លោកវេជ្ជបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា បានលើកឡើងថា សមាគម PATA ឱ្យតម្លៃដល់ភាពជាដៃគូស្ថាបនាជាមួយបណ្ដាអង្គការអន្តរជាតិដែលមានការប្តេជ្ញាចិត្តដូចគ្នាក្នុងការជួយផ្សព្វផ្សាយពីប្រទេសកម្ពុជា ដោយទំនួលខុសត្រូវ។ MoU នេះផ្តល់នូវក្របខ័ណ្ឌជាវិជ្ជមានមួយ ដើម្បីគាំទ្រដល់កិច្ចខិតខំប្រឹងប្រែងរបស់ផ្នែកទីផ្សារគោលដៅ និងដើម្បីស្វែងយល់ពីរបៀបដែលនវានុវត្តន៍ឌីជីថលអាចរួមចំណែកដល់ការអភិវឌ្ឍទេសចរណ៍របស់ប្រទេសកម្ពុជាប្រកបដោយចីរភាព។
ជាមួយគ្នានេះលោក Bruno Raffet ប្រធានក្រុមហ៊ុន Sourceamax Asia បានថ្លែងថា ប្រទេសកម្ពុជា មានសក្តានុពលទេសចរណ៍ និងវប្បធម៌ដ៏ធំធេង។ តាមរយៈភាពជាដៃគូនេះ លោកមានគោលបំណងជួយពង្រីកការផ្សព្វផ្សាយពីកម្ពុជាទៅកាន់ពិភពលោក និងលើកទឹកចិត្តដល់ការចូលរួមប្រកបដោយអត្ថន័យជាមួយទីផ្សារអន្តរជាតិ ជាពិសេសនៅទីផ្សារអឺរ៉ុប។
ការចុះ MoU ដែលធ្វើឡើងរវាងលោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា និងលោក Bruno Raffet ប្រធានក្រុមហ៊ុន Sourceamax Asia នេះបានឆ្លុះបញ្ចាំងពីការផ្តោតការយកចិត្តទុកដាក់រួមគ្នាលើតម្លាភាព និរន្តរភាព និងការប្រកួតប្រជែងរយៈពេលវែង។ ភាពជាដៃគូនេះកើតឡើង ស្របពេលដែលកម្ពុជាបន្តពង្រឹងការចូលរួមរបស់ខ្លួនជាមួយទីផ្សារទេសចរណ៍អន្តរជាតិ ដោយសង្កត់ធ្ងន់លើកំណើនគុណភាព ការធ្វើពិពិធកម្មទីផ្សារ និងការត្រៀមខ្លួនជាស្រេចសម្រាប់យុគសម័យឌីជីថល៕
ដោយ: តែម សុខុម
