លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា កត់សម្គាល់ឃើញថា ការធ្វើពហិការមិនប្រើប្រាស់ផលិតផលថៃ របស់ពលរដ្ឋខ្មែរនៅមួយរយៈកន្លងមកនេះ បានជះឥទ្ធិពលយ៉ាងខ្លាំងដល់ផលិតផលថៃ ដែលកំពុងចរាចរណ៍ដាក់លក់នៅលើទីផ្សារកម្ពុជា ដែលជំរុញក្រុមហ៊ុននាំចូលបង្ខំចិត្តលក់បញ្ចុះតម្លៃយ៉ាងសម្បើម។ លទ្ធផលនេះ បានឆ្លុះបញ្ចាំងឱ្យឃើញពីភាពឈឺចាប់របស់ពលរដ្ឋខ្មែរចំពោះការឈ្លានពានយ៉ាងព្រៃផ្សៃរបស់កងទ័ពថៃ និងការធ្វើសកម្មភាពស្មោកគ្រោកពីក្រុមជ្រុលនិយមថៃមួយចំនួន ដែលគំរាមបាញ់ទឹកលូមកលើពលរដ្ឋកម្ពុជា។ លោកបណ្ឌិតបានសង្កត់ធ្ងន់ថា ការធ្វើពហិការរបស់ពលរដ្ឋខ្មែរហាក់មិនទាន់ស្មើនឹងទិដ្ឋភាព ដែលថៃ បានប្រមាថលើកម្ពុជា នោះទេ ដែលកត្តានេះ អ្នកជំនាញរូបនេះអំពាវនាវដល់ពលរដ្ឋខ្មែរគួរសិក្សាររៀនសូត្រពីទង្វើ និងចេតនារបស់ថៃ ដោយត្រូវយកការឈឺចាប់បំលែងទៅជាចលនាខ្មែរនិយម គាំទ្រផលិតផលក្នុងស្រុក និងគាំទ្រដល់អ្នកវិនិយោគទាំងជាតិ និងអន្តរជាតិ។
ជាមួយគ្នានេះ លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា សង្កេតឃើញថា ឥទ្ធិពលនៃការធ្វើពហិការឈប់ប្រើប្រាស់ផលិតផលថៃ បានធ្វើឱ្យអ្នកលក់ផលិតផលថៃ មួយចំនួនបង្ខំចិត្តដាក់លក់បញ្ចុះតម្លៃយ៉ាងសម្បើម តែក្រោមស្មារតីជាតិនិយម ពលរដ្ឋខ្មែរនៅតែមិនគាំទ្រផលិតផលទាំងនោះ។ អ្នកជំនាញរូបនេះបានចាត់ទុកការធ្វើពហិការនេះ វាជាឱកាសដ៏ល្អមួយក្នុងការស្រូបទាញអ្នកវិនិយោគបរទេសក្នុងប្រទេសថៃ ឱ្យមកបោះទុនវិនិយោគនៅកម្ពុជា តាមរយៈការពង្រីកសាខានៅក្នុងប្រទេសកម្ពុជា។ តែយ៉ាងណាដើម្បីអាចបើកឱកាសដល់អ្នកវិនិយោគបរទេសទាំងនោះ ទាមទារឱ្យរដ្ឋាភិបាលគួរតែសម្រួលបរិយាកាសបង្កភាពងាយស្រួលដល់អ្នកទាំងនោះ តាមរយៈការលុបបំបាត់ការការកិបកេងប្រាក់ក្រៅប្រព័ន្ធ និងលុបបំបាត់នីតិវិធីស្មុគស្មាញក្នុងការដំណើរការផលិតកម្ម ដើម្បីជំរុញដល់បរិយាកាសវិនិយោគកាន់តែមានភាពអំណោយផល។
អត្ថបទគួរអាន
មិនខុសគ្នានោះទេ លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ច យល់ឃើញថា ភាពឈឺចាប់នៃជម្លោះព្រំដែនកម្ពុជា ជាមួយថៃ ហាក់នៅដិតដាមក្នុងចិត្តពលរដ្ឋខ្មែរ ដែលបញ្ហានេះអាចនឹងធ្វើឱ្យពលរដ្ឋបន្តធ្វើពហិការមិនប្រើប្រាស់ទំនិញរបស់ថៃ យូរបន្ថែមទៀត។ ជាការកត់សម្គាល់របស់អ្នកជំនាញរូបនេះ ចាប់តាំងពីការពលរដ្ឋខ្មែរធ្វើពហិការបានធ្វើឱ្យការលក់ និងនាំចូលទំនិញជាច្រើនពីថៃ ត្រូវបានជាប់គាំង ដែលកត្តានេះវាអាចនឹងជួយស្រូបទាញវិនិយោគិនបរទេសនៅក្នុងប្រទេសថៃ ឱ្យងាកមកបង្កើតខ្សែច្រវាក់ផលិតកម្មនៅកម្ពុជា ដែលអាចជួយអភិវឌ្ឍន៍សេដ្ឋកិច្ច បង្កើតឱកាសការងារ បង្កើនផលិតកម្ម ក៏ដូចជាបង្កើនការនាំចេញផលិតផលពីកម្ពុជា ទៅទីផ្សារអន្តរជាតិ។
ដោយឡែក លោកបណ្ឌិត ឌុច ដារិន្ទ សាស្រ្តាចារ្យសេដ្ឋកិច្ច កត់សម្គាល់ឃើញថា ការធ្លាក់ចុះបរិមាណលក់ និងតម្លៃផលិតផលពីប្រទេសថៃនេះ បានបង្ហាញឱ្យឃើញពីការកែលម្អការជ្រើសរើសរបស់អ្នកប្រើប្រាស់កម្ពុជា។ អ្នកជំនាញរូបនេះ សង្កេតឃើញថា ការថយចុះតម្រូវការផលិតផលបរទេស វាជាឱកាសដ៏សំខាន់សម្រាប់កសិករ និងរោងចក្រកែច្នៃក្នុងស្រុក ពិសេសវិស័យអាហារ និងភេសជ្ជៈ។ ជាក់ស្ដែង ករណីទឹកដោះគោស្រស់របស់ថៃ អាចបើកផ្លូវឲ្យកសិករខ្មែរ និងរោងចក្រកែច្នៃបង្កើនសមត្ថភាពផលិត និងផ្គត់ផ្គង់ ដើម្បីឆ្លើយតបទៅតាមតម្រូវការក្នុងស្រុកបន្ថែមទៀត។
បើតាមលោកបណ្ឌិត ឌុច ដារិន្ទ ការបាត់បង់ចំណែកទីផ្សាររបស់ផលិតផលថៃនេះ ក៏អាចទាក់ទាញវិនិយោគិនអន្តរជាតិ ឲ្យចាប់អារម្មណ៍លើការវិនិយោគផលិតទឹកដោះគោស្រស់នៅកម្ពុជា ផងដែរ។ បន្ថែមលើនេះ កម្ពុជា ក៏មានស្ថិរភាពនយោបាយ កម្លាំងពលករវ័យក្មេង និងគោលនយោបាយលើកទឹកចិត្តអ្នកវិនិយោគ ដែលជាចំណុចទាក់ទាញសម្រាប់ពង្រឹងឧស្សាហកម្មក្នុងស្រុក និងបង្កើនសមត្ថភាពប្រកួតប្រជែងនៅលើទីផ្សារ៕
អត្ថបទ៖ ជា ម៉ារ៉ា
