ទីបំផុតតុលាការធម្មនុញ្ញបានសម្រេចបញ្ចប់តំណែងលោក យូន ពីប្រធានាធិបតីកូរ៉េខាងត្បូង

ក្រោយព្យួរតំណែងប្រធានាធិបតីអស់រយៈពេលជាច្រើនខែ នៅទីបំផុតតុលាការធម្មនុញ្ញកូរ៉េខាងត្បូងនៅថ្ងៃទី៤ ខែមេសា ឆ្នាំ២០២៥ បានសម្រេចបណ្ដេញលោក យូន ស៊ុកយុល ចេញពីតំណែងប្រធានាធិបតី និងតម្កល់ទុកញត្តិចោទប្រកាន់របស់សភាប្រឆាំងនឹងរូបលោកជុំវិញការដាក់ច្បាប់អាជ្ញាសឹករយៈពេលខ្លីកាលពីចុងឆ្នាំមុន ដែលបង្កឱ្យមានវិបត្តិនយោបាយដ៏អាក្រក់បំផុតមិនធ្លាប់មាននៅកូរ៉េខាងត្បូងនៅក្នុងរយៈពេលជាច្រើនទសវត្សរ៍មកនេះ។

ប្រធានតុលាការធម្មនុញ្ញស្តីទីរបស់កូរ៉េខាងត្បូងលោក មូន យុង បេ (Moon Hyung-bae) បានលើកឡើងថា ការណ៍ដែលតុលាការធម្មនុញ្ញសម្រេចបណ្តេញលោក យូន ចេញពីតំណែងនេះក៏ដោយសារតែតុលាការបានរកឃើញថា លោក យូន បានរំលោភលើតួនាទីជាប្រធានាធិបតីដោយធ្វើសកម្មភាពលើសពីសិទ្ធិអំណាចដែលបានកំណត់នៅក្នុងរដ្ឋធម្មនុញ្ញ។

លោក មូន បាននិយាយនៅក្នុងតុលាការថា លោក យូន បានក្បត់ពេញទំហឹងចំពោះទំនុកចិត្តរបស់ប្រជាជនដែលជាសមាជិកអធិបតេយ្យនៃសាធារណរដ្ឋប្រជាធិបតេយ្យ។ ប្រជាជនរាប់ពាន់នាក់ទាំងអ្នកប្រឆាំង និងអ្នកគាំទ្រលោក យូន បានប្រមូលផ្ដុំគ្នានៅខាងក្រៅតុលាការដោយពួកគេបានបង្ហាញអារម្មណ៍ច្របូកច្របល់ក្នុងចិត្តចំពោះការសម្រេចចិត្តនេះ។

ក្រុមអ្នកប្រឆាំងនឹងលោក យូន បានត្រេកអរនៅពេលបានឮសេចក្តីប្រកាសនេះភ្លាមដោយពួកគេបានឱបយំជាមួយនឹងក្រុមបាតុករផ្សេងទៀត ចំណែកអ្នកគាំទ្រលោក យូន វិញហាក់មានអារម្មណ៍អស់សង្ឃឹមក្នុងចិត្ត ហើយក៏មានអ្នកយំសោកផងដែរ ខណៈអ្នកផ្សេងទៀតមើលទៅ

អត្ថបទ៖ សុខ មង្គល