សហភាពអឺរ៉ុបបានប្រកាសកាលពីខែកុម្ភៈ ឆ្នាំ២០១៩ ថា ខ្លួនបានចាប់ផ្តើមដំណើរការនីតិវិធីផ្អាកជាបណ្តោះអាសន្ន នូវប្រព័ន្ធអនុគ្រោះពន្ធ EBA បន្ទាប់ពីបានលើកឡើងពីការព្រួយបារម្ភអំពីលទ្ធិប្រជាធិបតេយ្យ សិទ្ធិមនុស្ស និងសិទ្ធិនយោបាយនៅកម្ពុជា។
លោកស្រី Cecilia Malmström ស្នងការអឺរ៉ុបទទួលបន្ទុកពាណិជ្ជកម្ម បានសរសេរនៅលើ twitter នៅថ្ងៃទី១២ វិច្ឆិកានេះ ថា [គណៈកម្មការអឺរ៉ុប] បញ្ចប់របាយការណ៍របស់ខ្លួនជាស្ថាពរហើយ ស្ដីពីការព្យួរជាបណ្ដោះអាសន្ន នូវប្រព័ន្ធអនុគ្រោះពន្ធ EBA សម្រាប់កម្ពុជា។
លោកស្រីនិយាយដូច្នេះថា «យើងបារម្ភខ្លាំងណាស់អំពីស្ថានភាពសិទ្ធិមនុស្សនៅទីនោះ [នៅកម្ពុជា]។ ឥឡូវ កម្ពុជាមានពេលមួយខែ ដើម្បីឆ្លើយតប មុនពេលសេចក្ដីសម្រេចចិត្តចុងក្រោយ នឹងធ្វើឡើងនៅខែកុម្ភៈ ឆ្នាំ២០២០។»
អត្ថបទទាក់ទង
គួររំឭកថា នៅដើមខែវិច្ឆិកានេះ សមាគមរោងចក្រកាត់ដេរកម្ពុជា បានព្រមានជាថ្មីម្ដងទៀត អំពីហានិភ័យដែលអាចកើតមានឡើងជុំវិញនឹងការព្យួរប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែសព្វាវុធ (EBA) ដែលវាអាចនឹងធ្វើឲ្យប៉ះពាល់ដល់ការនាំចេញ និងបាត់បង់ការងាររាប់ម៉ឺនកន្លែងផងដែរ បើ EBAនេះ ពិតជាត្រូវបានដក ឬព្យួរមែន។
ប៉ុន្តែ នៅមុននេះ នាយករដ្ឋមន្រ្តី សម្តេច ហ៊ុន សែន កាលពីខែតុលា បានអំពាវនាវសូមឲ្យក្រុមហ៊ុនចិនដែលកំពុងដាក់ទុនវិនិយោគនៅកម្ពុជា បន្តវិនិយោគរបស់ខ្លួន បើទោះបីជាមានបញ្ហាអ្វីក៏ដោយ ជាពិសេស បើសិនជាមានការដកប្រព័ន្ធអនុគ្រោះពន្ធ «មុខទំនិញគ្រប់យ៉ាង លើកលែងតែអាវុធ» ឬហៅកាត់ថា EBA ចេញពីកម្ពុជា ក៏ដោយ។
កម្ពុជាគឺជាប្រទេសទទួលផលប្រយោជន៍ធំបំផុតទីពីរ ពីប្រព័ន្ធអនុគ្រោះពន្ធ EBA នេះ ដោយកាលពីឆ្នាំ២០១៨ កម្ពុជានាំចេញទំនិញ ដែលភាគច្រើនបំផុតជាសម្លៀកបំពាក់កាត់ដេរ និងស្បែកជើង មានទំហំទឹកប្រាក់ដល់ទៅ ៥,៣ពាន់លានអឺរ៉ូ (ឬប្រហែល ៥,៨៤ពាន់លានដុល្លារអាមេរិក ទៅកាន់ទីផ្សារអឺរ៉ុប ដោយរួចពន្ធ។
ធនាគារពិភពលោក កន្លងមក ធ្លាប់បានចេញរបាយការណ៍មួយ ដែលប៉ាន់ប្រមាណថា កម្ពុជាអាចនឹងធ្លាក់ចុះចំណូលពីការនាំចេញប្រហែលជាង ៦៥០លានដុល្លារអាមេរិក ប្រសិនបើសហភាពអឺរ៉ុបពិតជាសម្រេចព្យួរប្រព័ន្ធអនុគ្រោះពន្ធ EBA ពីកម្ពុជាមែននោះ៕
