មន្ត្រីជាន់ខ្ពស់ក្រសួងឧស្សាហកម្ម អះអាងថា ក្រុមហ៊ុនផលិតស្ករស KSL ដែលប្រកាសដកការវិនិយោគពីកម្ពុជា កាលពីពេលថ្មីៗ មិនបានចុះបញ្ជីវិនិយោគនៅកម្ពុជានោះទេ

ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអះអាងប្រាប់ខេមបូណូមីសថា ក្រុមហ៊ុនផលិតស្ករសធំបំផុតលំដាប់ទី៣របស់ថៃ KSL ដែលត្រូវបានសារព័ត៌មានបាងកកប៉ុស្តិ៍ ចុះផ្សាយថា បានដកការវិនិយោគចេញពីកម្ពុជា កាលពីពេលថ្មីៗ មិនមានចុះបញ្ជីវិនិយោគនៅកម្ពុជានោះទេ ហើយក៏ពុំមានការស្នើសុំបង្កើតរោងចក្រនៅកម្ពុជានោះដែរ។ បើតាមមន្រ្តីជាន់ខ្ពស់រូបនេះ អ្នកវិនិយោគមិនត្រូវសម្លឹងមើលតែលើប្រព័ន្ធអនុគ្រោះពន្ធ GSP ឬ EBA នោះទេ ប៉ុន្តែត្រូវសម្លឹងមើលលើបរិយាកាសវិនិយោគនៅក្នុងប្រទេសនោះ។ ជាក់ស្ដែងនៅកម្ពុជា មានច្បាប់វិនិយោគដែលអំណោយផលល្អ មានគោលនយោបាយសេដ្ឋកិច្ច ដែលជួយលើកកម្ពស់ដល់វិនិយោគិន ខណៈកម្ពុជា ក៏ជាទីតាំងដែលមានសក្ដានុពលខ្ពស់ទាំងកម្លាំងពលកម្ម ថាមពលអគ្គិសនីកកើតឡើងវិញ និងសណ្ឋានដីដែលអំណោយផលដល់វិស័យកសិកម្មផងដែរ។

​គួរបញ្ជាក់ថា កាលពីពេលថ្មីៗកាសែតបាងកកប៉ុស្តិ៍បានចុះផ្សាយថា ក្រុមហ៊ុនផលិតស្ករសធំបំផុតលំដាប់ទី៣នៅថៃ KSL បានសម្រេចដកវិនិយោគចេញពីទីផ្សារកម្ពុជា ដែលធ្វើឱ្យមានចាប់អារម្មណ៍យ៉ាងជុំវិញព័ត៌មាននេះ។ កាសែតនេះបានចុះផ្សាយដោយស្រង់សម្តីរបស់លោក ឆាលូស ឈីនថាំមីត (Chalush Chinthammit) ប្រធានក្រុមហ៊ុនផលិតស្ករសថៃ KSL ថា ការសម្រេដកការវិនិយោគចេញពីកម្ពុជានេះ គឺដោយសារកត្តាធំៗមួយចំនួនដូចជាកម្ពុជាបាត់បង់ប្រព័ន្ធអនុគ្រោះពន្ធ GSP, ទីផ្សារកម្ពុជា មានសន្ទុះកំណើនយឺត និងតម្លៃស្ករសបានធ្លាក់ចុះទូទាំងពិភពលោកក្នុងពេលប៉ុន្មានឆ្នាំមកនេះ។

បើតាមប្រភពដដែលនេះ ក្រុមហ៊ុន KSL បានចាប់ដៃគូសហការជាមួយដៃគូកម្ពុជា និងចិនតៃវ៉ាន់ ដើម្បីបង្កើតក្រុមហ៊ុនចំនួន២ សម្រាប់គ្រប់គ្រងការផលិតស្ករស និងការដាំដុះអំពៅ ហើយរាជរដ្ឋាភិបាលកម្ពុជាបានផ្ដល់ដីសម្បទានដល់ក្រុមហ៊ុន KSL និងដៃគូរបស់ខ្លួនចំនួន២ម៉ឺនហិកតា ក្រោមកិច្ចសន្យាជួលរយៈពេល៩០ឆ្នាំ៕

អត្ថបទ៖ បូ ដូឡា​