ប្រទេសថៃ ទើបតែបានប្រកាសផែនការបើកប្រទេសឡើងវិញបានប៉ុន្មានថ្ងៃប៉ុណ្ណោះ ប៉ុន្ដែនៅថ្ងៃចន្ទសប្ដាហ៍នេះរដ្ឋាភិបាលថៃ បែរជាមកដាក់វិធានការរឹតត្បិតជាថ្មីទៀត ចំពោះក្រុងបាងកក និងនៅបណ្ដាខេត្តមួយចំនួនទៀត ដើម្បីទប់ទល់នឹងការឆ្លងរាលដាលកូវីដ-១៩ ក្រោយពីមានការផ្ទុះឆ្លងកើនឡើង។
តើវិធានការថ្មីរបស់ថៃនេះ មានអ្វីខ្លះ? វិធានការដែលអាជ្ញាធរទើប្រកាសដាក់ចេញនេះ គឺនឹងត្រូវអនុវត្តចាប់ពីថ្ងៃចន្ទដើមសប្ដាហ៍នេះតទៅ សម្រាប់រយៈពេល៣០ថ្ងៃ ក្នុងនោះ រួមមានការហាមឃាត់ការទទួលទានអាហារនៅក្នុងភោជនីយដ្ឋាន នៅក្រុងបាងកក និងខេត្តចំនួន៥ទៀត រួមមាន ខេត្តណន់ថាបូរី, ផាធំថានី, សាមុទ្រ ប្រាកា, សាមុទ្រសាខន និងណាកខន ផាធំជាដើម។ នេះបើតាមរបាយការណ៍ដែលបានចុះផ្សាយដោយសារព័ត៌មាន រ៉ូយ៉ាល់ ហ្គាហ្សែត (Royal Gazette)។
អត្ថបទទាក់ទង
ជាមួយគ្នានេះ ហាងលក់ទំនិញនៅក្នុងក្រុងបាងកក និងខេត្តទាំង៥ខាងលើនេះ ត្រូវតែបិទទ្វារនៅត្រឹមម៉ោង៩យប់ និងហាមឃាត់ការជួបជុំក្រុមមនុស្សលើស២០នាក់។
យោងតាមវិធានការនេះ ក៏តម្រូវឲ្យការដ្ឋានសាងសង់នៅតំបន់ចំនួន៦ នឹងត្រូវបិទទ្វារបណ្ដោះអាសន្ន ហើយផ្ទះស្នាក់នៅកម្មករក៏នឹងត្រូវមានការរឹតបន្ដឹងដែរ ខណៈដែលផ្ទះកម្មកនេះនៅក្រុងបាងកក មានដល់ទៅជិត៦០០ទីតាំង និងមានកម្មករជាង៨ម៉ឺននាក់។ ហើយក្រុមកម្មករសំណង់នេះ គឺជាក្រុមមានការឆ្លងកូវីដ-១៩ច្រើនជាងគេ។
អាជ្ញាធរថៃ ក៏នឹងដាក់ប៉ុស្ដិ៍ត្រួតពិនិត្យនៅក្នុងក្រុងបាងកក និងខេត្តមួយចំនួនទៀតនៅជាប់ៗនោះ ដើម្បីត្រួតពិនិត្យការធ្វើដំណើរ និងការបម្លាស់ទីរបស់កម្មករសំណង់ផងដែរ។
បញ្ហាដាក់ចេញវិធានការរឹតត្បិត ដើម្បីទប់ស្កាត់ការពារកូវីដ-១៩ គឺជារឿងចាំបាច់ និងត្រូវធ្វើទាំងបង្ខំចិត្តរបស់រដ្ឋាភិបាលថៃ ប៉ុន្ដែ រឿងសំខាន់មួយទៀតដែលរដ្ឋាភិបាលប្រទេសកំពុងប្រឈម និងត្រូវដោះស្រាយឲ្យបានលឿននោះ គឺពន្លឿនការចាក់វ៉ាក់សាំង។ ប៉ុន្ដែ ការផ្គត់ផ្គង់វ៉ាក់សាំងរបស់ថៃ ហាក់មិនសូវរលូនប៉ុន្មានទេ។ តួយ៉ាង មកទល់ពេលនេះ ថៃ បានអនុម័តឲ្យប្រើប្រាស់វ៉ាក់សាំងកូវីដ-១៩ចំនួន៦ប្រភេទហើយ ប៉ុន្ដែ ក្នុងនោះ ថៃកំពុងចាក់តែពីរប្រភេទប៉ុណ្ណោះ គឺ Sinovac និង AstraZeneca ខណៈដែលវ៉ាក់សាំងផ្សេងទៀតដែលថៃបានបញ្ជាទិញដែរនោះ មិនទាន់បានដឹកមកដល់នៅឡើយទេ។ ស្របពេលដែល ការផ្គត់ផ្គង់វ៉ាក់សាំងហាក់នៅមានសភាពយឺតយ៉ាវ ប្រមុខរដ្ឋាភិបាលថៃ ថ្មីៗនេះបែរជាមានការប្រកាសពីការបើកប្រទេស១២០ថ្ងៃទៅវិញ។ ការប្រកាសនេះ ក៏ត្រូវបានមុនុស្សជាច្រើនមិនពេញចិត្តនោះទេ ពោលគឺមានដល់ជាង៧៣%ឯណោះ ដែលមិនពេញចិត្តឲ្យបើកប្រទេស១២០ថ្ងៃនេះ។ នេះបើតាមការស្ទង់មតិមួយរបស់វិទ្យាស្ថានជាតិអភិវឌ្ឍន៍រដ្ឋាបាលរបស់ថៃ។
សូមបញ្ជាក់ថា ចំនួនអ្នកឆ្លងកូវីដ-១៩នៅក្នុងប្រទេសថៃ កាលពីថ្ងៃទី ២៧ មិថុនាត្រូវបានរកឃើញថ្មីមានប្រមាណ ៤ពាន់នាក់ ស្លាប់ជាង៤០នាក់។ សរុបមកទល់ពេលនេះ ថៃមានអ្នកឆ្លងកូវីដ-១៩ជាង២៤ម៉ឺននាក់ហើយ និងអ្នកស្លាប់វិញមានជិត២ពាន់នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
