តើប្រទេសនៅអាស៊ានណាខ្លះ ដែលកំពុងចរចា និងសម្រេចបានកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប?

សារព័ត៌មាន The Straits Times បានរាយការណ៍ថា ប្រធានគណៈកម្មការអឺរ៉ុប លោកស្រី យូស៊ូឡា វ័នឌ័រ ឡេយ៉េន (Ursula von der Leyen) បានប្រកាសនៅលើបណ្តាញសង្គម X នៅថ្ងៃទី២២ ខែកញ្ញា ថា លោកស្រីបានពិភាក្សាជាមួយប្រធានាធិបតីហ្វីលីពីន លោក ហ្វឺឌីណង់ ម៉ាកូស (Ferdinand Marcos) ដោយភាគីទាំងពីរបានឯកភាពរួមគ្នាលើកិច្ចព្រមព្រៀងមូលដ្ឋានក្នុងការឈានទៅសម្រេចកិច្ចព្រមព្រៀងពាណិជ្ជកម្មសេរីក្នុងពេលឆាប់ៗខាងមុខនេះ។
ពាក់ព័ន្ធនឹងការវិវត្តដ៏វិជ្ជមាននេះ ស្នងការអឺរ៉ុប ទទួលបន្ទុកពាណិជ្ជកម្ម និងសន្តិសុខសេដ្ឋកិច្ចលោក ម៉ាកូស សេហ្វកូវិច (Maros Sefcovic) និងរដ្ឋមន្ត្រីក្រសួងពាណិជ្ជកម្មហ្វីលីពីន លោកស្រី ម៉ា គ្រីស្ទីណា រ៉ូក (Ma. Cristina Roque) បានចេញសេចក្តីថ្លែងការណ៍រួមដោយគូសបញ្ជាក់ថា នេះជាកិច្ចព្រមព្រៀងជាមូលដ្ឋានដ៏មានសារសំខាន់ ដែលជួយតម្រង់ទិសការចរចាឱ្យស្ថិតនៅលើផ្លូវដ៏ច្បាស់លាស់ និងឆ្ពោះទៅរកការបិទបញ្ចប់ដោយជោគជ័យនៅប៉ុន្មានខែខាងមុខនេះ។
តំណាងជាន់ខ្ពស់ នៃភាគីទាំងពីរបានណែនាំឱ្យក្រុមការងារបច្ចេកទេសបង្កើនល្បឿនបញ្ចប់កិច្ចព្រមព្រៀងនេះឱ្យបានឆាប់រហ័សបំផុត។ ភាគីទាំងពីរបានសង្កត់ធ្ងន់ថា កិច្ចព្រមព្រៀងប្រវត្តិសាស្ត្រនេះ មិនត្រឹមតែពង្រឹងទំនាក់ទំនងពាណិជ្ជកម្ម និងការវិនិយោគទ្វេភាគីឱ្យកាន់តែស៊ីជម្រៅប៉ុណ្ណោះទេ ប៉ុន្តែថែមទាំងធ្វើឱ្យខ្សែច្រវាក់ផ្គត់ផ្គង់មានភាពចម្រុះ និងមានភាពធន់ខ្ពស់ ចំពេលដែលសេដ្ឋកិច្ចពិភពលោកកំពុងប្រឈមនឹងបម្រែបម្រួល និងភាពមិនប្រាកដប្រជា។
គួររំលឹកថា ក្នុងចំណោមសមាជិកអាស៊ាន មានតែសិង្ហបុរី និងវៀតណាមប៉ុណ្ណោះ ដែលមានកិច្ចព្រមព្រៀងពាណិជ្ជកម្មសេរីចូលជាធរមានដោយផ្ទាល់ជាមួយសហភាពអឺរ៉ុប។ ដោយឡែក ឥណ្ឌូនេស៊ី បានបើកការចរចាតាំងពីឆ្នាំ២០១៦ ថៃ បានចាប់ផ្តើមឡើងវិញនៅឆ្នាំ២០២៣ និងម៉ាឡេស៊ី នៅដើមឆ្នាំ២០២៥។
បច្ចុប្បន្នអាស៊ាន ជាដៃគូពាណិជ្ជកម្មធំជាងគេទី៣ របស់សហភាពអឺរ៉ុប បន្ទាប់ពីចិន និងសហរដ្ឋអាម៉េរិក ដោយទំហំពាណិជ្ជកម្មទំនិញមានប្រមាណ៣០០ពាន់លានដុល្លារ និងពាណិជ្ជកម្មសេវាកម្មមានប្រមាណ ១៦០ពាន់លានដុល្លារអាម៉េរិក៕

ដោយៈ សរ សុជាតិ