ធនាគារកណ្ដាលចិន បានក្លាយជាធនាគារកណ្ដាលឈានមុខគេក្នុងពិភពលោក ដែលបានសម្រុកទិញចូលមាសយ៉ាងច្រើនសម្បើមក្នុងឆ្នាំ២០២៣ ហើយក្រុមអ្នកឃ្លាំមើលទីផ្សារបានបង្ហាញជំនឿថា មានភាគរយច្រើនដែលធនាគារកណ្ដាលចិន អាចនឹងសម្រុកទិញចូលមាសបន្ថែមទៀត។ នេះបើយោងតាមការចុះផ្សាយរបស់សារព័ត៌មានជប៉ុន Nikkei Asia។
ទោះជាយ៉ាងណា ការតាមដានសកម្មភាពទិញចូលមាសរបស់ធនាគារកណ្តាលចិន គឺមានការលំបាកខ្លាំងណាស់ ខណៈដែលក្រុមឈ្មួញមាសនៅក្នុងប្រទេសចិន ហាក់មិនហ៊ាននិយាយជុំវិញប្រធានបទដ៏រសើបនេះ។
ទិន្នន័យប្រចាំខែស្ដីពីទុនបម្រុងអន្តរជាតិរបស់ធនាគារកណ្ដាលចិន គឺគ្មានលក្ខណៈទូលំទូលាយ និងបើកចំហនោះទេ ជាហេតុធ្វើឱ្យក្រុមអ្នកឃ្លាំមើលទីផ្សារពិបាកក្នុងការតាមដានដឹងពីសកម្មភាពរបស់ធនាគារកណ្ដាលចិនយ៉ាងខ្លាំង។
យោងតាមស្ថាប័នក្រុមប្រឹក្សាមាសពិភពលោក WGC ដែលជាអង្គការឃ្លាំមើលការវិវត្តនៃទីផ្សារសម្រាប់ឧស្សាហកម្មមាសដែលមានការិយាល័យកណ្ដាលនៅប្រទេសអង់គ្លេស និងដែលប្រើប្រាស់ទិន្នន័យនេះ និងទិន្នន័យផ្សេងៗទៀត ដើម្បីតាមដានទុនបម្រុងជាមាសរបស់ធនាគារកណ្តាល បានឱ្យដឹងថា ធនាគារកណ្ដាលចិន បានទិញចូលមាសរហូតដល់ទៅប្រមាណ២២៥តោនឯណោះក្នុងឆ្នាំ២០២៣ ដែលស្មើនឹងប្រមាណ៥%នៃតម្រូវការមាសសរុបទូទាំងពិភពលោកនៅក្នុងឆ្នាំនោះ។
ស្ថាប័នក្រុមប្រឹក្សាមាសពិភពលោក WGC បានឱ្យដឹងទៀតថា ធនាគារកណ្ដាលចិន នៅតែបន្តទិញចូលមាសក្នុងឆ្នាំ២០២៤ នេះ គ្រាន់តែក្នុងល្បឿនយឺត ដោយធនាគារកណ្ដាលចិន បានទិញចូលមាសត្រឹមតែប្រមាណ២៩តោនប៉ុណ្ណោះ គិតពីខែមករា ដល់ខែមេសា ខណៈដែលតម្លៃមាសបានហក់ឡើងខ្ពស់បំផុតមិនធ្លាប់មានជាប្រវត្តិសាស្ត្រ។
សូមបញ្ជាក់ថា គិតត្រឹមដំណាច់ខែមិថុនា ឆ្នាំ២០២៤ ធនាគារកណ្ដាលចិន បានកាន់កាប់មាសរហូតដល់ទៅជាង២,២៦៤តោន ដោយកើនឡើង២២% បើធៀបនឹងចុងឆ្នាំ២០១៨។ ចំនួនមាសដែលធនាគារកណ្ដាលចិន កាន់កាប់នៅពេលនេះ គឺស្មើនឹង៤,៩%នៃទុនបម្រុងអន្តរជាតិសរុបរបស់ប្រទេសនេះ៕
ដោយ: តែម សុខុម
