ក្រុមហ៊ុនផលិតរថយន្តអគ្គិសនី VinFast របស់វៀតណាម ចែកចាយរថយន្តអគ្គិសនីបានចំនួនជាង៣ម៉ឺន៦ពាន់គ្រឿងនៅត្រីមាសទី១ឆ្នាំ២០២៥ មានការកើនឡើងជិត៣០០% បើធៀបនឹងរយៈពេលដូចគ្នាកាលពីឆ្នាំ២០២៤។ ការចែកចាយរថយន្តនេះជួយឱ្យក្រុមហ៊ុននេះទទួលបានចំណូលជាង៦៥៦លានដុល្លារកើនឡើងជិត១៥០% នៅត្រីមាសទី១ឆ្នាំនេះ បើធៀបនឹងរយៈពេលដូចគ្នាកាលពីឆ្នាំ២០២៤។
ទោះបរិមាណលក់ និងប្រាក់ចំណូលរបស់ក្រុមហ៊ុននេះ មានការកើនឡើងក៏ពិតមែន ប៉ុន្តែក្រុមហ៊ុននេះមានការខាតបង់ថវិកាសុទ្ធរហូតដល់៧១២លានដុល្លារនៅក្នុងរយៈពេលដូចគ្នានេះ។ តែយ៉ាងណា ក្រុមហ៊ុននេះមិនបានបង្ហាញពីមូលហេតុនៃការខាតបង់នេះនោះទេ។ ទោះបីយ៉ាងនេះក្តី ក្រុមហ៊ុនរបស់ប្រទេសក្បែរខាងកម្ពុជា មួយនេះ មានមហិច្ឆតាចង់ប្រកួតប្រជែងជាមួយក្រុមហ៊ុនខ្នាតយក្សពិភពលោកមួយចំនួនរួមទាំងក្រុមហ៊ុនផលិតរថយន្តអគ្គិសនីថេស្លារបស់អាម៉េរិក ផងដែរ។
សូមបញ្ជាក់ថា កាលពីឆ្នាំ២០២៤ ក្រុមហ៊ុនវីនហ្វាស បានខាតបង់ជាង៣ពាន់លានដុល្លារ បើទោះបីជាការចែកចាយរថយន្តអគ្គិសនីរបស់ខ្លួនមានការកើនឡើង៣ដងក៏ដោយ៕
ដោយ៖ សុខ មង្គល
