លោក ដូណាល់ ត្រាំ គំ.រាមយកពន្ធសងសឹកប្រឆាំងអឺរ៉ុប និងកាណាដា ដែលហ៊ានយកពន្ធសេវាឌីជីថលលើបណ្ដាក្រុមហ៊ុនបច្ចេកវិទ្យាយក្សអាម៉េរិក

លោក ដូណាល់ ត្រាំ បានបញ្ជាឱ្យការិយាល័យតំណាងពាណិជ្ជកម្មអាម៉េរិក ពិចារណាដាក់ពន្ធសងសឹកប្រឆាំងបណ្ដាប្រទេសនៅអឺរ៉ុប និងប្រទេសកាណាដា ដោយសារប្រទេសទាំងនោះយកពន្ធលើសេវាឌីជីថលពីបណ្ដាក្រុមហ៊ុនបច្ចេកវិទ្យាយក្សរបស់សហរដ្ឋអាម៉េរិក។ អ្នកជំនាញមើលឃើញថា នេះអាចជាជុំដំបូងនៃពន្ធសងសឹកប្រកាសដោយលោក ដូណាល់ ត្រាំ។

កាលពីថ្ងៃទី១៣ ខែកុម្ភៈ លោក ដូណាល់ ត្រាំ បានបញ្ជាឱ្យបើកការស៊ើបអង្កេតលើប្រទេសនានា ដែលយកពន្ធខ្ពស់ ឬដាក់របាំងពាណិជ្ជកម្មលើទំនិញរបស់សហរដ្ឋអាម៉េរិក ដែលនាំចូលទៅកាន់ទីផ្សាររបស់ពួកគេ។ រដ្ឋាភិបាលសហរដ្ឋអាម៉េរិក បានគំរាមថា ប្រទេសនានា ដែលយកពន្ធលើការផ្ដល់សេវាឌីជីថលពីបណ្ដាក្រុមហ៊ុនបច្ចេកវិទ្យាអាម៉េរិកនឹងមិនរួចខ្លួននោះឡើយ ពោលគឺសហរដ្ឋអាម៉េរិកនឹងដាក់ពន្ធសងសឹកវិញ។

បទបញ្ជាដែលលោក ដូណាល់ ត្រាំ បានចុះហត្ថលេខាកាលពីថ្ងៃសុក្រ សប្ដាហ៍មុន បានបញ្ជាឱ្យការិយាល័យតំណាងពាណិជ្ជកម្មអាម៉េរិកស៊ើបអង្កេតករណីយកពន្ធលើការផ្ដល់សេវាឌីជីថលពីបណ្ដាក្រុមហ៊ុនបច្ចេកវិទ្យាអាម៉េរិក ហើយពិចារណាដាក់ចេញវិធានការសងសឹកវិញ ដូចជា ការដំឡើងពន្ធជាដើម។ ការស៊ើបអង្កេតនេះគ្រោងនឹងបញ្ចប់ជាស្ថាពរនៅថ្ងៃទី១ ខែមេសា ឆ្នាំនេះ។

សូមបញ្ជាក់ថា ពន្ធលើការផ្ដល់សេវាឌីជីថល គឺជាពន្ធលើប្រាក់ចំណូលដែលបណ្ដាក្រុមហ៊ុនបច្ចេកវិទ្យានានា រកបានពីការផ្សាយពាណិជ្ជកម្ម និងសកម្មភាពផ្សេងៗទៀត។ ខុសពីពន្ធសាជីវកម្ម ពន្ធលើការផ្ដល់សេវាឌីជីថលនេះ គឺគិតលើប្រាក់ចំណូល គឺមិនមែនគិតលើប្រាក់ចំណេញនោះទេ៕

ដោយ: តែម សុខុម