
មន្ត្រីគណៈកម្មាការអឺរ៉ុប ដែលតំណាងឱ្យសហភាពអឺរ៉ុប ទាំង២៧ប្រទេស ក្នុងការចរចា ពាណិជ្ជកម្មជាមួយសហរដ្ឋអាម៉េរិក បានរៀបរាប់ប្រាប់ប្រេសិតសហភាពអឺរ៉ុប ពីលទ្ធផលនៃកិច្ចចរចានេះថា ប្លុកនេះកំពុងឈានទៅរកកិច្ចព្រមព្រៀងពន្ធ១៥% សម្រាប់ការនាំចេញទំនិញទៅកាន់ទីផ្សារអាម៉េរិក។ ទោះយ៉ាងណា ប្រធានាធិបតីអាម៉េរិក លោក ដូណាល់ ត្រាំ នឹងសម្រេចចិត្តចុងក្រោយអំពីកិច្ចព្រមព្រៀងនេះ។
នៅក្រោមគម្រោងនៃកិច្ចព្រមព្រៀងដ៏មានសក្តានុពលនេះ អត្រាពន្ធ១៥% អាចអនុវត្តបានតែចំពោះវិស័យមួយចំនួនរួមមានរថយន្ត និងឱសថជាដើម ហើយនឹងមិនត្រូវបានបន្ថែមលើពន្ធរបស់សហរដ្ឋអាម៉េរិក ដែលមានជាយូរមកហើយនោះទេ ដែលជាមធ្យមពន្ធនោះមានត្រឹមតែក្រោម៥% ប៉ុណ្ណោះ។
ក្រុមអ្នកការទូតបាននិយាយថា ក្រោមកិច្ចព្រមព្រៀងនេះ វាក៏អាចមានសម្បទានខ្លះៗសម្រាប់ វិស័យមួយចំនួនដូចជាយន្តហោះ ឈើ និងថ្នាំពេទ្យព្រមទាំងផលិតផលកសិកម្មមួយចំនួនផងដែរ ដោយវិស័យទាំងនេះនឹងមិនប្រឈមនឹងការយកពន្ធឡើយ។ ទោះជាយ៉ាងណា ទីក្រុងវ៉ាស៊ីនតោន ហាក់គ្មានឆន្ទៈក្នុងការបញ្ចុះពន្ធបច្ចុប្បន្ន៥០% របស់ខ្លួនលើដែកថែបនោះឡើយ។
គណៈកម្មាការអឺរ៉ុប បានលើកឡើងកាលពីពេលថ្មីៗថា ការផ្តោតសំខាន់របស់ប្លុកនេះ គឺត្រូវសម្រេចបាននូវលទ្ធផលចរចា ដើម្បីបញ្ចៀសការគម្រាមកំហែងពន្ធខ្ពស់៣០%។ ទន្ទឹមនឹងនេះ អឺរ៉ុប ក៏គ្រោងនឹងដាក់វិធានការតបតពន្ធលើទំនិញអាម៉េរិក មានតម្លៃចំនួន៩៣ពាន់លានអឺរ៉ូ ប្រមាណ១០៩ពាន់លានដុល្លារទៅកាន់សមាជិកសហភាពអឺរ៉ុប ដើម្បីពិនិត្យ និងអនុម័តផងដែរ ខណៈការបោះឆ្នោតត្រូវបានគេរំពឹងថា នឹងធ្វើនៅថ្ងៃព្រហស្បតិ៍ សប្តាហ៍នេះ៕
ដោយ៖ សុខ មង្គល