បើតាមការគ្រោងទុក ក្រុមហ៊ុនផលិតវ៉ាក់សាំងអាមេរិក Pfizer BioNTech ត្រូវប្រគល់វ៉ាក់សាំងមកឲ្យអឺរ៉ុបដែលគេបានបញ្ជាទិញចំនួន១០០លានដូស ត្រឹមត្រីមាសទី៣ឆ្នាំ២០២១នេះ។ ប៉ុន្តែ Pfizer បានបញ្ជូនវ៉ាក់សាំងជើងទី១មកមុន ក្នុងចំនួន១០លានដូសដែលប្រការនេះបែរជាធ្វើឲ្យប្រទេសមួយចំនួនមានការខ្វែងគំនិត រឿងចែកវ៉ាក់សាំងគ្នាមិនស្មើទៅវិញ។
បើតាមរូបមន្ត វ៉ាក់សាំងទាំង១០លានដូសនោះ គេត្រូវដកប្រមាណ៣លានដូសសម្រាប់បន្ថែមឲ្យប្រទេស៥នៅអឺរ៉ុបដែលកំពុងមានកំណើនអ្នកឆ្លងនិងស្លាប់ដោយសារកូវីដ១៩ច្រើន។ ក្រៅពីនោះវ៉ាក់សាំងដែលនៅសល់នឹងត្រូវបែងចែក ទៅតាមរូបមន្តសមាមាត្រប្រជាជន ពោលគឺប្រទេសមានប្រជាជនច្រើននឹងត្រូវទទួលបានវ៉ាក់សាំងច្រើន ប្រទេសមានពលរដ្ឋតិចនឹងទទួលបានតិចដូចគ្នា។
អត្ថបទទាក់ទង
ប្រទេសទាំង៥ដែលកំពុងមានបញ្ហាកូវីដខ្លាំងជាងគេនៅអឺរ៉ុបនោះរួមមាន ក្រូអាត អេស្តូនី ឡាតវី ស្លូវ៉ាគី និងប៊ុលហ្ការី។ យ៉ាងណាមិញមានប្រទេស៣ផ្សេងទៀតក្នុងតំបន់អឺរ៉ុបដូចគ្នា ដែលជំទាស់នឹងការផ្តល់វ៉ាក់សាំងបន្ថែមដល់ប្រទេសទាំង៥នេះ។
ប្រទេសអូទ្រីស ស្លូវេនី និងសាធារណៈរដ្ឋឆែក បានជំទាស់និងចេញមុខតវ៉ា ដោយអះអាងថាវាជារឿងអយុត្តិធម៌ក្នុងរឿងបែងចែកវ៉ាក់សាំង ហើយបានលើកឡើងទៀតថា ពលរដ្ឋរបស់ខ្លួនក៏ត្រូវការវ៉ាក់សាំងជាចាំបាច់ដែរ។ ទោះមានការសម្របសម្រួលយ៉ាងណា ក៏ប្រទេសទាំង៣មិនព្រមចែករំលែក ចំនួនវ៉ាក់សាំងដែលខ្លួនត្រូវទទួលបាន ជាមួយប្រទេសទាំង៥ដែលកំពុងជួបការលំបាកដាច់ខាត។
មែនទែនទៅនៅចុងក្រោយ ប្រទេសទាំង៣ដែលបានជំទាស់ ត្រូវអឺរ៉ុបអនុញ្ញាតឲ្យទទួលបានវ៉ាក់សាំងតាមគ្រប់ចំនួនធម្មតា ដោយមិនបានរំលែកឲ្យប្រទេសទាំង៥ដែលកំពុងលំបាកនោះទេ។ ដោយឡែកប្រទេសនៅអឺរ៉ុប ១៩ទៀតដែលមិនបានជំទាស់នឹងការបែងចែក បានបង្ហាញពីសាមគ្គីភាព ជាមួយប្រទេសទាំង៥ដោយសុខចិត្តកាត់បន្ថយវ៉ាក់សាំងដែលខ្លួនត្រូវទទួលបានបន្ថែមទៀត ពោលគឺខ្លួនព្រមទទួលយកវ៉ាក់សាំងតិចជាងមុនទៅទៀត៕None
