សហព័ន្ធស្រូវអង្ករកម្ពុជា តាមរយៈបណ្ដាញហ្វេសប៊ុកផ្សព្វផ្សាយផ្លូវការរបស់ខ្លួន បាននាពេលថ្មីៗនេះ លើកឡើងថា នៅត្រឹមឆ្នាំ២០២២ ខាងមុខនេះ សហព័ន្ធនឹងខិតខំធ្វើយ៉ាងណាជំរុញការនាំចេញអង្កររបស់កម្ពុជា ឲ្យសម្រេចបានបរិមាណ១លានតោន ដែលក្នុងនោះ ៣៥% នាំចេញទៅទីផ្សារចិន ៣០% នាំទៅអឺរ៉ុប និង ៣០%ទៀត នាំទៅបណ្ដាប្រទេសអាស៊ាន និងនាំទៅអាមេរិក ៥%។
បើតាមការគូសបញ្ជាក់របស់សហព័ន្ធស្រូវអង្ករកម្ពុជា គោលដៅ នាំចេញអង្ករ១លានតោនថ្មីនេះដែរ គឺនឹងនាំចេញប្រភេទអង្ករក្រអូបប្រណិត ៣០% អង្ករក្រអូបធម្មតា ៤០% និង ៣០% ទៀតជាអង្ករសធម្មតា។
បន្ថែមពីនេះទៀត ដើម្បីបំពេញតម្រូវការនាំចេញនេះ សហព័ន្ធបានបញ្ជាក់ថា ក៏មានត្រៀមកញ្ចប់ឥណទាន ក្នុងអត្រាការប្រាក់ពិសេស ចំនួន២០០លានដុល្លារ សម្រាប់បំពេញបន្ថែម ក្នុងការទិញស្រូវ នារដូវប្រមូលផល។ កញ្ចប់ថវិកា ២០០លាននេះ អាចទិញបានស្រូវ ប្រមាណជា ត្រឹម ៥០ម៉ឺនតោនស្រូវ នារដូវប្រមូលផល ជាពិសេសស្រូវ ពពួកពូជ ផ្កាម្លិះ។
អត្ថបទទាក់ទង!
ការប្រកាសឡើងពីផែនការនាំចេញអង្ករ១លានតោន របស់សហព័ន្ធស្រូវអង្ករកម្ពុជានេះ គឺកំពុងធ្វើឲ្យអ្នកតាមដានសេដ្ឋកិច្ចសង្គមជាច្រើន បានដាក់ការចាប់អារម្មណ៍ និងរង់ចាំមើលពីលទ្ធផល ថាតើពិតជាអាចសម្រេចបានតាមគោលដៅដែរ ឬយ៉ាងណា? ដ្បិតអី កន្លងមកនេះ កម្ពុជាក៏ធ្លាប់មានគោលដៅ នាំចេញអង្ករ១លានតោននៅឆ្នាំ២០១៥ ដែរ ប៉ុន្ដែផែនការនេះ មិនបានទទួលជោគជ័យនៅឡើយទេ។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងរយៈពេល ៩ខែ នៅឆ្នាំ២០១៩នេះ កម្ពុជាបាននាំចេញអង្ករប្រមាណ ៤០ម៉ឺនតោន កើនឡើងប្រមាណតែជាង ២% បើធៀបនឹងបិរមាណនាំចេញអង្ករកាលពី ៩ខែឆ្នាំ២០១៨។ ក្នុងនោះ ប្រទេសចិននៅតែឈរក្នុងលំដាប់កំពូលតារាងដែលបាននាំចូលអង្ករពីកម្ពុជាច្រើនជាងគេ ដែលមានប្រមាណ ១៦ម៉ឺនតោន ខណៈដែលនាំទៅអឺរ៉ុប មានជាង ១៣ម៉ឺន ៦ពាន់តោន ស្មើនឹងជិត៣៤% នៃ បិរមាណអង្ករនាំចេញសរុប និងនាំទៅប្រទេសអាស៊ាន មានប្រមាណ៥ម៉ឺន ៣ពាន់តោន ដែលមានជាង១៣% នៃបរិមាណអង្ករនាំចេញសរុប។
ជុំវិញនឹងការនាំចេញអង្ករនេះដែរ សហព័ន្ធស្រូវអង្ករកម្ពុជា ធ្លាប់បានអះអាងដែរថា ទោះបី និន្នាការទីផ្សារនៅសហគមន៏អឺរ៉ុប នារយៈពេល ៩ខែឆ្នាំនេះ បានធ្លាក់ចុះប្រមាណ ជាជិត ៣០% ដោយការ អនុវត្តន៏វិធានយកពន្ធពីសំណាក់សហគមអឺរ៉ុបក៏ដោយ តែទីផ្សារប្រទេសចិន បានហក់ឡើង ដោយមានកំណើនជាង ៤៤%។ ទន្ទឹមនឹងកំណើនទីផ្សារប្រទេសចិន ទីផ្សាររបស់ប្រទេសអាស៊ាន ដូចជា ម៉ាឡេស៊ី ប៊្រុយណេ ក៏មានកំនើនជាង ២៧%ផងដែរ ខណៈដែល ទីផ្សារប្រទេសផ្សេងៗមួយចំនួនទៀតក៏មានកំណើនប្រមាណជា ជាង១៦%ដែរ៕
None
