កូវីដ១៩ អូមីក្រុង មិនរំខានដល់អាជីវករលក់គ្រឿងរណ្ដាប់ និង គ្រឿងលម្អតុបតែងផ្ទះក្នុងពិធីបុណ្យចូលឆ្នាំចិន-វៀតណាមឆ្នាំនេះទេ

សម្រាប់អាជីវករលក់ដូរគ្រឿងរណ្ដាប់ និង គ្រឿងលម្អតុបតែងផ្ទះក្នុងពិធីបុណ្យចូលឆ្នាំប្រពៃណីចិន-វៀតណាម មួយចំនួនបានបង្ហាញពីភាពសប្បាយរីករាយដោយសារតែឆ្នាំនេះ សម្ទុះនៃការលក់របស់ពួកគាត់មានការកើនឡើងជាងឆ្នាំមុនៗ ក៏ប៉ុន្តែអាជីវករមួយចំនួនទៀត បានបង្ហាញពីការព្រួយបារម្ភអំពីករណីឆ្លងកូវីដ១៩បំប្លែងថ្មីអូមីក្រុងផងដែរ។

ក្រុមអាជីវករលក់គ្រឿងរណ្ដាប់សែនចិនមួយចំនួននៅក្នុងផ្សារអូឬស្សី បានរៀបរាប់ប្រាប់សារព័ត៌មានឌីជីថលខេមបូណូមីសថា ដ្បិតឆ្នាំនេះ មានការរាតត្បាតកូវីដ១៩ ពិសេសមានវត្តមានវីរុសបំប្លែងថ្មី អូមីក្រុង តែពួកគាត់នៅតែលក់ដាច់ជាធម្មតា ហើយហាក់មានការលក់ដាច់ជាងឆ្នាំមុនបន្តិច ខណៈតម្លៃទំនិញក៏ហាក់ឡើងថ្លៃជាងឆ្នាំមុនបន្តិចផងដែរ។

មិនសូវខុសគ្នាប៉ុន្មានពីអាជីករលក់គ្រឿងរណ្ដាប់សែនចិននោះទេ ក្រុមអ្នកលក់ផ្កាអង្គារសីល្ប៍ ដើម្បីតាំងលម្អលំនៅដ្ឋាននៅអំឡុងពិធីបុណ្យចូលឆ្នាំចិន ក៏បានអះអាងដែរថា ឆ្នាំនេះការលក់ផ្ការបស់ពួកគាត់មានម្លៃប្រហាក់ប្រហែលនឹងឆ្នាំមុន និងមានអ្នកទិញជាធម្មតា។ ក៏ប៉ុន្តែ យ៉ាងណាសម្រាប់អ្នកលក់ផ្កា ហាក់មិនសូវរំពឹងខ្លាំងពេកនោះទេ ចំពោះការលក់ផ្កាអង្គាសីល៍្ប ដោយសារតែក្រុមអាជីវករ ក៏មានការបារម្ភខ្លះដែរ ពីជំងឺកូវីដ១៩។ តម្លៃផ្កាអង្គារសីល៍្បឆ្នាំមានតម្លៃ ចាប់ពី ២០ដុល្លារ ទៅប្រមាណ ២០០ដុល្លារ ទៅតាមទំហំរបស់វា។

ក្រុមអាជីវករបានអះអាងថា បើទោះបីជាអូមីក្រុងឆ្លងចូលសហគមន៍ក៏ដោយ ប៉ុន្ដែ ពួកគាត់នៅតែរំពឹងថានៅការលក់ដូររបស់ពួកគាត់នៅអំឡុងថ្ងៃបុណ្យចូលឆ្នាំចិន-វៀតណាមនេះ អាចនឹងប្រសើរជាងឆ្នាំមុន ។ ទន្ទឹមនឹងនោះ វិធានការទប់ស្កាត់ការឆ្លងកូវីដ១៩ ៣កុំ ៣ការពារ ក៏នៅតែកិច្ចការដែលត្រូវអនុវត្តប្រចាំថ្ងៃ ដើម្បីសុវត្ថិភាពពីការឆ្លងកូវីដ១៩៕

អត្ថបទ សោម ស្រីពេជ្រ