចិន ជាមធ្យមបានធ្លាក់ចុះ៦,១% នៅក្នុងខែវិច្ឆិកា បើធៀបនឹងរយៈពេលដូចគ្នាកាលពីឆ្នាំមុន ពោលគឺបានធ្លាក់ចុះបន្តិចបើធៀបនឹងអត្រានៅខែតុលា ដែលមានចំនួន៦,២% ខណៈតម្លៃផ្ទះដែលប្រើហើយបានធ្លាក់ចុះ៨,៥% នៅក្នុងឆ្នាំនេះ៕
អត្ថបទ៖ សុខ មង្គល
