គណៈរដ្ឋមន្ត្រីចិន បានដាក់ចេញជំហានសំខាន់ៗរហូតដល់ទៅ២០ជំហាន រួមទាំងការស្វែងរកសក្តានុពលក្នុងការពង្រីកការប្រើប្រាស់ជាមូលដ្ឋាននៅក្នុងផ្នែកជាច្រើនដូចជា ការផ្តល់ម្ហូបអាហារ សេវាតាមផ្ទះ និងការថែទាំមនុស្សចាស់ផងដែរ។ បន្ថែមលើនេះ អាជ្ញាធរចិន ក៏នឹងសម្លឹងរកមើលការជំរុញសកម្មភាពសេដ្ឋកិច្ចតាមរបៀបថ្មីដោយរួមទាំងការចំណាយលើការរៀបចំហាងលក់រាយដែលគ្មានមនុស្សបើក និងឧបករណ៍ចាក់សោរយកដោយខ្លួនឯង ក៏ដូចជាគាំទ្រដល់ការអភិវឌ្ឍន៍ប្រព័ន្ធសេដ្ឋកិច្ចអេឡិចត្រូនិក និងការផ្សាយពាណិជ្ជកម្មតាមអេឡិចត្រូនិកផងដែរ។
ជាមួយគ្នានេះ គណបក្សកុម្មុយនីស្ត ដែលកំពុងកាន់អំណាចនៅប្រទេសចិន កាលពីខែកក្កដា បានសន្យាថា នឹងធ្វើឱ្យការជំរុញការប្រើប្រាស់ជាគោលការណ៍ផ្តោតសំខាន់ជាងគេនៅក្នុងកិច្ចប្រជុំពេញអង្គ ដែលធ្វើឡើងពីរដងក្នុងមួយទសវត្សរ៍ ជាកំណែទម្រង់រយៈពេលវែង។ កំណើនសេដ្ឋកិច្ចរបស់ប្រទេសនេះបានធ្លាក់ចុះក្នុងល្បឿនយ៉ាងលឿនមិននឹកស្មានដល់ក្នុងរយៈពេល៥ត្រីមាសចុងក្រោយ ដោយសារតែការចំណាយរបស់អ្នកប្រើប្រាស់ធ្លាក់ចុះបានធ្វើឱ្យប៉ះពាល់ដល់កំណើននៃការនាំចេញ។ ស្ថិតក្នុងស្ថានភាពបែបនេះបានជំរុញឱ្យមានការអំពាវនាវឱ្យអ្នកបង្កើតគោលនយោបាយបញ្ចេញការគាំទ្ររបស់រដ្ឋាភិបាល ដើម្បីជួយទីក្រុងប៉េកាំងសម្រេចបាននូវគោលដៅកំណើនប្រចាំឆ្នាំរបស់ខ្លួនក្នុងរង្វង់៥% សម្រាប់ឆ្នាំ២០២៤នេះ។
ក្រោមក្របខណ្ឌដែលបានប្រកាសដាក់ចេញកាលពីថ្ងៃសៅរ៍ សប្តាហ៍មុន រដ្ឋាភិបាលចិននឹងបង្កើនការគាំទ្រផ្នែកហិរញ្ញប្បទានដល់សហគ្រាសខ្នាតតូច និងមធ្យមក្នុងឧស្សាហកម្មសេវាកម្ម និងអនុវត្តការកាត់ពន្ធលើប្រាក់ចំណូលផ្ទាល់ខ្លួនបន្ថែម ដើម្បីទូទាត់ថ្លៃថែទាំទារក និងកុមារអាយុក្រោម៣ឆ្នាំ ក៏ដូចជាការចំណាយលើការអប់រំ និងការគាំទ្រសម្រាប់មនុស្សចាស់។ ទីក្រុងប៉េកាំងក៏មានផែនការលើកទឹកចិត្តដល់ការអភិវឌ្ឍន៍តំបន់ទេសចរណ៍កម្សាន្តថ្មីៗ រួមទាំងនាវាកម្សាន្ត កប៉ាល់ និងការហោះហើរក្នុងរយៈកម្ពស់ទាបផងដែរ។
ដោយៈ សរ សុជាតិ
