អ្វីដែលគួរឲ្យកត់សម្គាល់ វិស័យដែលជាឆ្អឹងខ្នងសេដ្ឋកិច្ចជាតិមួយនេះ បានហក់លោតដល់ចំណុចបន្ទាប់ពណ៌ក្រហម មានន័យថា បានកើនឡើងដល់ចំនុច ដែលគួរប្រុងប្រយ័ត្នខ្ពស់ក្នុងការវិនិយោគ។ អ្នកជំនាញ និង អ្នកវិនិយោគអចលនទ្រព្យបានបញ្ជាក់ថា កំណើនយ៉ាងគំហុកក្នុងឆ្នាំ ២០១៨ វាបានរុញច្រាន និង ជះចំហាយមកដល់ឆ្នាំ២០១៩នេះ ដែលគម្រោងភាគច្រើនសុទ្ធតែបន្តមកពីឆ្នាំចាស់ ២០១៨។
លោក ឧកញ៉ា សៀ ឬទ្ធី ប្រធានក្រុមប្រឹក្សាភិបាលនៃក្រុមហ៊ុនវើលប៊ី្រដគ្រុប បានអះអាងថា សុខភាពវិស័យសំណង់ក្នុងឆ្នាំ ២០១៩ បានដើរដល់ចំណុចមួយ ឆ្អែតហើយមានន័យថានឹងថមថយកម្លាំងចុះមកវិញក្នុងឆ្នាំនេះ។ លោកឧកញ៉ា បានបញ្ជាក់ថា គម្រោងភាគច្រើនដែលសល់ពី ឆ្នាំ ចាស់ វាបានជះចំហាយរហូតមកដល់ឆ្នាំនេះ។
អត្ថបទទាក់ទង!
សេដ្ឋីអចលនទ្រព្យ និង ឡូជីស្ទីកដ៏ល្បីល្បាញរូបនេះ បានធ្វើការបញ្ជាក់ទៀតថា នៅក្នុងឆ្នាំនេះ លោកកំពុងតែបន្តសកម្មភាពវិនិយោគនៅក្នុងវិស័យសំណង់ជាច្រើនគម្រោងរបស់លោក ដែលសល់ពីឆ្នាំមុន ។ ដោយឡែក គម្រោងថ្មីៗផ្សេងៗ លោកឧកញ៉ា ដកឃ្លាមកគិត និង រៀបផែនការឲ្យកាន់តែប្រសើរជាងនេះ។
បើទោះបីជាវិស័យនេះត្រូវបានអ្នកជំនាញអះអាងថា វាថមថយយ៉ាងណាក្តី ក៏របាយការណ៍អាណាព្យាបាលនៅក្នុងវិស័យនេះ អះអាងថា វិស័យនេះនៅតែមានកំណើនខ្លាំងក្នុងឆ្នាំ២០១៩នេះ។ មន្ត្រីជាន់ខ្ពស់នៃក្រសួងរៀបចំដែនដី នគរូបនីយកម្ម និង សំណង់បានអះអាងថា ជារួមវិស័យសំណង់គិតរហូតមកពេលបច្ចុប្បន្ននេះ នៅតែមានភាពវិជ្ជមាន ក្នុងការទាក់ទាញដ៏សំខាន់សម្រាប់អ្នកវិនិយោគចាជាតិ និង អន្តរជាតិ។
ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានគូសបញ្ជាក់ថា ការកើនឡើងវិស័យសំណង់ក្នុងរយៈពេលកន្លងមកនេះ ដោយសារតែមានការស្នើសុំវិនិយោគពីគម្រោងធំៗ មានដូចជា អគារណិជ្ជកម្ម សណ្ឋាគារ ផ្សារទំនើប ទីក្រុងរណប បុរីលំនៅដ្ឋាន សំណង់ផ្ទះល្វែង និងភូមិគ្រឹះ រោងចក្រកាត់ដេរ សំលៀកបំពាក់ និងស្បែកជើង រោងចក្រម៉ាស៊ីនកិនស្រូវ និងឡត៍សង្ងួត តំបន់ឧស្សាហកម្ម និងតំបន់សេដ្ឋកិច្ចពិសេស។
បើផ្អែកតាមរបាយការណ៍ក្រសួងរៀបចំដែនដី នគរូបនីយកម្មនិងសំណង់ ក្នុងខែមករាឆ្នាំ២០១៩ នេះក្រសួងបានផ្ដល់លិខិតអនុញ្ញាតសាងសង់ ចំនួន៣២៣ គម្រោង ដែលមានទុនវិនិយោគជាង ៨២៩ លានដុល្លារ ធៀបនឹងខែមករាឆ្នាំ២០១៨ តម្លៃទុនវិនិយោគបានកើនឡើងរហូត ១៧៨ ភាគរយ ខណៈខែកុម្ភៈឆ្នាំនេះដែរ គឺមានគម្រោងវិនិយោគប្រមាណ ៣៤៧ គម្រោង ដែលមានទុន វិនិយោគជាង ៥៥៤ លានដុល្លារ ធៀបនឹងខែកុម្ភៈឆ្នាំ២០១៨ តម្លៃទុនវិនិយោគលើវិស័យសំណង់បានកើនឡើងរហូតជាង ៧០០ភាគរយ។
អត្ថបទគួរឲ្យចាប់អារម្មណ៍!
ជាមួយគ្នានេះដែរ គិតចាប់តាំងពីឆ្នាំ២០០០ មកដល់ខែកុម្ភៈឆ្នាំ២០១៩ នេះ ទុនវិនិយោគរបស់វិស័យឯកជនមកពីបរទេស គឺមានចំនួន ២១ប្រទេស ដែលមានគម្រោងវិនិយោគប្រមាណ ៣៨២ គម្រោង មានតម្លៃប៉ាន់ស្មានទុនវិនិយោគជាង ៥.៣៦០ លានដុល្លារ និងបានផ្ដល់ការងារ ជិត៣ម៉ឺននាក់ក្នុងមួយថ្ងៃ ជាមួយនឹងតម្លៃពលកម្ម សម្រាប់កម្មករគ្មានជំនាញ ៣ម៉ឺនរៀល និង មានជំនាញ ៦ម៉ឺនរៀលក្នុងមួយថ្ងៃ និង វិស្វករ ស្ថាបត្យករ និង អ្នកជំនាញផ្សេងទៀត ទទួលបានប្រាក់ឈ្នួលពី ៤០០ដុល្លារ ទៅ ២ ៥០០ដុល្លារ ក្នុងមួយខែផងដែរ៕
None
