តម្លៃទំនិញប្រើប្រាស់នៅអាម៉េរិកកើនឡើងដល់កម្រិតខ្ពស់បំផុតក្នុងរយៈពេល៧ខែចុងក្រោយនេះ
តម្លៃទំនិញប្រើប្រាស់នៅសហរដ្ឋអាម៉េរិកបានកើនឡើង០,៣% កាលពីខែវិច្ឆិកាថ្មីៗនេះ ជាកម្រិតមួយខ្ពស់បំផុតមិនធ្លាប់មានក្នុងរយៈពេលប្រាំពីរខែចុងក្រោយ…
ក្រុមហ៊ុនប្រឹក្សាអចលនទ្រព្យ Tokyo Kantei បាននិយាយថា តម្លៃជាមធ្យមសម្រាប់ខុនដូទូទាំងប្រទេសជប៉ុន ដែលបានដាក់លក់នៅលើទីផ្សារក្នុងឆ្នាំ២០២៣មានតម្លៃស្មើនឹងប្រាក់ចំណូលប្រចាំឆ្នាំជាមធ្យមជាង១០ដង ពោលគឺបានកើនឡើង ០.៤៣%បើធៀបនឹងឆ្នាំ២០២២ ។ តម្លៃខុនដូរកើនខ្ពស់ដល់កម្រិតជាង ១០ដងនៃប្រាក់ចំណូលជាមធ្យមប្រចាំឆ្នាំរបស់ពលរដ្ឋនេះ គឺជាលើកដំបូងហើយ ចាប់តាំងពីក្រុមហ៊ុននេះបានចាប់ផ្តើមតាមដានទិន្នន័យតាំងពីឆ្នាំ២០០៦មក។
បើគេមើលទៅលើទីផ្សារក្នុងទីក្រុងតូក្យូ បើធៀបនឹងតម្លៃនៅតាមទីប្រជុំជនក្នុងខេត្តផ្សេងៗទៀត ឃើញថា តម្លៃខុនដូរនៅក្នុងរាជធានីមួយនេះ បានកើនឡើងពីជាង១៤%នៅឆ្នាំ២០២២ ដល់ជាង១៧%នៅឆ្នាំ២០២៣ ខណៈដែលប្រាក់ចំណូលពលរដ្ឋបានកើនឡើងបន្តិចបន្តួចប៉ុណ្ណោះនៅក្នុងឆ្នាំ២០២៣ ប៉ុន្តែតម្លៃផ្ទះខុនដូជាមធ្យមបានហក់ឡើងពីតម្លៃជាង៥៦ម៉ឺនដុល្លារ ដល់ជិត៧០ម៉ឺនដុល្លារនៅឆ្នាំដដែលនោះ។
កត្តាដែលជំរុញឱ្យតម្លៃខុនដូកើនខ្ពស់បែបនេះ មួយផ្នែកគឺដោយសារតែតម្លៃដីកើនឡើងគួបផ្សំតម្លៃសាងសង់កាន់តែខ្ពស់ផងដែរ។ ទន្ទឹមនេះ វាក៏ដោយសារតែ អ្នកវិនិយោគក្នុងស្រុក និងបរទេសដែលសម្បូរទ្រព្យធន បានចាក់បញ្ចូលប្រាក់កាន់តែច្រើនទៅក្នុងអចលនទ្រព្យថ្លៃៗនៅកណ្តាលទីក្រុងតូក្យូ ក្នុងក្ដីសង្ឃឹមថា តម្លៃខុនដូនឹងបន្តកើនឡើងថែមទៀតនាពេលអនាគត។
លោក ម៉ាសាយូគី តាកាហាស៊ី (Masayuki Takahashi) ប្រធានអ្នកវិភាគនៅក្រុមហ៊ុន Tokyo Kantei បាននិយាយថា គោលបំណងនៃការទិញខុនដូនៅទីក្រុងតូក្យូមានភាពខុសៗគ្នា គឺចាប់ពីការទិញដើម្បីរស់នៅរហូតដល់ទិញ ដើម្បីទុកលក់ចំណេញ ឬការវិនិយោគ។ ហើយក្រុមហ៊ុនរបស់លោកក៏បានមើលឃើញទំនោររបស់អ្នកអភិវឌ្ឍន៍កំពុងបង្កើនការសាងសង់លំនៅឋានប្រណីតៗសម្រាប់អ្នកដែលមានទ្រព្យសម្បត្តិច្រើនផងដែរ៕
